?Ol Witnes Blong Jehova Oli Bilif Long Oltesteman?

PLEI

Yes. Ol Witnes blong Jehova oli bilif se ful Baebol i “kamaot long God fastaem. Hem i putum long tingting blong ol man ya bifo, nao oli raetem long buk. Ol tok ya i stret gud.” (2 Timoti 3:16) Hemia i min se oli bilif long tufala haf blong Baebol we plante taem ol man oli kolem se, Oltesteman mo Niutesteman. Plante taem, ol Witnes blong Jehova oli kolem tufala haf ya se Hibru haf blong Baebol mo Kristin Grik haf blong Baebol. Long rod ya, mifala i no givim tingting long ol man se i gat sam haf blong Baebol we oli no moa stret long taem blong yumi.

?From wanem ol Kristin oli nidim Oltesteman mo Niutesteman?

Tabu spirit i pulum aposol Pol blong i raetem se: “Olgeta tok ya we oli raetem long Baebol bifo, oli raetem blong tijim yumi.” (Rom 15:4) Taswe, i gat plante samting long Hibru haf blong Baebol we oli save givhan long yumi. Mo tu, haf ya i tokbaot ol impoten samting we oli hapen bifo mo i givim ol advaes we oli save givhan long yumi.

Ol impoten samting we oli hapen bifo. Hibru haf blong Baebol i tokbaot evri samting we i hapen taem God i mekem olgeta samting long heven mo wol, mo taem fas man mo woman tufala i mekem sin. Sipos i no gat ol save ya, bambae yumi no save ansa blong ol kwestin olsem: ?Yumi kamaot long weples? ?From wanem ol man oli stap ded? (Jenesis 2:7, 17) Mo tu, Hibru haf blong Baebol i tokbaot ol samting we Jehova i mekem long ol man bifo. Ol man ya oli glad mo oli fesem ol hadtaem olsem yumi nomo.—Jemes 5:17.
Ol advaes we oli save givhan long yumi. Buk blong Ol Proveb mo Prija oli stap long Hibru haf blong Baebol. Ol buk ya oli tokbaot plante waestok we oli stret long laef blong ol man. Oli givim advaes we i save mekem famle i glad (Ol Proveb 15:17), advaes blong man i gat stret tingting long saed blong wok (Ol Proveb 10:4; Prija 4:6), mo advaes long ol yangfala, blong oli yusum gud yangtaem blong olgeta (Prija 11:9–12:1).

Mo tu, sipos yumi stadi long Loa blong Moses we i stap long ol faef buk we Moses i raetem, samting ya i save givhan long yumi. I tru se ol Kristin oli no moa stap aninit long Loa ya. Be nating se i olsem, i gat plante gudfala tijing long ol loa ya we oli save givhan long yumi blong yumi gat wan laef we i hapi.—Levitikas 19:18; Dutronome 6:5-7.