Abafuuka Bakakwate Calo

BaJean-Marie Pelt, abaishiba sana ifyo abena France bekala, balandile ukuti: “Ndatontonkanyapo ukuti inshita imo, ububumbo bukalengwa cipya cipya kabili bukaba nge fyo bwali kale. . . . Ici tacakacitike nomba line, lelo cikacitika ku nshita iya ku ntanshi sana, ilyo imyulu ipya ne calo cipya fikabako.”

APANTU ukonaulwa kwa mpanga no mushili ne mikalile pe sonde kwalenga abantu ukuba abasakamana, abengi kuti batemwa sana ukumona isonde lyasanguka paradaise. Nangu cibe fyo, ukufwaya ukuti isonde libe paradaise takwakuma fye abantu ba muli uno mwanda wa myaka uwalenga 21. Kale sana, Baibolo yalisobele pa lwa kubweshiwa cipya cipya ukwa Paradaise pano isonde. Yesu alandile amashiwi ayaba mu Malembo yamo ayaishibikwa sana ayatila, “abafuuka . . . bakakwate calo” na ya kuti, “ukufwaya kwenu kucitwe pano nse nga mu muulu.” (Mateo 5:5; 6:10, Baibolo wa Cibemba uwa mu 1956) Nomba, pali lelo te bengi abasumina ukuti kukaba paradaise umukekala abantu abafuuka. Abengi abaita ukuti Bena Kristu, balileka no kutontonkanya ukuti kukaba paradaise.

Magazini ya ciFrench iifuma cila mulungu iya La Vie yalondolola umulandu abengi abapepa kwi Calici lya baKatolika balekela ukusumina ukuti kukaba paradaise, pano isonde nelyo ku muulu, yatila: “Pa myaka 1,900 baKatolika balesambilisha sana pali paradaise. Lelo pali nomba balileka ukulanda pali paradaise pa nshita ya kufunga, mu mapepo ya pa Mulungu, mu masukulu ya mapepo, na mu masukulu ya bakatekishi.” Batila ishiwi line ilya kuti paradaise “bwile, lyalyafya ukumfwa umo lyalola.” Bashimapepo bamo tabafwaya fye no kulilandapo pantu “lilosha sana ku kuba ne nsansa pano calo.”

Ukulingana na baFrédéric Lenoir, abasambilila pa mikalile kabili abaishiba bwino amapepo, ishiwi line ilya kuti paradaise nomba lyaba fye “ilya munsaunte.” Nangu fye ni baJean Delumeau abasambilila amalyashi ya kale kabili abalemba ifitabo ifingi pali paradaise, batontonkanya ukuti ukusesema kwa mu Baibolo kukafikilishiwa fye mu mampalanya. Balemba ukuti: “Ifyo Abena Kristu basuminamo filasuka ici cipusho ca kuti, ‘Finshi abantu bacili basumina pali Paradaise?’ Basumina ukuti: Apo Umupusushi wesu alibuuka, bushiku bumo tukekatana pamo no kumona uko ifyo twasubila filefikilishiwa.”

Bushe ubukombe bwa kuti isonde likasanguka paradaise bucili bwalicindama? Cinshi icikacitika kwi sonde ku ntanshi, bushe kwaliba isubilo line line? Icipande cikonkelepo calayasuka ifi fipusho.