ICALO ca Kyrgyzstan cabela mu Central Asia kabili cashingulukwa ne mpili ishakwata amenshi makasa pa muulu. Ici calo caba pa kati ka fyalo fya Kazakhstan, Uzbekistan, Tajikistan ne calo ca China. Muli ici calo mwalifula sana impili kabili emo ulupili beta ati Tian Shan Mountain ulwalepa amamita 7,439 lwalepa sana. Nangu ca kuti tamwaba imiti iingi, e calo umwaba sana imiti beta ati walnut.

Abena Kyrgyzstan ba mucinshi sana kabili bacileela. Nga balelanda no muntu umukalamba balabomfya ishiwi lya mucinshi ilya kuti “imwe” kabili nga bali muli motoka balapeela abakalamba apa kwikala kabili abakalamba ebo bapela icipuna icisuma nga balelya.

Abafyashi abengi bakwata abana batatu nelyo ukucilapo. Kasuli umwaume ilingi line alatwalilila ukwikala na bafyashi bakwe na lintu aupa kabili alabasakama ukufikila bafwa.

 Abanakashi balabasambilisha ifya kubomba imilimo ya pa ng’anda ukutendekela ku bwaice. Nga baba imisepela baleshiba ifya kusunga ing’anda. Umwanakashi ilingi line balamupekanishisha insalamu. Ishi insalamu kuti shaba fya kufimbana ifyalekanalekana, ifya kufwala e lyo na kapeti. Umwaume eulipila impango kabili ishi kuti shaba ni ndalama nelyo ifitekwa.

Nga kuli ukusefya nelyo icililo balepaya impaanga nelyo kabalwe. Nga baipaya inama, balaiputaula no kwakanya abantu. Balalanga umucinshi ku bantu na lintu baleyakanya inama pantu bakanya inama ukulingana ne myaka umuntu akwete nelyo icifulo akwata. Lyena balapekanya ifya kulya ifyo balya sana ifyo beta ati beshbarmak, kabili ifi ifya kulya baliila fye ne minwe.