!Bigfala asembli long 2020, hem i fas asembli we mifala i rikodem blong ol man long fulwol oli save wajem long Intenet! Be long Malawi mo Mosambik, bighaf blong ol brata mo sista oli no save yusum Intenet blong wajem asembli ya. ?Oli mekem olsem wanem?

 Kodineta Komiti mo Tijing Komiti blong Hed Kampani, oli agri se long Malawi mo Mosambik oli save putum program blong bigfala asembli long radio mo televisen. ?From wanem oli mekem olsem? Long Malawi, Intenet i sas moa i bitim klosap olgeta ples long wol, taswe smol namba blong ol Witnes nomo oli save yusum Intenet. Wilyam Jumbi, we i stap long Branj Komiti long Malawi, i talem se: “Ol brata mo sista oli save kasem ol gudfala samting long asembli ya long tufala rod nomo, hemia radio mo televisen.” Luka Sibeko, we hem tu i stap long Branj Komiti long Malawi, i talem se: “Sipos mifala i no save wajem o lesin long asembli long televisen o radio, sam brata nomo long branj teritori i save kasem ol gudfala samting long asembli ya.” Long Mosambik tu, sam brata nomo oli naf blong pem wan mobaelfon o tablet, mowas blong pem Intenet.

 From COVID-19 pandemik, mifala i stap yusum finis plante stesen blong televisen mo radio blong mekem ol miting blong kongregesen. a Ale ol brata oli kontaktem ol stesen ya, mo oli askem sipos oli save gat moa taem long televisen mo radio blong putum asembli tu.

 I had long Malawi, from we ol stesen blong televisen mo radio oli givim wan aoa nomo long ol kastoma. Oli wari se sipos program i longfala moa, maet ol man we oli wajem o lesin, oli lusum intres. Be ol brata oli eksplenem se wok blong mifala i halpem evriwan long komuniti. Long taem blong COVID-19 tu, mifala i stap talemaot gud nius we i kamaot blong Baebol, blong kamfotem ol man mo halpem olgeta blong stap olsem ol gudfala sitisen blong kantri, mo blong gat wan hapi famle. Taem ol stesen oli harem tok ya, oli givim naf taem long ol brata blong putum ful asembli long televisen mo radio.

 Long Malawi, asembli i kamaot long wan stesen blong televisen mo wan stesen blong radio, we tufala i kasem olgeta ples long kantri ya, i min se plante milian man oli save wajem o harem program ya. Long Mosambik, asembli i kamaot long wan stesen blong televisen mo 85 stesen blong radio.

 Long tufala kantri tugeta, mifala i spenem bitim 3,100,000 vatu b blong putum asembli ya long televisen, mo 2,200,000 vatu blong putum long radio. Sam smol stesen blong radio oli askem 1,600 vatu nomo, be sam stesen we oli kasem olgeta ples long kantri, oli askem bitim 305,000 vatu.

 Ol brata oli traehad blong yusum gud ol presen mane. Long Malawi, oli askem long sam stesen blong oli daonem praes blong olgeta, mo wan i daonem long 30 pesen. Long rod ya, oli sevem bitim 187,000 vatu. Long Mosambik, sam stesen oli glad blong daonem praes blong olgeta, from we oli save se bambae mifala i no stilim olgeta mo bambae mifala i pem kwik.

 Ol brata oli glad tumas blong harem o wajem program blong asembli long ol defdefren stesen. Patrik, we i wan elda long Malawi, i talem se: “Mifala i talem tangkiu long ol brata long Hed Kampani from olgeta samting we oli mekem blong givhan long mifala long taem blong pandemik.” Aesak, we hem tu i blong Malawi, i talem se: “Mifala i gat radio nomo, taswe mifala i talem bigfala tangkiu long oganaesesen blong Jehova we i mekem rod blong mifala i save lesin long asembli long radio. From samting ya, ful famle blong mi i kasem ol gudfala samting long asembli. Mifala i luk samting ya olsem pruf se Jehova i lavem ol man blong hem.”

 Wan pablisa long Mosambik we bigfala asembli long 2020 i faswan asembli blong hem, i talem se: “Plan ya blong wajem bigfala asembli long televisen i rimaenem mi se Jehova i God ya we i gat olgeta paoa. Pandemik ya i no blokem hem blong givim ol samting blong mekem bilif blong mi i strong, stret insaed long haos blong mi. Mi luk pruf se ol man blong Jehova oli lavlavem olgeta. Mi luksave se hemia nao trufala skul.”

 Wan elda we nem blong hem Wyson, i talem se: “Mi wantem talem tangkiu long gudfala slef from ol samting we oli mekem blong lukaot gud long mifala long taem blong pandemik. Plan ya blong harem o wajem bigfala asembli long radio o televisen, i givhan long plante long mifala long ol kantri we oli pua, blong mifala i save kasem program ya.”

 Long bigfala asembli long 2021, Kodineta Komiti mo Tijing Komiti i mekem plan bakegen blong program ya i kamaot long radio mo televisen long sam ples. ?Olsem wanem mifala i pem? I kamaot long presen mane blong sapotem wok blong mifala long fulwol, we ol man oli givim long ol defren rod long donate.dan124.com. Tangkiu tumas long presen mane we yufala i givim wetem gladhat.