God Bambae i Givim Wol Ya Long Olgeta We Oli Gat Tingting Daon

Jean-Marie Pelt, wan Franis speselis long saed blong win, wota, mo graon, i talem se: “Mi ting se olgeta samting raonabaot long yumi bambae oli jenis i kam niuwan bakegen. . . . I no tumora moning, be longtaem yet, taem bambae i gat niufala heven mo niufala wol.”

PLANTE man we oli harem nogud from ol trabol long saed blong laef long wol ya, oli wantem luk taem ya we wol bambae i jenis i kam wan paradaes. Be, hop ya long saed blong paradaes i no wan drim we ol man blong naoia nomo oli gat. Longtaem finis, Baebol i promes blong putumbak Paradaes long wol ya. Jisas i bin talem se: “olgeta we tingting blong olgeta i stap daon . . . [“God bambae i givim wol ya long olgeta,” futnot]” mo, “letem samting we yu yu wantem i kamaot long wol, olsem we i kamaot finis long heven.” Hemia sam tok blong Baebol we plante man oli save moa i bitim ol narafala tok. (Matiu 5:5; 6:​10, King James Version) Be tede, smol man nomo oli bilif long paradaes long wol, we ol man we tingting blong olgeta i stap daon bambae oli stap long hem. Plante man we oli talem se oli Kristin, oli no moa bilif long Paradaes ya nating.

Franis niuspepa ya La Vie, i eksplenem from wanem Katolik Jos i no moa bilif long wan paradaes, nating se paradaes ya bambae i stap long wol no long heven. Niuspepa ya i talem se: “Blong klosap 1,900 yia, ol lida blong Katolik skul oli traehad blong mekem ol man oli bilif long paradaes. Be naoia, taem ol man oli stap olgeta nomo blong tingting dip, taem ol lida oli mekem ol jos sevis long Sande, taem oli tijim ol kos long saed blong ol bilif blong jos, mo ol klas blong Sande skul, i no moa gat wan tingting long saed blong paradaes i stap.” Oli talem se tok ya paradaes i kam olsem wan “tik klaod,” mining blong hem i no klia nating, mo i “mekem tingting blong ol man i fasfas.” Sam lida blong skul oli no wantem yusum tok ya paradaes from we hem i “givim plante tumas tingting long ol man long saed blong wan taem long wol ya we olgeta man bambae oli hapi.”

Frédéric Lenoir, wan man we i stadi long laef blong ol man mo i wan speselis long saed blong ol skul, i talem se tingting long saed blong paradaes i kam olsem “wan pija long tingting blong man we i sem mak long evri man.” Jean Delumeau, wan man blong histri we i raetem plante buk long saed blong paradaes, hem tu i ting se ol promes blong paradaes long Baebol oli olsem pija nomo blong wan narafala samting. Hem i raetem se: “Blong ansa long kwestin ya se, ‘?Wanem tingting i stap yet long saed blong Paradaes?’ Kristin bilif i gohed yet blong talem se: Tangkiu we Sevia blong yumi i laef bakegen. From samting ya, wan dei, bambae yumi evriwan i joenem han blong yumi mo leftemap ae blong yumi, nao bambae yumi jes luk nambawan taem ya we olgeta man oli haremgud.”

?Olsem wanem? I stret yet blong tokbaot paradaes long wol? ?Wanem bambae i hapen long wol blong yumi long fiuja? ?Lukluk blong yumi long saed blong fiuja i kliagud, no yumi nidim blong mekem i kam klia moa? ?Haf we i kam biaen bambae i ansa long ol kwestin ya.