1-3. (a) Finshi fimo ifingatwafya ukuleka na pa numa ya kubatishiwa? (b) Mepusho nshi twingayipusha nga ca kuti ciletukosela ukwaluka? (Moneni icikope pa muulu.)

PA MYAKA iingi, ba Kevin baleteya ifyangalo fya kushitikapo, balepeepa fwaka, bali ni bacakolwa, kabili balebomfya imiti bubi bubi. ^[1] (Moneni ifyebo na fimbi.) Ilyo batendeke ukusambilila pali Yehova balefwaya ukuba cibusa wakwe. Lelo pa kuti babe cibusa wakwe balingile ukwalula ubumi bwabo. Yehova ne Cebo cakwe Baibolo calibafwile ukwaluka.—AbaHebere 4:12.

² Pa kuti babe Abena Kristu abasuma, ba Kevin balingile ukutwalilila ukwalula ubumi bwabo na lintu babatishiwe. (Abena Efese 4:31, 32) Ku ca kumwenako, ba Kevin balekalipa bwangu. Pa fintu fyonse icabafishe sana, kulama ubukali. Na kuba abene batile ukulama ubukali kwalibafishe sana ukucila na pa fyabipa ifyo balekele ukucita ilyo bashilabatishiwa!  Na lyo line ba Kevin balepepa kuli Yehova ukuti abafwe ukwalula ubumi bwabo kabili baleisambisha sana Baibolo.

³ Fwe bengi ilyo tushilabatishiwa, twalyalwile ubumi bwesu pa kuti tulecita ifyo Baibolo ilanda. Lelo na pali ino ine nshita, twalishiba ukuti tufwile ukwaluka na mutuntu utunono pa kuti tube nga Lesa na Kristu. (Abena Efese 5:1, 2; 1 Petro 2:21) Ku ca kumwenako, nalimo tulailishanya sana, nelyo tuli ba lwambo, kabili tulalanda ifyabipa pa bantu bambi. E lyo nalimo inshita shimo tulatiina ukuti bambi batontonkanya nelyo balanda ukuti ifyo tucita tafyawama. Nalimo pa myaka iingi twalyesha sana ukuti twaluke lelo tulafilwa. Ifi nga e fyo caba, nalimo kuti twayipusha atuti: ‘Mulandu nshi mfililwa ukwaluka mutuntu utunono? Finshi ningacita pa kuti ndekonka ifyo Baibolo ilanda pa kuti ntwalilile ukwaluka?’

4. Mulandu nshi cafisha ukucita lyonse ifisekesha Yehova?

⁴ Twalitemwa Yehova, kabili tulafwaisha ukucita ifingamusekesha. Ku ca bulanda te lyonse tucita ifya kumusekesha pantu tatwapwililika. Ilingi line tumfwa nga filya umutumwa Paulo aumfwile, uwatile: “Muli ine amaka ya kufwaya ukucita icisuma e mo yaba, lelo amaka ya kucicita e yashabamo.”—Abena Roma 7:18; Yakobo 3:2.

5. Finshi twalekele ukucita ilyo tushilabatishiwa, lelo finshi fimo ifyatwafya ukulekana na pali ino ine nshita?

⁵ Ilyo tushilaba mu cilonganino ca kwa Lesa, twalilekele ukucita ifyo Yehova apata. (1 Abena Korinti 6:9, 10) Lelo tatwapwililika. (Abena Kolose 3:9, 10) Kanshi tatufwile ukulatontonkanya ukuti nga twabatishiwa nelyo nga twaba mu cine pa myaka iingi ninshi tatwakulalufyanya, cakulatwangukila ukucita icisuma, nelyo tatwakulalwishanya no lunkumbwa lwa kucita ifyabipa. Ifintu fimo kuti fyatwafya ukuleka nangu pengapita imyaka iingi.

6, 7. (a) Finshi fyalenga ukuti tutwalilile ukuba ifibusa fya kwa Yehova nangu ca kuti tatwapwililika? (b) Mulandu nshi tulingile ukulombela Yehova ukuti atwelele?

⁶ Nangu ca kuti tatwapwililika, kuti twaba ifibusa fya kwa Yehova no kulamubombela. Lyonse muleibukisha ifyo cali pa kuti mube cibusa wa kwa Yehova. Yehova umwine alimwene ifisuma muli imwe kabili alefwaya ukuti mu mwishibe. (Yohane 6:44) Alishibe ukuti mulalufyanya, no kuti kwaliba fimo ifyo mucita ifyamwafya ukuleka kabili alishibe no kuti inshita shimo mukalalufyanya. Na lyo line, Yehova alefwaisha ukuti mube cibusa wakwe.

⁷ Yehova alitutemwa sana ica kuti alitupeele ubupe ubwacindama nga nshi. Alitumine Umwana wakwe ukwisa pano isonde pa kuti engapeela ubumi bwakwe ilambo pa membu shesu. (Yohane 3:16) Kanshi nga twalufyanya, kuti twalomba Yehova ukuti atwelele. E lyo pa mulandu wa cilubula, kuti twacetekela ukuti akulatwelela nga twalufyanya kabili kuti twatwalilila ukuba ifibusa fyakwe. (Abena Roma 7:24, 25; 1 Yohane 2:1, 2) Mwilalaba ukuti Yesu afwilile ababembu abalapila. Kanshi nga twamona ukuti ifyo tucitile nafibipa sana, tatulingile ukuleka ukulomba Yehova ukuti aletwelela. Nga tatulemulomba ukuti aletwelela kuti caba kwati tulekaana ukusamba iminwe iili ne fiko. Ala tulatasha sana Yehova pa kutupeela  icilubula icalenga ukuti tuleba ifibusa fyakwe nangu ca kuti tatwapwililika!—Belengeni 1 Timote 1:15.

8. Mulandu nshi tulingile ukulaesha na maka ukuleka ukucita fimo ifyatwafya ukuleka?

⁸ Kwena tatulingile ukusuulako fye ku filubo fyesu nelyo ukulafwaya umwa kubepekesha nga twalufyanya. Yehova alitweba ifyo abantu abo afwaya ukuba ifibusa fyakwe balingile ukuba. (Amalumbo 15:1-5) Kanshi nga tulefwaya ukupalama sana kuli ena, tulingile ukutwalilila ukumupashanya e lyo no kulapashanya Umwana wakwe. Tulingile no kulaesha ukukanaba no lunkumbwa lwa kucita ifyabipa, nalimo kuti twaleka fye no kuba na ulo ulunkumbwa. Nangu ca kuti palipita inshita iikalamba ukutula apo twabatishiwilwa, tulingile ukutwalilila ukuwamyako imibele yesu.—2 Abena Korinti 13:11.

9. Twaishiba shani ukuti tulingile ukutwalilila ukufwala ubuntu bupya?

⁹ Umutumwa Paulo aebele Abena Kristu ati: “Mwasambilishiwe ukuti mufuule ubuntu bwa kale ubwalingana ne mibele yenu iya kale kabili ubuleonaika pamo no lunkumbwa lwa buko ulwa bucenjeshi; no kuleka ukutontonkanya ifya kale lelo ukulatontonkanya ifipya, no kuti mufwale ubuntu bupya ubwalengelwe ukulingana no kufwaya kwa kwa Lesa mu bulungami bwa cine na mu cishinka.” (Abena Efese 4:22-24) Ici cilepilibula ukuti tulingile ukubombesha pa kuti twaluke no ‘kufwala ubuntu bupya.’ Kanshi nangu ca kuti kale twatendeka ukubombela Yehova, kuti twatwalilila ukusambilila na fimbi pa mibele yakwe. Baibolo nayo kuti yatwafwa ukwalula ubumi bwesu no kulatontonkanya nga Lesa.

10. Finshi tulingile ukucita pa kuti Icebo ca kwa Lesa citwalilile ukutwafwa ukwaluka, kabili mepusho nshi ayo tulingile ukuyipusha?

¹⁰ Bonse tulafwaya ukulacita ifyo Baibolo ilanda. Lelo tulingile ukubombesha nga tulefwaya ukutwalilila ukwaluka. Mulandu nshi uo tulingile ukubombesesha? Bushe Yehova te kuti acitepo fimo pa kuti ciletwangukila ukulacita ifisuma?

11-13. Mulandu nshi Yehova afwaila ukuti tulebombesha pa kulwisha ulunkumbwa lwa kucita ifyabipa?

¹¹ Nga twatontonkanya pa muulu ne sonde e lyo na pali fyonse ifya bamo, tatutwishika no kutwishika ukuti Yehova alikwata amaka ya kucita icili conse. Ku ca kumwenako, alipanga akasuba. Akasuba kalikwata amaka icine cine. Cila sekondi akasuba kalafumya ulubuto ulwingi nga nshi e lyo ne cikabilila. Pa kuti ifya mweo fitwalilile ukubako pano isonde, lubuto fye ulunono sana ne cikabilila e fikabilwa. (Amalumbo 74:16; Esaya 40:26) Yehova na kabili alapeela ababomfi bakwe amaka ilyo baleyakabila. (Esaya 40:29) Ukwabula no kutwishika, Yehova  nga alefwaya, kuti atupeela amaka ya kuleka ukucita fimo ifyatwafya ukuleka no kuleka ukuba no lunkumbwa lwa kucita ifyabipa. Nomba mulandu nshi ashicitila ifi?

¹² Yehova alitupeela amaka ya kuisalila ifya kucita. Afwaya ukuti tuleisalila fwe bene nampo nga kumumfwila nelyo iyo. Nga twasalapo ukumumfwila kabili tuleesha no kucita ifyo afwaya, tulanga ukuti twalimutemwa no kuti tulafwaya ukumusekesha. Lelo Satana ena atila Yehova talinga ukuba kateka. Nomba nga tuleumfwila Yehova, tulanga ukuti e o tufwaya ukuti abe Kateka wesu. Kabili tatulingile ukutwishika ukuti Shifwe wesu uwatutemwa, alatemwa nga amona ifyo twesha na maka ukumumfwila. (Yobo 2:3-5; Amapinda 27:11) Nga tulebombesha ukuleka ukucita fimo ifyatwafya ukuleka, ninshi tuli ba cishinka kuli Yehova kabili tufwaya ukuti aletuteka.

¹³ Yehova atweba ukuti tulingile ukubombesha pa kuti tulemupashanya. (Abena Kolose 3:12; belengeni 2 Petro 1:5-7.) Na kabili enekela ukuti tuleesha apapela amaka yesu ukuleka ukutontonkanya pa fyabipa no kukanacita ifyo imitima yesu ifwaya. (Abena Roma 8:5; 12:9) Nga twabombesha ukwaluka e lyo twaleka no kucita ifyabipa, tukaba sana ne nsansa.

14, 15. Finshi tufwile ukulacita pa kuti tukwate imibele iyo Yehova atemwa? (Moneni akabokoshi akaleti, “Baibolo ne Pepo Fyalyalula Ubumi Bwabo.”)

¹⁴ Cinshi tufwile ukulacita pa kuti tukwate imibele iyo Yehova atemwa? Mu nshita ya kulaisalila fwe bene umo tulingile ukwaluka, tulingile ukuleka Lesa aletutungulula.  Pa Abena Roma 12:2 patila, “Mwipalana no bwikashi buno, lelo mupilibuke pa kwalula amatontonkanyo yenu, pa kuti mushininkishe mwe bene ico Lesa afwaya, icisuma, icapokelelwa kabili icapwililika.” Pa kuti twishibe ifyo Yehova afwaya, tulingile ukushintilila pa kwafwa kwakwe. Tulingile ukulabelenga Baibolo cila bushiku, ukulatontonkanya pa fyo tulebelenga, e lyo no kulapepa kuli Yehova ukuti aletupeela umupashi wakwe uwa mushilo. (Luka 11:13; Abena Galatia 5:22, 23) Nga tulecita ifi, Yehova akatwafwa ukwishiba ifimusekesha, kabili tukalatontonkaya nge fyo atontonkanya. Ne ci cikalenga ifyo tutontonkanyapo, ifyo tulanda e lyo ne fyo tucita fikalesekesha Yehova, e lyo tukeshiba ne fyo twingacita pa kuleke ukucita fimo ifyatwafya ukuleka. Nangu ni lintu twacita ifi twalandapo tulingile ukutwalilila ukucita ifingalenga twayaluka.—Amapinda 4:23.

¹⁵ Ukulunda pa kubelenga Baibolo cila bushiku, tulingile ukulasambilila Baibolo ukubomfya impapulo shesu pamo nga, Ulupungu lwa kwa Kalinda na Loleni! Ifipande ifingi ifiba muli aya ama magazini filatusambilisha ifyo twingaba ne mibele iyo Yehova akwata, e lyo ne fyo twingacita pa kuleka imisango iyabipa iyatwafya ukuleka. Ilyo tulebelenga aya ama magazini kuti twasangamo ifipande nelyo amalembo ayengatwafwa sana. Kuti twasunga ifi fipande nelyo amalembo pa kuti tulebelengamo lyonse.

16. Mulandu nshi tushilingile ukufuupwilwa nga ca kuti tatuleyaluka bwangu?

 ¹⁶ Palapita inshita pa kuti tukwate imibele iyo Yehova akwata. Kanshi nga mulemona kwati tamwayaluka sana nge fyo mwalefwaya, mulingile ukutekanya. Nalimo pa kubala kuti muleipatikisha ukulakonka ifyo Baibolo ilanda. Lelo nga mwatwalilila ukutontonkanya no kucita ifintu ukulingana ne fyo Yehova afwaya, cikamwangukila ukulatontonkanya nge fyo atontonkanya e lyo mukalacita ifisuma.—Amalumbo 37:31; Amapinda 23:12; Abena Galatia 5:16, 17.

17. Fisuma nshi twingenekela ku ntanshi nga ca kuti twatwalilila ukuba aba cishinka kuli Yehova?

¹⁷ Tulafwaisha ukwisaikalako pa nshita ilyo tukapwililika no kulabombela Yehova ku ciyayaya. Pali iyo nshita tatwakabe ne misango yabipa iyo tukalafwaya ukuleka kabili tacakatwafye ukulapashanya Yehova. Lelo pa mulandu wa kuti Yehova alitupeela icilubula, na pali ino ine nshita alitusuminishisha ukulamupepa. Nangu ca kuti tatwapwililika, kuti twacita ifingamusekesha nga twatwalilila ukwesha na maka ukwaluka no kulakonka ifyo atusambilisha muli Baibolo.

18, 19. Kuti twashininkisha shani ukuti Baibolo yalikwata amaka ya kutwalula?

¹⁸ Ba Kevin balisambilile ifya kucita pa kuti belakalipa bwangu. Baletontonkanya sana pa fyo balebelenga mu Baibolo kabili balibombeshe pa kuti baaluke, batendeke no kukonka ifyo Abena Kristu banabo balebapandako amano. Nangu ca kuti palipitile imyaka pa kuti ba Kevin baaluke, mu kuya kwa nshita balyalwike kabili balibasontele ukuba ababomfi batumikila. Nomba napapita ne myaka 20 ukutula apo babasontele ukuba baeluda. Na lyo line balishiba ukuti na pali ino ine nshita balingile ukutwalilila ukwaluka muli fimo.

¹⁹ Na ifwe bene tulingile ukulamyako imibele yesu nga filya fine ba Kevin bacita. Nga twacita ifi, tukatwalilila ukupalama kuli Yehova. (Amalumbo 25:14) Na kabili nga tuleesha na maka ukwaluka pa kuti tulesekesha Lesa, na o akalatwafwa ukwaluka. Nga twamona ifyo tuleyaluka tulashininkisha ukuti Baibolo yalitwalilila ukwalula ubumi bwesu.—Amalumbo 34:8.