IFYO BAIBOLO ISAMBILISHA
Bamalaika
Bamalaika balasangwa sana mu fitabo, mu fya kulengalenga e lyo na mu mafilimu. Bushe bamalaika ni bani, kabili mulimo nshi babomba?
Bushe bamalaika ni bani?
IFYO BAIBOLO ILANDA
Lesa abalilepo ukupanga ifibumbwa fya mano nga nshi ilyo ashilabumba imyulu ne sonde e lyo na bantu ba kubalilapo. Ifi ifibumbwa fyalikwata amaka ukucila abantunse, kabili fyaba ku cifulo ca mipashi ukwikala Lesa kabili ku cifulo ico abantu bashingayako nelyo ukumona. (Yobo 38:4, 7) Baibolo iita ifi ifibumbwa ukuti “imipashi” nelyo “bamalaika.”—Amalumbo 104:4. *
Bushe kwaba bamalaika banga? Baba abengi sana. Bamalaika abashinguluka icipuna ca bufumu ica kwa Lesa baba “amakana ikumi ukufushiwa ku makana ikumi.” (Ukusokolola 5:11) Nga kusansha iyi impendwa kuti twatila baba ukucila 100,000,000.
“Naliloleshe . . bamalaika abengi abashingulwike icipuna ca bufumu. . . , ne mpendwa yabo yali amakana ikumi ukufushiwa ku makana ikumi, na makana ya makana.”—Ukusokolola 5:11.
Milimo nshi bamalaika balebomba kale?
IFYO BAIBOLO ILANDA
Ilingi line bamalaika e balelandilako Lesa kabili e bali inkombe shakwe. * Na kabili, Baibolo yaliladapo pali bamalaika ninshi balecita ifipesha mano. Lesa atumine malaika ku kupaala Abrahamu na ku kumulesha ukutuula Isaki umwana wakwe ilambo. (Ukutendeka 22:11-18) Malaika alimonekeele kuli Mose mu cimpusa icalepya ku kumweba amashiwi ayali no kwalula ubumi bwakwe. (Ukufuma 3:1, 2) Ilyo kasesema Daniele bamupoosele mu cilindi ca nkalamo, Lesa ‘atumine malaika wakwe ku kucilika utunwa twa nkalamo.’—Daniele 6:22.
“E lyo malaika wa kwa Yehova amoneke kuli [Mose] mu lubingu lwa mulilo mu kati ka cimpusa.”—Ukufuma 3:2.
Milimo nshi bamalaika babomba muno nshiku?
IFYO BAIBOLO ILANDA
Tatwaishiba fyonse ifyo bamalaika bacita pali ino nshita. Na lyo line, Baibolo itila balabomba umulimo wa kwafwa abantu ababa ne mitima ya cishinka ukwishiba Lesa.—Imilimo 8:26-35; 10:1-22; Ukusokolola 14:6, 7.
Yehova alilengele Yakobo ukuloota iciloto umo amwene bamalaika baleikila no kunina “umutanto” uwali pa kati ka myulu ne calo. (Ukutendeka 28:10-12) Nga fintu na ifwe twingatontonkanya, ilyo Yakobo abuukile afwile atontonkenye ukutila Yehova alatuma bamalaika ku kubomba imilimo pa calo iya kwafwilisha ababomfi ba kwa Lesa aba cishinka.—Ukutendeka 24:40; Ukufuma 14:19; Amalumbo 34:7.
“Umutanto nawimikwa pe sonde ne mpela ya uko yafikile mu muulu; kabili, moneni! bamalaika ba kwa Lesa balenininapo no kwikililapo.”—Ukutendeka 28:12.
^ para. 6 Baibolo ilanda ukuti ifibumbwa fya mupashi fimo fyalipondokeele Lesa, kabili iita ifi ifibumbwa ukuti “ifibanda.”—Luka 10:17-20.
^ para. 11 Mu lulimi lwa ciHebere no lwa ciGriki umo Baibolo yalembelwe pa kubala, ishiwi lya kuti “malaika” lipilibula ukuti “inkombe.”
Nalimo Kuti Mwatemwako ne fi
AMASUKO KU MEPUSHO YA MU BAIBOLO
Bushe Ifibanda E ko Fyaba?
Bushe ifibanda finshi? Ni kwi uko fyafumine?
