“TAEM MI SMOL, MI HAREM PLANTE RAO MO RABIS TOK.” Hemia tok blong wan woman we nem blong hem Patrisa. Hem i gohed se: “Mi no lanem blong fogivim narafala. Taem mi kam bigwan, mi gohed blong tingbaot samting we narafala i mekem long mi, mo mi no slipgud blong plante dei.” I tru, man we i holem kros i no glad, mo hem i mekem i nogud long helt blong hem tu. Ol man blong stadi oli faenemaot se man we i no fogivim narafala . . .

• I no moa fren gud wetem ol narafala from we i stap kros oltaem, ale i stap hem wan, i no moa gat fren

• I kam kros isi nomo, i wari, mo tingting i foldaon

• I tingting tumas long wan rong, nao i no save harem gud long laef

• I harem se hem i no stap folem ol rul blong Baebol we hem i bilif long olgeta

• I wari tumas mo i kasem plante sik, olsem hae blad presa, sik blong hat, bodi i soa olbaot, mo hed tu i soa *

?FOGIVIM MAN I MINIM WANEM? Fogivim man i min se yu no tingbaot rong we hem i mekem long yu, yu lego kros, mo yu no traem givimbak. I no min se yu agri long rong ya, o yu ting se i nating nomo, o yu mekem olsem se i no hapen. Be taem yu fogivim hem, yu mekem wan jus blong holem pis mo gohed blong fren gud wetem hem.

Man we i fogivim narafala i kasem save se yumi evriwan i mestem samtaem, mo yumi mekem sin long aksen mo toktok blong yumi. (Rom 3:23) Baebol i talem sem samting, mo i givim advaes ya se: “Yufala i no mas hareap blong kros long yufala, mo yufala i mas glad blong fofogivim yufala nating sipos wan long yufala i gat poen agens long narawan.”—Kolosi 3:13.

I klia se man we i fogivim narafala i soemaot lav, mo lav “i olsem wan rop we i save joenem ol man oli kam wan.” (Kolosi 3:14) Websaet blong Mayo Clinic i talem se man we i fogivim narafala . . .

•   I fren gud wetem ol narafala, i kasem save long filing mo tingting blong olgeta, mo i sore long man we i mekem i no stret long hem

• I gat pis long tingting blong hem mo pis wetem God

• I no wari tumas, mo i no kam kros

• Tingting blong hem i no foldaon

FOGIVIM YU WAN. Wan magasin (Disability & Rehabilitation) i talem se “i had” blong fogivim yu wan, be “i impoten tumas blong mekem olsem sipos yu wantem stap helti” long tingting mo bodi. ?Wanem i save mekem i isi moa blong yu fogivim yu wan?

• Yu no mas ting se bambae yu mekem evri samting i stret olgeta, be yu mas luksave se bambae yu mestem samtaem olsem ol narafala man.—Prija 7:20

• Taem yu mekem mastik, traehad blong lanem samting from. Olsemia, bambae yu no save mekem sem mastik bakegen.

• Tingting blong yu i mas longfala, from i save tekem longtaem blong winim sam nogud fasin.—Efesas 4:23, 24

• Joen wetem ol fren we oli kaen, oli leftemap tingting, mo oli talem gudfala toktok, be oli no giaman long yu.—Ol Proveb 13:20

• Sipos yu spolem narafala, yu mas hareap blong talem sore. Taem yu mekem pis wetem hem, bambae yu harem gud.—Matiu 5:23, 24

Patrisa we yumi tokbaot finis, i stadi Baebol nao i lanem blong fogivim narafala. Hem i talem se: “Mi sakemaot kros we i stap spolem laef blong mi. Mi no moa harem nogud, mo mi no moa mekem ol narafala oli harem nogud. God i putum ol rul long Baebol from we hem i lavem yumi, mo i wantem se yumi gat wan gudfala laef.”

Wan man we nem blong hem Ron, i talem se: “Mi no save stretem tingting mo fasin blong ol narafala. Be mi save stretem mi wan. Blong gat pis, mi mas lego kros. Mi tingbaot pis mo kros olsem we tufala i stap longlongwe long tufala. Taswe mi no save gat tufala fasin ya wantaem. Naoia tingting blong mi i no moa stikim mi.”