AMEPUSHO YA MU BAIBOLO YA-ASUKWA
AMEPUSHO YA MU BAIBOLO YA-ASUKWA
Bushe Lesa kuti atwelela imembu?
Baibolo itila abantu bonse babembu. Tulabembuka pantu umufyashi wesu uwa kubalilapo, Adamu alibembwike. E mulandu wine inshita shimo tucitila ifyabipa ifyo limo tulanguluka ukuti kanshi nga tatwacificita. Yesu Kristu Umwana wa kwa Lesa, alitufwilile pa kuti atulubule ku lubembu. Icilubula apeele cilalenga Lesa ukutwelela imembu. Ici icilubula bupe ubwafuma kuli Lesa.—Belengeni Abena Roma 3:23, 24.
Bamo balicita imembu ishabipisha kabili bamona kwati Lesa te kuti abelele. Lelo Icebo ca kwa Lesa citila: “Umulopa wa kwa Yesu Umwana wakwe ulatusangulula ku lubembu lonse.” (1 Yohane 1:7) Nangu imembu shesu shibipe shani, Yehova kuti atwelela, cikulu fye natulapila.—Belengeni Esaya 1:18.
Finshi tufwile ukucita pa kuti Lesa atwelele?
Nga tulefwaya ukuti Yehova Lesa atwelele, tufwile ukusambilila pali ena pa kuti twishibe imibele yakwe, tuleumfwila amafunde yakwe no kucita ifyo afwaya. (Yohane 17:3) Yehova alelela abalapila kabili abaleka ukucita ifyabipa.—Belengeni Imilimo 3:19.
Ukucita ifingalenga ukuti Lesa atutemwe takwayafya sana. Yehova alishiba ukuti tatwapwililika. Wa cikuuku kabili wa luse. Bushe ifi Lesa aba ne cikuuku, tacilenga mwafwaisha ukusambilila na fimbi pali ena pa kuti mulecita ifyo afwaya?—Belengeni Amalumbo 103:13, 14.
Nga mulefwaya ukwishibilapo na fimbi, belengeni icipandwa 5 muli ici citabo, Bushe cinshi Baibolo Isambilisha?, icalembwa ne Nte sha kwa Yehova
Nalimo Kuti Mwatemwako ne fi
ULUPUNGU LWA KWA KALINDA
Bushe Mulacita Ifyo Lesa Amweba?
Ukumfwila Lesa kwalicindama, lelo kwaliba na fimbi ico tufwile ukucita pa kuti tube ifibusa fyakwe.
ULUPUNGU LWA KWA KALINDA
Bushe Kuti Twasekesha Lesa
Ifilubo fyabipisha ifyo Yobo, Lote na Davidi bacitile filalanga ifyo Lesa enekela kuli ifwe.
