Bushe ni kwi mwakulile?

Nafyalilwe mu Italy mu 1943. Twaleikala mu mushi uunono, na bamunyinane na bankanshi yandi, e lyo batata bali balimi kabili bali ni bakabasa. Abafyashi besu baletusambilisha sana pa kuti tukabe abakosa mu Katolika.

Mulandu nshi mwalefwaila ukuba abapatili?

Ilyo nali umwaice, naleumfwa bwino ukukutiika ku bapatili nga balefunda mu calici. Naleumfwa bwino ifyo amashiwi yabo yaleumfwika nga balelanda, e lyo ne fyo balecita pa minsa. E ico napangile nati mpaka fye nkabe umupatili. Ilyo nali ne myaka 13, bamayo bantwele kwi sukulu lya kukuuka uko balesambilisha abalumendo ifya kwisaba abapatili ku ntanshi.

Bushe mwalesambililako na Baibolo?

Kwena te sana. Ilyo nali ne myaka 15, kafundisha wesu umo ampeele icitabo ca mabuuku ya Mbila Nsuma, umwali ifyebo ifyalelanda pa bumi bwa kwa Yesu ne fyo alebomba umulimo wa kushimikila kabili nalibelengele cilya citabo imiku iingi. Ilyo nali ne myaka 18, naile ku Roma mu kusambilila pa mayuniversiti ayaletungululwa na ba paapa. Nasambilile iciLatin, iciGriki, ilyashi lya kale, amasambililo ya bantunse, ifyo abantu batontonkanya, e lyo ne fya mapepo. Nangu ca kuti twalelanda amalembo ku mutwe kabili pa Mulungu twaleumfwa uko balebelenga Baibolo mu calici, Baibolo yena tatwaleisambilila sana.

Bushe milimo nshi mwalebomba ilyo mwaishileba abapatili?

Naleangalila imilimo yonse mu calici no kuteyanya bwino ifintu. Lelo nalesambilishako pali fimo ifyo Icilye ca Bubili ica Vatican catantike.

Cinshi calengele mutendeke ukutwishika icalici mwalimo?

Ifintu fitatu e fyalengele. Icalici lya Katolika lyaleitumpa mu fikansa fya calo. E lyo shimapepo nelyo umupatili nga acita ifyabipa tabalecitapo nangu cimo. Kabili fimo ifyo ba Katolika basambilisha tafyaleumfwika ukuti fya cine. Ku ca kumwenako, naleyipusha nati, bushe Lesa uwakwata ukutemwa kuti alekanda abantu umuyayaya pa numa ya kufwa? E lyo kabili, bushe Lesa afwaya ukuti tulepepa imiku ne miku amapepo yamo yene ukubomfya kolona? *

Finshi mwacitilepo?

Nalipepele kuli Lesa ukuti antungulule, ninshi ne filamba filepona. Kabili nalishitile Baibolo ya Catholic Jerusalem Bible, iyafumine mu ciItalian, kabili natendeke ukuibelenga. Lyena ulucelo lumo pa Mulungu pa numa ya mapepo ilyo nafuulile fye umwingila wandi, abaume babili baishile apo basambilishisha bashimapepo. Batile ni Nte sha kwa Yehova. Twalilanshenye nabo Baibolo ukucila pe awala limo kabili banangile ne fyo Baibolo yalanda ifyo twingeshibilako bakapepa ba cine.

 Finshi mwaletontonkanya pali ba Nte abamutandalile?

Nalitemenwe ifyo bali abaishininkisha pa kulanda kabili ne fyo baleambula amalembo muli Baibolo ya ba Katolika. Pa numa, Nte umbi uwe shina lya Mario, atendeke ukuntandalila. Alintekanishishe kabili ali uwa cishinka, cila Mulungu ulucelo aleisa nangu imiceele ibipe shani. Aleti fye 9 koloko nga yalila ninshi na o no kufika afika.

Bushe abapatili bambi balecita shani nga ba Nte bamutandalila?

Nalebeta ukuti nabo basangweko ilyo tulelanshanya, lelo tapali nangu umo uwalebikako sana amano ku kusambilila Baibolo. Nomba ine naleumfwa bwino ukusambilila. Nalesambilila ifisuma sana, pamo nga, icalenga ukuti Lesa aleke ifyabipa no kucula ukulacitika. Nalefwaisha sana ukwishiba icalenga pantu ici calimpelengenye sana pa nshita ntali.

Bushe abakalamba ba mu calici tabalemulesha ukusambilila Baibolo?

Mu 1975, nalile imiku iingi ku Rome mu kubalondolwela ifyo naletontonkanya. Abakalamba ba mu calici balyeseshe ukwalula ifyo naletontonkanya, lelo tabalebomfya Baibolo pa kulondolola. Na pa kulekelesha pa 9 January, mu 1976, nalibalembele ukuti naleka ukuba Katolika. Pa numa ya nshiku shibili, nalifumine apo naleikala apo balesambilishisha bashimapepo. Naninine ishitima no kuyasangwa ku kulongana kwa Nte sha kwa Yehova umuku wa kubalilapo, kabili nasangile ukuti kanshi kulya kulongana kwali kulongana kwa mutupule, ukuba abantu abafuma mu filonganino fya ba Nte ifyalekanalekana. Fyonse ifyalecitika kulya fyalipusene sana ne fyo nabeleshe ukumona. Nte umo na umo ali-ikwatile Baibolo kabili balekonkamo ilyo bakalanda balekanalekana balelanda pa malyashi ayapusanapusana.

Bushe ba lupwa wenu baumfwile shani pa fyo mwacitile?

Abengi balenkaanya icine cine. Nomba naishileishiba ukuti ndume nandi umo alesambilila Baibolo na ba Nte mu citungu ca Lombardy, icabela ku kapinda ka ku kuso aka Italy. Nalile mutandalila kabili ba Nte abo nasangile kulya balingafwile ukusanga incito no mwa kwikala. Mu kupwa kwa ulya wine mwaka, nalibatishiwe ukuba Inte ya kwa Yehova.

Bushe mulomfwa ububi pa fyo mwacitile?

Awe nakalya! Nomba nalipalama sana kuli Lesa, pantu ifyo naishiba pali ena fyafuma muli Baibolo, te ku mano ya bantunse nelyo ku fisambilisho fya mu calici. Kabili kuti nasambilishako na bambi mu bufumacumi ninshi ninshininkisha ne fyo ndelandapo.