SAMWE long ten yia bifo, Gregorio mo Marilou we tufala i gat samwe long 30 yia, tufala i mekem wok blong paenia long Manila, mo long semtaem, tufala i wok fultaem blong winim mane. I tru se i no isi, be tufala i glad. Marilou i wok long wan bang. Mo biaen, oli putumap hem i kam maneja blong bang ya. Marilou i talem se: “Mitufala i gat gudfala wok we i givim gudfala pei long mitufala, mo i mekem mitufala i gat wan gudfala laef.” Mo from we tufala i gat plante mane, tufala i gat tingting blong mekem wan haos, long wan naesfala ples we i stap 19 kilometa long is saed blong Manila. Tufala i mekem kontrak wetem wan kampani blong bildim haos, mo tufala i plan blong pem lon evri manis gogo kasem ten yia.

Marilou i talem se: “Mi mi spenem plante taem mo paoa blong mi long niufala wok blong mi. Hemia i mekem se mi no moa prij plante. Mi harem olsem se mi stap stilim taem blong Jehova. Mi luk se i no longtaem, bambae mi no moa gat taem blong mekem wok blong Jehova olsem we mi bin promes blong mekem.” Samting ya i mekem Gregorio mo Marilou, tufala i no glad nating. Ale wan dei, tufala i sidaon mo tufala i tokbaot olsem wanem tufala i stap yusum laef blong tufala. Gregorio i talem se: “Mitufala i wantem jenisim sam samting, be mitufala i no save se bambae mitufala i mekem olsem wanem. Mitufala i  storian olsem wanem mitufala i save yusum laef blong mitufala long wok blong Jehova, from we mitufala i no gat pikinini. Mo mitufala i prea long Jehova blong i givhan long mitufala.”

Long taem ya, tufala harem ol tok we oli tokbaot sam ples we oli nidim moa pablisa blong prij long hem. Gregorio i talem se: “Taem mitufala i harem ol tok ya, mitufala i harem olsem se Jehova i stap ansa long ol prea blong mitufala.” Tufala i prea long Jehova blong i mekem bilif blong tufala i kam strong moa, blong tufala i save mekem wan gudfala desisen. Be wan bigfala samting we i blokem tufala, hemia se tufala i mas gohed yet blong pem lon blong haos. Blong tri yia finis, tufala i stap pem lon blong haos. ?Bambae tufala i mekem wanem nao? Marilou i talem se: “Sipos mitufala i kanselem kontrak blong mitufala, bambae mitufala i lusum evri mane we mitufala i pem finis. Mitufala i bin spenem bigfala mane finis. Mitufala i mas jusum se mitufala i wantem mekem wok blong Jehova fastaem, no mekem samting we mitufala nomo i wantem.” Tufala i tingting gud long ol tok blong aposol Pol we i talem se, hem i “sakemaot” olgeta samting blong laef blong hem bifo. Ale, tufala i kanselem kontrak blong tufala, tufala i lego wok blong tufala, mo tufala i salemaot bighaf blong ol samting blong tufala. Afta tufala i go long wan vilej long aelan blong Palawan, we i stap 480 kilometa long saot blong Manila.—Fil. 3:8.

Bifo we Gregorio mo Marilou tufala i go long Palawan, tufala i rerem tingting blong tufala blong gat wan laef we i no fasfas wetem plante samting. Be tufala i no save se taem bambae tufala i kasem Palawan, laef blong tufala bambae i defren. Tufala i sek long laef long ples ya. Marilou i talem se: “!Mi mi sek we mi sek! I no gat lektrik, i no gat ol samting olsem long taon, we i mekem se laef i isi. I no gat lektrik sospen blong kukum raes. Mitufala i mas katem faea wud mo kuk long faea nomo. Mi harem nogud from mi no moa save go kakae long restoron.” Nating se i olsem, tufala i gohed blong tingbaot bakegen risen we i mekem se tufala i go stap long ples ya, mo sloslo tufala i stap lan long laef blong ples ya. Marilou i talem se: “Naoia mi mi glad blong lukluk ol naesfala samting raonabaot long mi, wetem ol sta we oli saen long naet. Mo taem mi luk ol man we mifala i prij long olgeta oli glad, hemia i mekem mi tu mi glad tumas. From we mitufala i prij long ples ya, mitufala i lanem “rod” blong harem gud long ol samting we mitufala i gat.”—Fil. 4:12.

Gregorio i talem se: “Taem mitufala i kasem ples ya, i gat fo Witnes nomo. Olgeta oli glad tumas taem mi stap mekem pablik tok evri wik. Mo long taem blong miting, mi plei long gita blong mi mo mifala i sing long ol singsing blong Kingdom.” Long fas yia we Gregorio mo Marilou, tufala i stap long ples ya, tufala i luk olsem wanem smol grup ya i kam wan kongregesen we i gat 24 pablisa long hem. Gregorio i talem se: “Ol samting we ol pablisa long kongregesen ya oli mekem blong soemaot we oli lavem mitufala, i tajem hat blong mitufala bigwan.” Naoia, tufala i stap prij long ples ya blong bitim 6 yia finis. Tufala i talem se: “Taem mitufala i luk we plante niuwan oli joen long kongregesen, mitufala i glad bigwan. I no gat wan narafala  samting we i save mekem mitufala i glad olsem. Mitufala i harem se laef blong mitufala i no blong nating nomo.”

Long Filipin, i gat klosap long 3,000 brata mo sista we oli go long ol ples we i nidim moa man blong talemaot gud nius blong Kingdom. Long olgeta ya, i gat samwe long 500 sista we oli no mared. Yu traem tingbaot Karen.

Karen i gat samwe long 25 yia mo hem i gruap long Baggao, we i stap long Cagayan. Taem Karen i yangfala yet, hem i wantem blong mekem moa long wok blong prij. Hem i talem se: “Mi save se taem i sot mo olgeta man oli mas harem gud nius blong Kingdom. From samting ya, mi wantem blong go long ol ples we i nidim moa man blong prij.” Nating se sam famle blong hem oli traem pulum hem blong kasem hae edukesen, be hem i prea long Jehova blong i givhan long hem. Hem i storian tu wetem samfala we oli prij long ol ples we oli stap longwe long taon. Taem hem i gat 18 yia, hem i go long wan ples we i stap 64 kilometa longwe long taon blong hem.

Smol kongregesen we Karen i joen long hem, i lukaot long wan eria we i gat plante bigbigfala hil long hem, mo i stap klosap long Solwota blong Pasifik. Karen i talem se: “Mifala i mas wokbaot tri dei blong kasem niufala kongregesen ya. Mifala i klaem long ol hil mo godaon bakegen, mifala i krosem ol reva bitim 30 taem. Mi wokbaot sikis aoa blong kasem ples we ol Baebol stadi blong mi oli stap long hem. Biaen mi slip long haos blong wan long ol stadi ya, mo long nekis dei, mi wokbaot sikis aoa bakegen blong gobak long haos blong mi.” ?Olsem wanem? ?Ol traehad ya oli blong nating nomo? Karen i smael mo i talem se: “Samtaem, mi harem ol leg blong mi oli soa, be mi mi mekem 18 Baebol stadi. !Mi mi ‘trastem Jehova, nao mi luk se hem i gud’!”—Sam 34:8, NW.

Sukhi i no mared mo hem i gat samwe 40 yia. Hem i stap long Amerika. ?Wanem i pulum Sukhi blong go long Filipin? Long 2011, hem i go long wan asembli blong tu dei. Long asembli ya, oli askem kwestin long wan brata mo woman blong hem. Tufala i tokbaot se tufala i salemaot olting blong tufala blong go givhan long wok blong prij long Meksiko. Sukhi i talem se: “Taem mi lesin long stori blong tufala, mi stat blong tingbaot ol mak we mi neva tingbaot bifo.” Laen blong Sukhi i kamaot long India. Taswe, taem hem i harem se i nidim moa pablisa blong givhan long ol man long Filipin we oli toktok lanwis Punjabi, hem i plan blong go long Filipin. ?Olsem wanem? ?Hem i kasem sam trabol?

Sukhi i talem se: “Samting we i had long mi, hemia blong jusum wanem ol samting we mi mas salem, mo hemia we i no blong salem. Blong 13 yia, mi mi stap mi wan long wan haos, mo mi gat wan gudfala laef. Be naoia, mi mas go laef wetem wan famle we laef blong olgeta i defren long laef we mi mi gat fastaem. Nating se i no isi long mi, be mi glad from we hemia i rerem mi blong mi gat wan laef we i no fasfas.” ?Wanem sam hadtaem we Sukhi i kasem, taem hem i stap long Filipin? Sukhi i talem se: “Mi  mi fraet long ol smosmol bebet. Mo tu, samtaem mi harem se mi wantem tumas blong luk ol famle blong mi. !Mi lanem blong trastem Jehova moa i bitim bifo!” ?Wanem frut i kamaot? Sukhi i smael mo i talem se: “Jehova i talem long yumi se: ‘Yufala i testem mi, mo bambae yufala i luk we mi mi mekem ol blesing oli kamdaon long yufala.’ Mi mi luk ol tok ya oli kamtru long wan spesel fasin. Hemia taem wan man i askem long mi se: ‘?Bambae yu kambak wetaem? Mi mi gat plante kwestin blong askem long yu.’ !Mi mi glad tumas mo mi harem gud se mi naf blong givhan long ol man we oli wantem save Jehova!” (Mal. 3:10, NW) Sukhi i gohed i talem se: “Samting we i had long mi, hemia blong mekem desisen blong go long wan narafala ples. Be afta we mi go, mi glad tumas blong luk olsem wanem Jehova i lukaot gud long mi.”

Sime i wan brata we i mared mo hem i gat bitim 35 yia blong hem. Hem i aot long Filipin blong go wok long wan kantri long Medel Is. Taem hem i stap long kantri ya, wan eria elda i givim ol gudfala advaes long hem. Mo tu, i gat wan tok we wan brata long Hed Kampani i givim, we i pulum Sime blong i putum wok blong Jehova long fasples long laef blong hem. Sime i talem se: “Taem mi tingbaot we bambae mi mas lego long wok blong mi, mi no save slip gud long naet, from we mi wari tumas.” Nating se i olsem, Sime i lego wok blong hem mo i gobak long Filipin. Tede, Sime wetem woman blong hem Haidee, tufala i stap mekem wok blong prij long Davao del Sur, long saot blong Filipin. Ples ya i wan bigfala teritori, taswe i nidim moa man blong talemaot gud nius blong Kingdom. Sime i talem se: “Fastaem, mi fraet tumas se bambae mi lusum wok blong mi. Be naoia taem mi tingtingbak, mi glad tumas we mi winim fraet ya, mo mi putum wok blong Jehova long fasples long laef blong mi. Taem yu mekem bes blong yu long wok blong Jehova, hemia i mekem yu glad moa long laef. !I no gat wan narafala samting we i save mekem man i glad moa!”

Ramilo mo woman blong hem Juliet, tufala i gat samwe long 30 yia. Taem tufala i harem se i gat wan kongregesen we i nidim moa man blong prij, tufala i glad blong go joen long kongregesen ya. Kongregesen ya i stap 30 kilometa longwe long ples we tufala i stap long hem. Evri wik, nating se i san no i ren, tufala i ron long moto blong tufala blong go long miting, mo joen long wok blong prij wetem kongregesen ya. Nating se ol rod mo ol brij oli nogud tumas, be tufala i glad se tufala i stap mekem moa long wok blong prij. Ramilo i talem se: “!Mi mo woman blong mi, mitufala i mekem 11 Baebol stadi! I tru se blong go prij long ol ples we i nidim moa man blong talemaot gud nius, yumi mas lego plante samting we yumi nomo i wantem. Be taem yumi mekem olsem, yumi save kasem plante blesing mo yumi harem gud tumas.”—1 Kor. 15:58.

?Olsem wanem? ?Yu yu wantem save olsem wanem blong go prij long ol narafala ples, no long ples blong yu we i nidim moa man blong talemaot gud nius? Sipos yes, i gud we yu storian wetem eria elda, mo yu ridim haf ya long Kingdom Wok Blong Yumi blong Ogis 2011, we i talem se: “?Yu Yu Save ‘Kamkros Long Masedonia’?”