Kuti tuleumfwa sana ububi nga ca kuti umunensu alecula ku malwele ya matontonkanyo. Kuti twalanga ukuti twalibika amano ku munensu nga ca kuti tulemwafwako mu fintu fimo ilyo alwele. Kuti twacita shani ifi?

‘Muleba abayanguka ukumfwa.’—YAKOBO 1:19.

Inshila imo iyo mwingafwilamo umunenu kukutika ilyo alelanda. Te fyonse ifyo umunenu alelanda ifyo mwingalandapo. Nga alelanda muleleka aishiba ukuti namumubikako amano, mwilamupingula lelo mule-esha na maka ukwelenganya ifyo aleumfwa. Muleibukisha no kuti inshita shimo kuti alanda ifintu ifyo engesalanguluka pa numa.—Yobo 6:2, 3.

“Sansamusheni abali no bulanda.”—1 ABENA TESALONIKA 5:14.

Umunenu kuti aleumfwa sana umwenso nelyo ukulamona kwati tacindama. Nga ca kuti tamwishibe bwino ifya kulanda, ukweba fye umunenu ukuti mwalimutemwa kabili mwalimubikako amano kuti kwalenga asansamuka no kulaumfwako bwino.

“Ukutemwa kwa kwa cibusa wa cishinka takupwa.”—AMAPINDA 17:17.

Muleafwako cibusa wenu imilimo. Mwilamona fye kwati namwishiba ifyo mwingacita pa kumwafwa lelo mulemwipusha ifyo engatemwa mwamucitilako. Nga ca kuti umunenu alefilwa ukulanda ifyo  mwingacita pa kumwafwa, nalimo kuti mwaeshako ukumweba ukuti muleya bonse mu kwenda. Nelyo kuti mwaya mu kushitila pamo ifintu, ukuwamya pa ng’anda nelyo ukubombela pamo imilimo imbi.—Abena Galatia 6:2.

‘Muleshishimisha.’—1 ABENA TESALONIKA 5:14.

Inshita shimo umunenu te kuti afwaye ukulanda. Mule-eba umunenu ukuti nga afwaya ukulanda, epo muli mwakulakutika. Pa mulandu wa kuti umunenu alilwala, kuti alanda nelyo ukucita ifintu fimo ifingamukalifya. Nalimo kuti akaana ukuti mucite ifyo mwalanshenye pa mulandu wa kuti taleumfwa bwino. Mulemutekanishisha ilyo mulemwafwa kabili mulemulangulukilako.—Amapinda 18:24.

“Ndesha na maka ukuba cibusa uo umunandi engacetekela. Nangu ca kuti tapali ifyo ningacita pa kupwisha ubwafya akwete ndesha na maka ukukutika ilyo alelanda. Inshita shimo afwaya fye uwa kukutika ku fyo alelanda pa kuti omfweko bwino.”—E fyalandile ba Farrah abakwata abanabo abalwala amalwele ya matontonkanyo. a

“Umunandi umo alankoselesha kabili alikwata icikuuku. Alinjitile ku mwabo pa kuti tuye tuliile pamo ifya kulya. Alilangile ukuti alintemwa kabili ici calengele nalanda ifyo naleumfwa. Ifyo acitile fyalinkoseleshe sana!”—E fyalandile ba Ha-eun abalwala ubulwele bwa masakamika.

“Ukutekanya kwalicindama sana. Nga ca kuti umukashi wandi acita ifya nkalifya, bwangu bwangu ndebukisha ukuti talefwaya ukunkalifya ico acitila ifi nico alilwala. Ici cilalenga nilakalipa sana lelo ndemubikako amano.”—E fyalandile ba Jacob, abo abena mwabo balwala ubulwele bwa masakamika.

“Umwina mwandi alambikako sana amano kabili alansansamusha. Nga nshileumfwa bwino, tampatikisha ukucita ifintu ifyo nshilefwaya. Ici cilepilibula ukuti na o inshita shimo alafilwa ukucita ifintu fimo ifyo engafwaya ukucita pa mulandu wandi. Nalitemwa sana umwina mwandi pantu te kaitemwe babili alaipeelesha sana.”—E fyalandile ba Enrico, abalwala ubulwele bwa matontonkanyo.