Ilyo mulepekanya mulepepa kabili mulepekanya bwino. Mulelomba Yehova pa kuti alemwafwa ukubika amano ku fyo mulepekanya ukucila ukubika amano kuli mwe bene. Mufwile ukubika amano ku fishinka fikalamba ifyo mulingile ukweba abantu. Mulelanda mu mashiwi yenu ukucila ukuyalanda filya fine fye yalembelwe.

Mulelanda no mweo onse. Muletontonkanya pa co abantu balingile ukumfwila ifyo mulefwaya ukubeba. Mulebabikako amano. Lyena, ifyo mwalaiminina, ifyo mwakulabomfya amaboko pa kulanda, ne fyo mwakulamoneka pa menso fya kulalanga ukuti namutemwa abalekutika kabili namubabikako amano.

Mulelolesha abalekutika. Mulebalolesha nga ca kuti te kuti bakalipe nga mwabalolesha. Ilyo mulelanda ilyashi, mulelolesha umuntu umo na umo mwi bumba ukucila ukulatandanya fye amenso pe bumba.