Long ol las dei ya, yumi ekspektem se bambae “i gat ol faet mo . . . nius blong ol faet.” (Matiu 24:6) Be taem faet i kamaot long wan ples, ol brata mo sista oli kasem help we oli nidim. 2022 Hed Kampani Apdet N. 3 i tokbaot bigfala wok we i gohed long Is Yurop blong givhan long olgeta we oli stap safa from wo long Yukren. ?Olsem wanem ol brata mo sista oli kasem help, taem wo i stap gohed raonabaot long olgeta? ?Wanem tingting blong ol brata mo sista long Yukren, taem oli kasem help ya?

 Long 24 Februari 2022, wo i stat long Yukren, mo long sem dei, Komiti Blong Ol Kodineta i agri blong spenem wan amaon blong mane blong halpem ol brata mo sista long Yukren. Kwiktaem nomo, branj ofis blong Yukren i stat blong pem ol samting we i stap yet long ol stoa long kantri ya, mo givimaot tru long ol 27 Disasta Rilif Komiti we oli putumap.

 Blong givhan moa, ol brata long Wol Hedkwota Blong Ol Witnes Blong Jehova oli traem faenemaot wanem we oli save mekem blong halpem ol brata mo sista long Yukren. Komiti Blong Ol Kodineta mo Pablising Komiti i askem long Dipatmen Blong Pem Ol Samting Long Hedkwota, blong oli wok wetem sam brata long branj ofis blong Yukren mo Polan, blong mekem plan. Sam brata long tufala branj ofis ya we oli wok long Dipatmen Blong Pem Ol Samting, Sanemaot, mo Ligol Dipatmen, wetem wan brata blong Branj Komiti blong Yukren, mo samfala we oli wok long Dipatmen Blong Pem Ol Samting Long Hedkwota, oli mekem miting evri dei blong tokbaot wok ya.

 Jay Swinney, we i wok long Dipatmen Blong Pem Ol Samting Long Hedkwota, i talem se: “Fastaem mifala i mas faenemaot samting we oli nidim. Mifala i wantem givim ol kakae we ol brata long Yukren oli laekem, mo ol narafala samting olsem. Be blong faenemaot wanem we oli nidim, hemia i wan haf blong problem nomo. Mifala i mas faenemaot tu olsem wanem blong tekem ol samting ya i go long Yukren long fasin we i sef mo i kwik, taem wo i stap gohed.”

 Long 9 Maj 2022, ol brata oli save finis wanem we ol brata mo sista long Yukren oli nidim. Oli nidim kakae olsem tin mit mo tin fis, wit, raes, mo ol bin, wetem ol samting olsem sop mo toelet pepa. Oli faenemaot se ol samting ya we wan man bambae i nidim blong fo wik, praes blong hem i samting olsem 7,500 vatu. From we i gat plante taosen brata we oli nidim help, Komiti Blong Ol Kodineta i agri blong spenem bigfala mane blong pem ol samting ya. ?Be olsem wanem ol brata oli save givimaot olting long fasin we i sef?

 Long 13 Maj, tu brata blong Polan i tekem wan kameong we i fulapgud, i aot long branj ofis long Polan i go kasem wan dok klosap long Lviv, Yukren. Tufala i wantem luk sipos i sef blong mekem trip olsem. Long ol dei bifo long trip ya, samfala we oli wok long branj ofis blong Polan mo Yukren, oli givhan long tufala brata ya blong rerem ol samting. Branj ofis i mekem ol pepa we oli nidim blong krosem boda, mo oli meksua se oli makem klia long kameong se oli stap karem help i go. Mo tu, oli wok wetem ol lokol brata long Yukren blong faenemaot wanem rod i kwik moa afta we oli krosem boda. From we oli rere gud olsem, mo Jehova i blesem wok ya, i no tekem 24 aoa blong olting long Lviv oli kasem ol Disasta Rilif Komiti, mo tufala brata i kambak sef long Polan.

 Evri samting i go gud long faswan trip ya, be ol samting we tufala brata ya i karem i no kasem wan tan. !I gat 200 tan yet i stap! ?Olsem wanem oli save karem mo givimaot ol samting ya kwiktaem?

 Taem ol brata mo sista long ol narafala ples long wol oli ridim ol ripot long jw.org long saed blong trabol long Yukren, oli wantem givhan long ol brata mo sista. Plante we oli stap longwe tumas, oli givim presen mane blong givhan long wok blong ol Witnes blong Jehova long fulwol. Oli save se oganaesesen bambae i yusum mane ya long beswan rod. Sam narafala we oli stap long ol kantri klosap, oli givim taem, paoa, mo ol samting blong olgeta, blong givhan. Hemia sam eksampol.

 Long Polan, plante volontia oli fulumap ol samting we ol brata oli nidim long plante taosen katon, mo ol pikinini oli mekem ol kad. Bartosz Kościelniak we i wok long branj ofis long Polan long Dipatmen Blong Pem Ol Samting, i talem se: “Plante taem finis mi ridim vas long Ol Sam 110:3, we i talem se ol man blong Jehova ‘bambae oli glad nomo blong kam joen’ long wok. Be taem mi luk wetem prapa ae blong mi ol handred volontia we oli kam kwik mo oli glad blong wok, mi jes luksave olsem wanem ol tok ya long Baebol oli tru tumas.”

 Wan Witnes blong Jehova we i gat wan kampani blong sanem ol samting i go long narafala kantri, hem i letem ol brata oli yusum ol kameong blong hem, mo i givim bensin fri nomo. Hem i talem se: “Hemia wan janis blong mi mi soemaot lav blong mi long ol brata mo long Jehova. Mi glad tumas blong givhan olsem.” !Hem i givim bitim 7,700 lita blong bensin i fri nomo, mo plante brata oli yusum taem mo paoa blong olgeta blong draevem ol kameong klosap 48,000 kilometa, blong karem olting i go!

 !Long 28 Maj, hemia 15 dei nomo afta long faswan trip, oli karem finis 100 tan blong kakae, sop, mo meresin, i go long Yukren! Hemia i hapen from we ol brata mo sista oli glad nomo blong wok, mo oli gat lav. From we plante oli givim ol samting i fri nomo, amaon blong presen mane we ol brata oli yusum blong pem ol samting, i no bigwan tumas. Kam kasem naoia, ol Witnes blong Jehova oli sanem bitim 190 tan blong ol kakae mo narafala samting blong givhan long Yukren. ?Wanem tingting blong ol brata mo sista we oli kasem help ya?

 Taem ol katon oli kasem Lviv, ol Disasta Rilif Komiti oli givimaot. Ol katon ya oli go long ol defren taon, we sam long olgeta oli 1,300 kilometa longwe long Lviv. Nating se ol brata oli wok had, be i tekem taem yet. a

 Markus Reinhardt, wan memba blong Branj Komiti blong Yukren, i talem se: “Long taem blong trabol ya, plante brata oli luk long prapa ae blong olgeta bigfala lav blong Jehova. Mo tu, oli luksave se i impoten blong folem gud ol advaes we oganaesesen i givim, bifo we disasta i hapen. Olsem nao, oganaesesen i givim advaes se i gud blong gat naf kakae mo wota long haos blong sam wik. Long saed blong advaes ya, wan elda long Kyiv we nem blong hem Anton, i talem se: ‘Oganaesesen blong Jehova i rerem yumi from ol bigfala trabol, mo yumi glad long samting ya. Kakae mo wota we mifala i gat, wetem wan radio, i sevem laef blong mifala.’ Mifala i glad tumas se ol brata oli obei long advaes ya, from we i givim taem long branj ofis blong i oganaesem ol help.”

 ?Wanem tingting blong ol brata mo sista taem oli kasem help ya? Mykola mo Zinaida, we oli stap long Kharkiv, tufala i talem se: “Lav blong yufala i tajem hat blong mitufala. Tangkiu tumas long kakae mo meresin we yufala i givim. I klia se han blong Jehova i no sot.” Valentyna we i stap long sem eria, i talem se: “Long stat blong faet kasem naoia, ol man oli mas wet long ol longfala laen blong pem ol samting long stoa. Mo plante taem stoa i no moa gat samting we oli nidim. Be Jehova i save mo i luk problem ya. !Hem i putumap ol brata blong karem ol katon i kam long haos, mo insaed long ol katon, i gat stret samting we mifala i nidim! Long hadtaem olsem, we yu ting se yu no moa gat hop, yu haremsave mo luksave spesel kea we Jehova mo oganaesesen blong hem i givim. . . . I gud tumas blong haremsave kea mo sapot we Jehova i givim taem yu nidim.”

 Yevhen, Iryna, mo Mykyta we oli ronwe long Mariupol, oli talem se: “Mifala i glad tumas long kea mo sapot we yufala i givim long famle blong mifala. Tru ya, i kam long stret taem nomo. !Fastaem, mifala i ting se ol katon oli fulap long olting nomo, be mifala i luksave se i gat lav blong yufala tu insaed!”

 I sua se yu luksave olsem wanem spirit blong Jehova i lidim gud ol man blong hem, we oli givim help ya long taem we i gat ‘ol faet mo nius blong ol faet.’ Wan narafala samting we i givhan bigwan, hemia ol presen mane we yufala i givim long wok we i stap gohed long fulwol, we plante long yufala oli givim tru long donate.dan124.com. !Mifala i talem tangkiu tumas!

Givim Help Kwiktaem Mo Long Fasin We i Sef

1. 24 Februari 2022: Komiti Blong Ol Kodineta i agri long wan amaon blong mane we bambae oli yusum blong givhan long ol brata mo sista long Yukren, nao branj ofis i save stat blong pem ol samting

2. 24 Februari–8 Maj 2022: Branj ofis blong Yukren i pem sam samting mo i yusum ol Disasta Rilif Komiti blong givimaot. Mo tu, branj ofis i rere blong kasem mo givimaot ol samting we ol brata blong Polan oli sanem

3. 9 Maj 2022: Komiti Blong Ol Kodineta i agri se ol brata oli karem ol samting i go long Yukren

4. 10–12 Maj 2022: Oli mekem plan blong faswan kameong we i karem ol kakae mo narafala samting i aot long Polan i go long Lviv, Yukren, blong luk sipos i sef blong yusum rod ya

5. 13 Maj 2022: Faswan kameong i aot long Polan i go long Lviv, Yukren

6. 14–16 Maj 2022: Long wan Haos Asembli klosap long Poznan, Polan, ol volontia blong Lokol Disaen/Konstraksen oli joen, blong fulumap kakae mo sop mo sam narafala samting olsem long ol katon

7. 17 Maj 2022: Fo dei afta we kameong i mekem faswan trip, oli stat blong karem 13 tan blong kakae mo ol narafala samting oli go long boda blong Yukren

8. 21–27 Maj 2022: Long sem fasin, ol narafala katon we oli stap rerem long Polan oli go long Yukren, mo oli givimaot long ol brata mo sista bifo we 24 aoa i pas

9. 28 Maj 2022: 20 dei afta we Komiti Blong Ol Kodineta i agri, oli karem finis 100 tan blong ol kakae, sop mo toelet pepa, mo meresin, i go long Yukren

 Kam kasem naoia, ol Witnes blong Jehova oli sanem bitim 190 tan blong olting i go long Yukren blong halpem ol brata mo sista.