Ol Witnes blong Jehova oli rili kea long ol brata mo sista blong olgeta we oli gat sem bilif. (1 Pita 2:17) Plante long yumi i harem olsem sista Tanis blong Kenia, we i se: “Mi laekem tumas blong save samting we i stap hapen long ol brata mo sista raon long wol.” ?Be olsem wanem Tanis mo ol narafala Witnes oli save ol samting ya? Stat long 2013, yumi kasem ol nius blong ol brata mo sista long jw.org long Inglis mo Franis, long seksen ya Newsroom.

 Long Newsroom, yu save faenem ol nius we oli tru long saed blong ol Witnes blong Jehova. Hemia ol nius olsem, taem Baebol i kamaot long wan defren lanwis, disasta rilif, ol konstraksen projek, mo ol narafala impoten samting. Mo tu, i tokbaot ol brata mo sista we oli stap long kalabus from bilif blong olgeta, mo ol naesfala ekspiriens long saed blong kampen blong prij mo Memoriol. ?Hu i faenem ol infomesen ya, mo oli rerem nius ya olsem wanem?

 Ofis blong Pablik Infomesen (OPI) nao i lukaot long Newsroom. Dipatmen ya i stap long hedkwota mo i wok aninit long Kodineta Komiti blong Hed Kampani. I gat bitim 100 brata mo sista we oli wok long OPI, olsem olgeta we oli raetem ol nius, mekem risej, tekem foto, mo transletem. Plante long olgeta ya oli ol volontia we oli stap long ol narafala ples. Samfala oli go toktok wetem ol man blong gavman, ol profesa, mo ol kampani we oli talemaot ol nius. I gat bitim 80 Pablik Infomesen Desk (PID) long ol branj ofis raon long wol, we oli givhan long OPI.

 Blong rerem wan nius, OPI i stap wok wetem PID. Taem ol brata ya oli harem wan nius, oli mekem risej mo lukaot ol infomesen we i tru. Oli mekem ol intaviu mo storian wetem ol man we oli gat bigfala save long saed ya. Afta, oli raetem stori blong hem, ridim bakegen, jenisim sam samting, putum ol foto, mo sanem i go long Kodineta Komiti blong oli agri long hem.

 ?Wanem tingting blong ol brata mo sista long saed blong Newsroom ya? Sheril, wan sista long Filipin, i talem se: “Blong statem dei blong mi, mi laekem tumas blong ridim nius long saed blong oganaesesen blong Jehova mo ol man blong hem.”

 Plante oli talem se jw.org Newsroom i defren long ol nius long televisen mo niuspepa. Tatiana long Kasakstan, i talem se: “Mi glad from mi save trastem ol nius long jw.org. Ol nius ya oli tru mo stret.” Wan sista long Meksiko, Alma, i talem se: “Ol nius we yumi harem long televisen o niuspepa, hem i rabis nius. Be ol nius long Newsroom i leftemap tingting bigwan.”

 Ol nius long Newsroom i tru, be i no hemia nomo, hem i mekem bilif blong yumi i strong tu. Bernard blong Kenia, i talem se: “Newsroom i givhan long mi blong tingbaot ol brata mo sista raon long wol olsem famle blong mi, nomata weples oli stap. Taem mi prea long Jehova, mi save yusum nem blong olgeta blong tokbaot ol trabol we oli fesem.” Sista Bybron blong Kenia, i talem se: “!Mi glad tumas taem mi ridim nius se Baebol i kamaot long wan narafala lanwis! Ol nius ya i mekem mi mi tingbaot se Jehova i no stap mekem i gud moa long samfala, i bitim ol narafala.”

 Ol nius long saed blong ol brata we oli kasem fasin agens, hemia tu i save leftemap tingting blong yumi. Jaklin blong Kenia, i talem se: “Taem mi tingbaot we ol brata mo sista ya oli no fraet mo oli gat strong tingting, hemia i mekem bilif blong mi tu i strong. Oltaem mi traem blong luksave wanem i givhan long olgeta blong stanap strong. Mi lanem se ol ‘isi’ samting nomo olsem prea, ridim Baebol mo singsing, oli impoten tumas blong givhan long olgeta blong stap strong.”

 Sista Beatris long Kosta Rika, i laekem ol nius long saed blong ol disasta. Hem i talem se: “Newsroom i soemaot long mi olsem wanem oganaesesen blong yumi i givim ol samting we ol brata oli nidim kwiktaem, long fasin we i oganaes gud, mo wetem lav. Hemia i mekem mi mi bilif moa se, hemia nao oganaesesen blong Jehova.”

 !Yumi glad tumas blong kasem ol laswan nius blong ol brata mo sista long fulwol! Samting ya i posibol nomo from we yufala i givim presen mane blong sapotem wok long fulwol, long ol defren rod, mo plante taem folem ol rod we donate.dan124.com i tokbaot. Tangkiu tumas long presen mane we yufala i givim long gladhat blong yufala.