Barbara i lavem papa blong hem. Wan fren blong famle i talem tok ya blong mekem Barbara i harem gud, be Barbara i harem se tok ya i stikim hat blong hem. Hem i stap talem bakegen mo bakegen se: “!Ded i no wan samting we i moa gud!” Plante yia biaen, Barbara i tokbaot samting ya long wan buk we hem i raetem, mo i klia se hem i stap harem nogud yet.

Barbara i faenemaot se i tekem taem blong man i harem gud bakegen taem wan famle i ded, antap moa sipos i lavem hem tumas. Baebol i talem se ded i “laswan blong ol enemi” blong yumi. (1 Korin 15:26) Ded i wan samting we yumi no save blokem, mo i spolem laef blong yumi taem i tekemaot wan famle we yumi lavem tumas, antap moa sipos yumi no rere from. Yumi evriwan i harem nogud taem wan famle i ded. Taswe yumi no sapraes se i had blong winim soasore long taem olsem.

Maet yu stap tingting se: ‘?Bambae mi stap harem nogud kasem wetaem? ?Mi save mekem wanem blong harem gud bakegen? ?Olsem wanem blong givhan long man we wan famle blong hem i ded, blong i harem gud bakegen? ?Olgeta we oli ded, bambae oli laef bakegen?’