Elenganyeni ukuti umufyashi umwaume alelanshanya no mwana wakwe uwa myaka 7. Amweba ukuti, “Kale sana, Lesa apangile icalo na fyonse ifyabamo, kabili apangile na kasuba, umweshi, ne ntanda.” Umwana atontonkanyapo e lyo aipusha ukuti, “Tata, bushe nani uwapangile Lesa?”

Bawishi ba-asuka abati, “Takwaba uwapangile Lesa. Ena e ko aba ukutula fye na kale.” Apo acili mwaice, umwana kuti aumfwa ici casuko ukwabula ukwipushishapo amepusho na yambi. Lelo, ilyo aya alekula, kuti akwatilapo amepusho na yambi. Kuti camukosela ukusumina ukuti takwaba uwapangile Lesa. Pantu na kuba, ifintu fyonse ukubikako ne fya mu muulu, kwaliba uwafipangile. E co kuti alaipusha ukuti, ‘Ni kwi Lesa afumine?’

Bushe Baibolo yasuka shani ici cipusho? Yasuka fye nga filya fine umufyashi muli ici ca kumwenako acasuka. Mose alembele ukuti: “Mwe Yehova, . . . ilyo tashilafyalwa impili, nangu ilyo tamulabumba isonde na pano calo, ukufuma umuyayaya no kuya umuyayaya ni mwe Lesa.” (Amalumbo 90:1, 2) Kasesema Esaya na o asosele ukuti: “Bushe tawaishiba nelyo bushe tawaumfwa? Yehova, Kabumba we sonde lyonse, ni Lesa umuyayaya”! (Esaya 40:28) Kalata ya kwa Yuda nayo ilanda pali Lesa ukuti e ko aba “ukufuma ku nshita pe.”—Yuda 25.

Aya malembo yalanga ukuti Lesa ni “Mfumu ya muyayaya,” nga filya fine umutumwa Paulo amulondolwele. (1 Timote 1:17) Ici cipilibula ukuti Lesa e ko aba ukutula umuyayaya, kabili akatwalilila fye ukubako. (Ukusokolola 1:8) Kanshi ni Lesa fye Uwa Maka Yonse e wabako umuyayaya.

Mulandu nshi tufililwa ukumfwikishisha ici cishinka? Mulandu wa kuti twikala fye imyaka iinono, e calenga tulefilwa ukumfwikisha ifyo Yehova amona inshita. Pa mulandu wa kuti Lesa abako umuyayaya, kuli ena imyaka 1,000 yaba fye ngo bushiku bumo. (2 Petro 3:8) Natulangilile: Bushe icipaso iciba fye no mweo pa nshiku 50, kuti caumfwikisha nga twalanda pa myaka 70 nelyo 80 iyo twikala? Awe nakalya! Lelo, nga twailinganya kuli Kabumba wesu Uwakulisha, Baibolo ilondolola ukuti twaba fye nge fipaso. Na matontonkanyo yesu te kuti tuyalinganye ku yakwe. (Esaya 40:22; 55:8, 9) E co te kuti tupape ukuti kwaliba fimo ifyo fwe bantu tufilwa ukumfwikisha pali Yehova.

Nangu ca kuti tulafilwa ukumfwikisha nga twalanda ukuti Lesa abako umuyayaya, lelo nga twatontonkanyapo tulamona ukuti mwaliba amano. Nga kwali uwabumbile Lesa, ninshi uyu e wingaba Kabumba. Nomba Baibolo ilondolola ukuti, Yehova e ‘wabumbile ifintu fyonse.’ (Ukusokolola 4:11) E lyo twalishiba ukuti kwali inshita ilyo ifya mu muulu fishaliko. (Ukutendeka 1:1, 2) Bushe fyafumine kwi? Pa kuti fibeko, Kabumba wafiko alingile ukubako intanshi. Kabili e ko ali ilyo Umwana wakwe uwafyalwa eka na bamalaika bashilabako. (Yobo 38:4, 7; Abena Kolose 1:15) Kanshi, pa kubala Kabumba e ko ali eka fye. E ico, te kuti bamupange; pantu takwali uuli onse uwaliko uwa kumupanga.

Ukubapo kwesu, ukubikako ne fya mu muulu, filanga ukuti Lesa wa muyayaya e ko aba. Uulenga ifya mu muulu ukulaenda, uwabikileko amafunde ayo fikonka, ninshi e ko ali ukutula na kale, kabili e lyo engapeela umupu wa bumi muli fyonse ifipeema.—Yobo 33:4.