Amasuko ku Mepusho ya mu Baibolo
Cinshi mu Baibolo mwabela amasesemo?
Mulandu nshi baibolo yalandila pa filecitika muno nshiku?—Luka 21:10, 11.
Mu Baibolo mwaliba amasesemo ayengi. Takwaba umuntu uwingeshiba ifikacitika ku ntanshi. E ico, amasesemo ayalembwa mu Baibolo ayafikilishiwa yalenga twashininkisha ukuti Baibolo Cebo ca kwa Lesa.—Belengeni Yoshua 23:14; 2 Petro 1:20, 21.
Amasesemo aya mu Baibolo ayafikilishiwa kale, yalalenga twacetekela sana Lesa. (AbaHebere 11:1) Aya amasesemo yalenga twacetekela no kuti ifyo Lesa atulaya pa fyo icalo cikaba ku ntanshi, fikacitika. Kanshi amasesemo ayalembwa mu Baibolo yalalenga twakwata isubilo.—Belengeni Amalumbo 37:29; Abena Roma 15:4.
Bushe amasesemo ayalembwa mu Baibolo yatwafwa shani?
Amasesemo yamo ayalembwa mu Baibolo yalasoka ababomfi ba kwa Lesa ukucitapo cimo. Ku ca kumwenako, ilyo Abena Kristu abaliko mu nshita ya batumwa bamwene uko amasesemo yamo yafikilishiwe, balifulumwike mu Yerusualemu. Ilyo uyu umusumba waonawilwe pa mulandu wa kuti abantu abengi balikeene Yesu, Abena Kristu bena bali ku cifulo icacingililwa.—Belengeni Luka 21:20-22.
Na muno nshiku mwine, amasesemo ayafikilishiwa yalanga ukuti Ubufumu bwa kwa Lesa nomba line bukafumyapo ama bufumu ya bantunse. (Daniele 2:44; Luka 21:31) Kanshi bonse tufwile ukucitapo cimo pa kuti Yesu Kristu, Imfumu iyo Lesa asala, akatumone ukuti tuli ba kaele.—Belengeni Luka 21:34-36.
