“Ibumba Litungulula nalipingula ukuti ukutendekela pa 1 April twalatendeka na kabili kulalongana pamo, kano fye ubuteko nga bwalikanya abantu ukulongana pamo mu calo mwaba.” Inte sha kwa Yehova mwi sonde lyonse balitemenwe ilyo babelengele ici ica kubilisha pa jw.org mu March 2022. Na lyo line pali iyi nshita ninshi icikuko ca COVID-19 tacilapwa. a Finshi twali no kucita pa kuti abaleisa mu kulongana bacingililwe ku cikuko. Ifi tushalelonganina mu Mayanda ya Bufumu pa myaka nalimo ibili, bushe yali fye bwino aya kuti kuti twalalonganinamo na kabili?

 Icawemeko ca kuti bamunyinefwe balitendekeko kale ukupekanya ukuti tukatendeke ukulonganina pa Mayanda ya Bufumu imyeshi iingi ku numa.

 Ilyo papitile umweshi umo ukutula apo twalekele ukulonganina pamo mu 2020, aba bwananyina ababombela muli dipartimenti ya Worldwide Design/Construction Department (WDC), ku Warwick, mu New York, batendeke ukulanshanya pa fyo icikuko cali no kukuma imilimo iba pa Mayanda ya Bufumu ne fyo twalingile ukucita pa kuti abantu bacingililwe.

 Ifyo aba bwananyina balekabila mu calo cimo na cimo fyalepusana. Ba Matthew De Sanctis ababombela mu dipartimenti ya WDC batile: “Mu fyalo fimo tabakwete ifya kubomfya pa kusamba ku minwe. Nomba pa Ng’anda ya Bufumu nga tapali amenshi ninshi aba bwananyina bakulashita, nangu ukutapa mu mumana nelyo mu cishima. Mu fyalo fimbi aba buteko balyalwileko ifyo abantu balingile ukukonka mu fikuulwa umwaba fimashini ifikafya no kutalalika, pa mwela uulingile ukupita mu fikuulwa kabili balyalwileko ne fipampa ifilingile ukubomfiwa pa kulanda pa busaka no kuicingilila ku malwele.”

 Bushe bamunyinefwe bacitile shani ifi kwali aya mafya? Ba Matthew batile, Amayanda ya Bufumu ayengi yalekabila fye “ukuti tubomfye inshila sha-anguka kabili ishishalekabila indalama ishingi.” Ku ca kumwenako ku Papua New Guinea balifwaile imbeketi ya malita 20 e lyo babikako amatapu e yo balebomfya pa kusamba ku minwe. Kanshi pa Ng’anda ya Bufumu imo balebomfya fye indalama K622.45 ($40). Lyena pa kuti Amayanda ya Bufumu mu Africa yakwate apa kusambila iminwe, balishitile utwa kubomfya utusuma utwacilile pali 6,000 uto bashitile ku Asia.

 Fimbi ifyo bacitile, balibikile nelyo ukuwamyako amafani ne fipuuta umwela pa kuti mu Mayanda ya Bufumu muleba umwela uuwingi. Mu filonganino ifingi balishitile ifya kubikako ifisoselo ifitali, pa kuti abalebombela ku fisoselo e baleikatako fye epela, e lyo umuntu nga alefwaya ukwasukapo ena taleikata icisoselo ku minwe. Na kabili libili libili aba bwananyina balebomfya umuti uwipaya utushishi pa kuwamya uko abantu bekata sana pamo nga ku fya kwiswilako ifibi na amatapu ya menshi pa kuti beleambula ubulwele. Mu filonganino fimo balibikile amatapu ayaisukila ayene umuntu nga atambikapo fye iminwe. Pa kuti babike ifi mu Ing’anda ya Bufumu imo ku calo ca Chile balebomfya indalama mupepi na K21,785 ($1,400).

 Nangu ca kuti ico aba bwananyina babikileko sana amano kumona ukuti abantu nabacingililwa ilyo bali pa Ng’anda ya Bufumu, balebomfya na bwino indalama isho abantu balesangwilako. Ku ca kumwenako, mu fyalo fimo ubuteko tabwalelipilisha imisonko abaleshita utwa kubomfya pa kusamba ku minwe. Aba pa ma Bethel yalekanalekana balibombele pamo pa kuti bashitile ifyalekabilwa ifingi pa muku umo. Aba pa ma Bethel balebombela pamo na ba mu dipartimenti Iishita Ifintu mu Calo Conse, kabili baleshita ifi fintu kuli balya bene abalefipanga. Ici calelenga baleshita pa mutengo uusuma kabili tapalekokola pa kuti bapokelele ifyo bashita.

 Ifi aba bwananyina babombeshe pa kuti abaleya pa Ng’anda ya Bufumu bacingililwe, fyalilengele abantu balaumfwa abacingililwa ilyo twatendeke ukulonganina pamo na kabili. Ba Dulcine bankashi aba ku Peru balandile ukuti ilyo baumfwile ukuti twalatendeka ukulonganina pa Ng’anda ya Bufumu bali no “mwenso.” Batile, “Ilyo fye icikuko catendeke nalilwele COVID-19. Kanshi ilyo balandile ukuti twalatendeka ukuya ku Ng’anda ya Bufumu nali no mwenso pantu nalemona ukuti nalimo kuti nalwala na kabili. Nomba ilyo naile ku Ng’anda ya Bufumu nalimwene ifyo baeluda bacitile ifyali no kulenga twacingililwa, pamo nga ukubikako apa kubulila umuti wa kusuba ku minwe uwipaya utushiishi, balibikile ifisoselo ku fyakwikatilako ifitali ifyo abalebombelako ku fisoselo baleikatilako abaleasuka, e lyo no kubomfya umuti wa kwipaya utushishi pa kuwamya ilyo tushilatendeka ukulongana e lyo na lintu twapwisha. Ifi fyonse fyalilengele naumfwa uwacingililwa.” b

 Ba Sara, bankashi abekala mu Zambia bena bakwete ubwafya ubwapusanako. Batile: “Abena mwandi bafwile no bulwele bwa COVID-19 imyeshi iinono iyapita. Nalisakamene pa fyo nali no kumfwa nga naya ku Ng’anda ya Bufumu pa muku wa kubalilapo ukwabula abena mwandi.” Bushe cali shani ilyo baile? Batile: “Ukulonganina pa Ng’anda ya Bufumu nakulenga nashininkisha ukuti Yehova ali na ifwe muli shino nshiku sha kulekelesha. Pali ino nshita ndamona ifyo baeluda na ba bwananyina balanga ukuti balintemwa ne fyo bankoselesha ukucila ifyo cali kale.”

 Bamunyinefwe na bankashi mwi sonde lyonse nabatemwa sana ifi tutendeke ukulalonganina pa Mayanda ya Bufumu na kabili. Tulatasha sana pa ndalama musangula, kabili abengi musangula ukubomfya donate.dan124.com. Ici calilenga pa fifulo tupepela palelenga abantu baletemwa ukubapo kabili baleumfwa abacingililwa nga baisa mu kulongana.