PA 6 October mu 2014 e lyo umulabasa wa pa intaneti uwa JW Broadcasting watendeke mu ciNgeleshi. * Ukutula mu August 2015 amaprogramu ya pa mulabasa wa JW Brodcasting yalipilibulwa mu ndimi 70 pa kuti icitetekelo ca ba bwananyina cilekoselako. Abantu bonse abatamba uyu mulabasa balatasha nga nshi. Nomba finshi ifyo bacitile pa kuti bapange uyu mulabasa?

Balingile ukufwaya incende iisuma apa kupangila uyu mulabasa. Balisangile umuputule uwalinga mu cikuulwa  ca ntunti 30 ica Columbia Heights pa maofeshi ya kalamba aya Nte sha kwa Yehova ku Broklyn mu New York. Mu mulungu fye umo bamunyinefwe baliwemye uyu muputule, kabili aba mu Dipartimenti iiwamya ifintu balitendeke ukupekanya apa kutambishisha amaprogramu, kabili ababa mwi bumba lya makuule nabo batendeke ukupekanya uyu muputule pa kuti ulemoneka bwino. Bamunyina na bankashi abafumine mu ncende ishalekanalekana mu United States balibombeshe pa kufwaya inshila isho bengawamishamo bwangu uyu umuputule. Umulimo wa kupekanya wali no kubasendela imyeshi iingi lelo bena babombele mu shiku fye ishinono, kabili dipartimenti iishita ifintu nayo yalishitile ifintu ifingi ifyalefwaikwa.

Balibikile intambo sha malaiti inshingi kabili balishininkishe ukuti ifisolobelo fyonse filebomba fye bwino. Ilyo ifi fyonse fyalecitika, aba bwananyina ababa mwi bumba lya balisha ifilimba ku Patterson balebombela pamo na bamunyinefwe na bankashi abafumine ku fyalo ifyalekanalekana pa kwimba no kukopa ulwimbo ulwa kwiswila no kwisalila programu ya JW Broadcasting. Balipekenye amaskripti na mavidio kabili aba bwananyina ku Brooklyn, ku Patterson, na ku Wallkill abakopa inyimbo na mavidio balibombeshe pa kupanga vidio. Ilyo bapwishishe ukupanga uyu umulabasa na fyonse ifyalefwaikwa, balitampile ukupekanya amaprogramu ayo bali no kutambisha pa myeshi iinono.

Ilyo twaipwishe uwaishiba sana ifya milabasa pa nshita twingapoosa pa kupanga umulabasa wa musango uyu, atwebele ati cali no kutusendela umwaka  umo ne myeshi 6 pa kupwisha. Lelo bamunyinefwe na bankashi balibombeshe ica kuti bapwishishe uyu mulimo mu myeshi fye ibili!

Ala uyu mulabasa uleyafwa abantu abengi! Abantu abengi nga nshi balatamba iyi programu JW Broadcasting imiku iingi, ukubikako fye na mavidio na yambi ayasangwa pa webu saiti ya jw.org. Ilingi line iyi programu baibikapo pali Cimo cila mweshi.

Bushe abantu ba kwa Yehova bomfwa shani pali iyi programu iisuma nga nshi? Ibelengeleni fimo fimo ifyo aba bwananyina bailandila:

• “Ala cino cungulo naciwama nga nshi! Ilyo ine no mwina mwandi twacipwisha ukutamba programu ya May 2015 pa mulabasa wa JW Broadcasting, insansa nacikwata katwishi ne fyo ningashilondola. Cine cine iyi programu bupe ubusuma sana ubo Yehova ampeela. Tuletootela Ibumba Litungulula na ba bwananyina ababombeshe pa kupekanya iyi programu.”—Indonesia.

• “Kale aba bwananyina tabatalile abomfwapo bamunyinefwe ababa mwi Bumba Litungulula balelanda ilyashi. Nomba pali ino nshita tulabomfwa kabili no kubamona tulabamona. Kanshi, pali ino nshita tulomfwa ukuti twalikatana sana na baba mwi Bumba Litungulula  e lyo na ba bwananyina mwi sonde lyonse.”—Kenya.

• “Apo abena mwandi te Nte ya kwa Yehova, cilankosela ukukwata amapepo ya lupwa na bana bandi babili imisepela. Nomba uyu mulabasa ulangafwa sana, ulalenga nalaumfwa ukuti na ine wine naba mu cilonganino ca kwa Yehova kabili ifiba muli iyi programu filankoselesha icine cine na bana bandi. Ukwabula no kutwishika iyi programu bupe ubo Yehova atupeela.”—Britain.

• “Twalitemwa sana umulabasa wa JW Broadcasting! Yehova alyaswike amapepo yesu ilyo batendeke ukupilibwila iyi programu na mu ndimi shimbi. Icitetekelo cesu cilakoselako nga twamona ifyo mubombela Yehova ne nsansa. Ukutula fye ilyo uyu mulabasa watendeke tulomfwa ukuti cine cine twaliba mu cilonganino ca kwa Yehova icisuma nga nshi.”—Czech Republic.

• “Ukukutika kuli bamunyinefwe ababa mwi Bumba Litungulula mu lulimi lwandi kwalilenga na palama kuli Yehova.”—Brazil.

• “Nalibombela Yehova pa myaka 16, na lyo line insansa nacikwata ilyo nacilatamba iyi programu kuti nashilinganya fye ku nsansa isho nakwete ilyo nalebatishiwa. Ala namubomba pa kutubikilako umulabasa wa JW Broadcasting.”—Brazil.

Apo Yehova aletwafwa, natucetekela ukuti umulabasa wa JW Broadcasting ukatwalilila ukukosha icitetekelo ca ba bwananyina mwi nsonde lyonse kabili ukalenga Yehova akacindikwe.