Mu mpanga ya Amazon mu South America iyabela ukutali na ku misumba umwaba abantu abengi, mwaliba abantu aba mitundu iyalekanalekana, abalanda indimi ishalekanalekana, kabili abafuma ku fyalo ifyalekanalekana. Kanshi mu July mu 2017 Inte sha kwa Yehova abali 13 balimine ubulendo ukulungama ku ntulo ya mumana wa Maroni, e lyo na ku tumimana utunono utupoosa amenshi muli uyu mumana utwaba mu calo ca French Guiana. Finshi baile mu kucita? Baile mu kubila imbila nsuma ku bantu abekala mu lulamba lwa mumana.

 Ilyo kwashele umweshi umo ukuti batendeke ubu ubulendo ubwali no kusenda inshiku 12, bonse abali no kuya pali ubu ubulendo balikumene pa kuti bapekanye ubulendo. Ba Winsley batile: “Twalisambilile ifyo kuli ilya ncende kwaba e lyo na pa lyashi lya kale ililanda pali ilya ncende. Kabili twalilanshenye na pa fyo twali no kuipekanishisha ubulendo.” Bonse abali mu kuya pali bulya bulendo balibapeele umwa kusendela ifya kulaalapo ne fyandaluwa fya kuicingilila kuli ba mung’wing’wi. Pali ubu ubulendo bali no kunina indeke imiku ibili e lyo no kwenda ama-awala ayengi mu tumato utunono.

 Bushe abo basalile ukuya pali ubu ubulendo baumfwile shani? Ba Claude na ba Lisette abali ne myaka mupepi na 65 tabaikete na ku cani, balisumine ukuya pali ubu bulendo. Ba Claude batile: “Nalefwaisha sana ukuya, lelo naleumfwa no mwenso. Nalyumfwile ifingi pa mimana iyabako iya-afya nga nshi kabili iyaba no mukuku.” Ba Lisette nabo batile: “Nalisakamikwe pa fyo nali no kuya mu kulanda indimi sha ciAmerindian.”

 Ifi fine e fyo na ba Mickaël abali pa baile pali ubu bulendo nabo baumfwile. Batile: “Tatwaishibe ifingi pa bantu abalanda iciWayana, kanshi nalibomfeshe Intaneti pa kuti nsambilileko amashiwi yamo aya mu ciWayana na pa kuti njishibe ifyo baposha muli ulu lulimi.”

 Ba Shirley abaile pamo na balume babo ba Johann pali ubu bulendo balilembele indimi isho abekala mu lulamba lwa mumana balanda. Batile: “Twalikopolwele amavidio pa jw.org mu ndimi ishingi isho balanda kabili twalishitile ne citabo umwali amashiwi ya kutendekelapo ukusambilila iciWayana.”

 Pali Cibili pa 4 July, ili ibumba lyalininine ndeke mu Saint-Laurent du Maroni no kuya kwi tauni ilinono ilyaba mu kati sana aka calo ca French Guiana.

 Pa nshiku 4 ishakonkelepo ili ibumba lyalibilile imbila nsuma ku bantu ba mu mishi iyaba mupepi ne mimana iyapaasuka mu mumana wa Maroni. Aba aba bwananyina balebomfya utumato utunono utwa injini uto beta ukuti pirogues. Ba Roland abali pali ili ibumba batile: “Abantu abalanda indimi sha ciAmerindian balitemenwe sana ukulanshanya nabo ifya mu Baibolo. Balikwete sana amepusho kabili abengi balefwaya ukuti tutendeke ukusambilila nabo Baibolo.”

 Mu mushi umo, ba Johann na ba Shirley bakumene na baupana abashilakokola mu cupo, kabili tapakokwele ukufuma apo lupwa wa aba abaupana ayipaile. Ba Johann batile: “Twalibatambishe vidio itila A Native American Finds His Creator.” Iyi vidio yaba pa JW Broadcasting. Kabili batile: “Aba abaupana balitemenwe sana ifyo batambile muli iyi vidio. Balitupeele adresi yabo iya email pantu balefwaya ukuti tukatwalilile ukulanshanya nabo.”

 Ukwalepele sana uko bailefika ukulola ku ntulo ya mumana ni ku mushi wa Antécume Pata. Bafikile kuli ulya mushi ninshi nabanaka. Kabili Imfumu ya muli ulya mushi yalisuminishe balya ba Nte ukupekanya apa kuti batushishe ukubomfya ifya kulaalapo ifyo basendele. Balisambile na mu mumana nga fintu abekala mushi balecita.

 Ilyo ili ibumba lyafumine kuli ulya mushi lyaile ku mushi wa Twenké, uko lyailesanga abekala mushi baleloosha. Ba Éric abali pa balepekanya ubu bulendo batile: “‘Bashikulubantu,’ imfumu ya muli ulya mushi, balitusuminishe ukuya mu kusansamusha abantu mu mushi. Imfumu no lupwa lwaiko balitemenwe sana ifyo twababelengele ukufuma muli Baibolo ya ciWayana. Twalibatambishe na mavidio ayalanda pa fyo Baibolo yatulaya ukuti kukaba ukubuuka.”

 Aba aba bwananyina balimine ne ndeke ukufuma ku Maripasoula kabili balyendele amamineti 30 ne ndeke ukulola ku masamba ya mumana no kuya kwi tauni ilinono ilya Grand-Santi. Pali Cibili na pali Citatu, aba aba bwananyina balishimikile abantu ba kuli ilya ncende imbila nsuma ya mu Baibolo. Lyena pali Cine, balimine ubulendo kabili baendele ama-awala 5 na hafu ukulola ku masamba ya mumana wa Maroni, kabili bailefika ku mushi wa Apatou.

 Ilyo kwashele ubushiku bumo ukuti bapwishe ubu bulendo, aba aba bwananyina baile ku mishi ya bantu beta ukuti ba Maroon, e kutila abantu abatuntuka ku bena Africa abo balesenda ukuba abasha mu South America, pa nshita lintu icalo ca Suriname icaba mupepi ne calo ca French Guiana caletekwa na basungu. Balya ba Nte balitile abekala mushi bonse ukwisasangwa ku kulongana muli ilya mpanga, ukwabelele mwi tenti ilikalamba ilyo batanike. Ba Claude batile: “Twalitemenwe nga nshi ilyo twamwene abantu abengi baisasangwa kuli kulya kulongana, nangu ca kuti twabetile fye lulya lwine lucelo!” Ba Karsten abo wali e muku wa kubalilapo ukuya pa bulendo bwa musango uyu balilandile ilyashi lya ku cintubwingi mu ciAukan ilyaleti “Bushe Ubu e Bumi Bweka Bwabako?” Abantu 91 ukufuma mu mishi yalekanalekana balishile kuli uku kulongana.

 Mukulekelesha ili ibumba lyalibwelelemo ku Saint-Laurent du Maroni. Bonse abali muli ili ibumba bali sana ne nsansa pantu abantu basangile uko baile mu kushimikila balefwaya sana ukumfwa imbila nsuma, balipokele impapulo ishingi kabili balitambile amavidio ayengi ayo Inte sha kwa Yehova shapanga.

 Ba Lisette batile: “Nshishibe na mashiwi ningabomfya pa kulondolola insansa nkwete pali ifi naile pali ubu bulendo.” Ba Cindy na bo balisuminisheko ifyo ba Lisette balandile, batile: “Nga balinjebele ukuya pa bulendo bwa musango uyu na kabili, te kuti njikate na ku cani. Nga ca kuti mwaya pa bulendo bwaba nga ubu, e lyo mwingeshiba bwino insansa nkwete.”

 Ifisuma ifyacitike ilyo bali pali ubu bulendo fyalengele bamunyinefwe na bankashi bamo bafwaye ukubwelelako na kabili. Ba Mickaël balandile abati: “Natuipekanya ukubombako uyu mulimo na kabili!” Ba Winsley balikuukila ku Saint-Laurent du Maroni. Kabili ba Claude na ba Lisette bonse babili abali ne myaka mupepi na 65 basalilepo ukukuukila ku Apatou.