Ulupungu lwa kwa Kalinda ulwa June 1, 1912 lwatile: “Abengi ababelenga Ulupungu lwa kwa Kalinda balishibako bamo abashimona. Kuti babasendelako ulupapulo ukwabula ukulipila . . . Ishi impapulo bashilemba mu nshila ya kuti abashimona kuti baleibelengela.” Lwalandile no kuti: “Abashimona abengi balatemwa sana ukubelenga pa mapaalo ayasuma ayakabako mu calo cipya.”

Pa nshita aya mashiwi yalembelwe ninshi ifyalo ifingi ifilanda ululimi lwa ciNgeleshi fibomfya inshila shalekanalekana isha kulembelamo ifilembo fya bashimona. Pali iyi nshita ninshi Inte sha kwa Yehova bena kale batampa ukusambilisha abantu icine mu filembo fya bashimona. Kabili ifi fine e fyo tucita na pali ino ine nshita! Twalikwata impapulo mu filembo fya bashimona mu ndimi ukucila pali 50. Bushe ishi mpapulo shipangwa shani?

Ico babalilapo ukucita, kwalula ifilembelwe ukufitwala mu filembo fya bashimona. Ba Michael Millen ababombela ku Text Processing Services ku Patterson, New York batile: “Kale pa kupanga impapulo sha bashimona twalebomfya amaprogramu ya pa makompyuta aya twampani, lelo tayalesumina ukupulinta impapulo mu ndimi shonse isho twalefwaya. Nomba ino nshita tubomfya Watchtower Translation System iilenga tulelemba impapulo sha bashimona mu ndimi ishingi isho abantu balanda mwi sonde lyonse. Kwena takwaba inshila iisuma iyacila pali iyi tubomfya.”

Impapulo sha bashimona tashikwata fye ifilembo fyeka fyeka, lelo mulaba no bulondoloshi bwa fikope. Ku ca kumwenako, icikope caba pa nkupo ya lupapulo lwa bashimona ulutila Kuti Mwaba ne Nsansa Umuyayaya! bacilondolola ati: “Umwaume ale-enda mu musebo uwapita mu mpili ninshi kuli umwela kabili mu mbali ya musebo muli ifyani na maluba.” Ba Jamshed ababomfi batumikila kabili bapainiya wa nshita yonse abashimona batile, “Nalitemwa sana ubulondoloshi bwa ifi fikope.”

Pa numa ya kulemba ulupapulo mu filembo fya bashimona, balatuma ifyo balembele ku ma bethel uko bapanga ifilembo fya bashimona. Uku e ko baya mu kubika ifyebo pa mapepala ayakosa aya kuti te kuti yonaike ilyo balepangilapo ifilembo, e lyo na lintu abantu baleyabomfya pa kubelenga. Lyena, amapepala balayalonganika no kuyekatanya pamo e lyo batuma impapulo bapanga ku filonganino ilyo baletuma impapulo isho cilonganino calembeeshe. Na kabili nga ca kuti uko baletumina impapulo sha bashimona kwaliba utwampani nelyo nga post ofesi ilatuma ifipe nelyo ifintu ifya bashimona ukwabula ukulipila, kuti babomfya uto twampani. E lyo limo amaofesi yesu yalabomfya inshila iingalenga impapulo sha bashimona, e lyo na bashimwenekesha shafika bwangu bwangu pa kuti aba aba bwananyina baleshibomfya pa kulongana.

Balabomfya indalama ishingi ne nshita iikalamba pa kuti uyu mulimo ubombwe. Na kuba inshita bapoosapo pa kupanga amaBaibolo ayali 50,000 kuli mashini ya kupulintila iya ku Wallkill, mu musumba wa New York, e nshita ikabilwa pa kupanga amaBaibolo yabili fye aya bashimona. Baibolo imo fye iya mu filembo fya bashimona ikwata amavolyumu 25, kabili indalama shikabilwa pa kushita ifyo babomfya pa kupanga aya mavolyumu kuti twashitaimusha imiku ukucila pali 123 nga kulinganya ku ndalama shikabilwa pa kupanga Baibolo imo fye iya bamona. a Pa kuti bapange inkupo fye yeka yeka iya volyumu imo pa mavolyumu 25 ayapanga Baibolo imo, palaya indalama nalimo K2,550 (nelyo $150 U.S.)!

Bushe ababomba uyu mulimo wa kupanga impapulo sha bashimona bomfwa shani? Ba Nadia ababombela pa bethel ya ku South Africa batile: “Bamunyinefwe na bankashi abashimwenekesha nelyo abashimona balacula sana, kanshi imona ukuti ukubombako uyu mulimo wa kupulinta impapulo ishibafwa lishuko sana. Ici cilanga fye apabuuta ukuti Yehova alibatemwa icine cine.”

Inga nga ca kuti umuntu uushimona te kuti abelenge ifilembo fya bashimona? Mu myaka ya nomba line, twalifumishe akatabo akaleti Learn to Read Braille umwaba ifilembo fya bamona e lyo na bashimona. Balembele aka katabo mu nshila ya kuti abamona na bashimona bonse balekabomfya. Aka katabo kalikwata apa kulemba na ka kulembelako, ifyo abalesambilila ukubelenga no kulemba ifilembo fya bashimona babomfya ilyo baleisambilisha ukubelenga no kulemba. Abalesambilila nga baleilembela abene tabalaba ifyo balesambilila, na kuba nga bapisha iminwe pe shiwi cilabangukila ukulishiba no kukanalilaba.

Bushe bamunyinefwe abashimwenekesha nelyo abashimona banonkelamo shani muli ishi mpapulo? Ba Ernst abekala ku Haiti balelongana, lelo tabakwete impapulo sha bashimona. Kanshi pa kuti balande ilyashi lya basambi nelyo ukwasukapo pa kulongana, balesungila fye ifyebo. Batile: “Ino nshita ndemya ukuboko no kwasukapo apo ndefwaila. Nomba ng’umfwa ukuti na ine ndi wa bwananyina, pantu bonse tupokelela ifyebo fimo fine ifitukoselesha, ififuma kuli Yehova!”

Ba Jan ni baeluda ku Austria kabili tabamona. Balatungululako Isambililo lya Ulupungu lwa kwa Kalinda e lyo na Isambililo lya Baibolo pa Cilonganino, batile “Impapulo shesu isha bashimona shalyanguka sana ukumfwa ukucila impapulo shimbi isho nabelengapo. Ku ca kumwenako, mulaba amanamba ya mabuula, amafutunoti ayasha-afya ukwishiba apo yabelele, e lyo no bulondoloshi bwa fikope.”

Ba Seon-ok, bapainiya aba ku South Korea tabamona, kabili ni bankomamatwi. Kale nga bali pa kulongana baleikata abalebapilibwila ku maboko pa kuti bomfwe ifilelandwa pa kulongana. Lelo pali ino nshita balaibelengela impapulo tubomfya pa kusambilila Baibolo mu filembo fya bashimona. Batile: “Ifitabo fimbi ifya bashimona filafya ukubelenga pantu limo utumatoni tulabulila, ifilembo tafiba ifyaololoka e lyo na mapepala yalangukisha. Nomba amapepala Inte sha kwa Yehova babomfya pa kupanga impapulo yalikosa bwino ica kuti utupunda tulomfwika mu minwe, kanshi ici cilalenga ukubelenga impapulo kulenyangukila.” Balandile no kuti: “Kale abantu e balengafwa pa kubelenga Baibolo ukubomfya impapulo shilanda pa fya mu Baibolo. Lelo pali ino nshita ndaibelengelaa ne mwine. Ndatemwa sana pantu ndapekanya ukulongana cila mulungu kabili ndasukapo. Ndabelenga impapulo shonse ishifuma mu filembo fya bashimona, shisuma sana ica kuti ndafilwa ukuleka ukubelenga.”

Nga filya fine caba ku mpapulo shimbi, impapulo sha bashimona nasho shine tulalembapo ukuti “Cino citabo te ca kushitisha. Tucibomfya mu mulimo wa kusambilisha abantu Baibolo mwi sonde, kabili ubupe bwa kuitemenwa bulatwala pa ntashi uyu mulimo.” Tulemutasha pa ndalama musangula ukubomfya inshila balangilila pa donate.dan124.com. Bukapekape bwenu bulalenga abantu bonse ukubikako fye na bashimwenekesha e lyo na bashimona ukuti balekwata impapulo shilanda pa fya mu Baibolo.