KIGISTAN, hem i wan kantri long Sentrol Esia, mo i stap klosap long ol kantri ya, Kasakstan, Asbekistan, Tajikistan, mo Jaena. Klosap 90 pesen blong kantri ya, i fulap long ol hil. Wan long ol hil ya, hemia Tian Shan Mountain, we haet blong hem 7,439 meta. Samwe long 4 pesen blong kantri ya, hemia ol dakbus nomo. From samting ya, Kigistan i wan long ol kantri we i gat bigfala dakbus, mo i fulap long tri blong walnut.

Ol man Kigistan, oli gat fasin ya blong tekem narafala i kam long haos blong olgeta, mo oli gat respek. Oli no save singaot wan olfala long prapa nem blong hem, be oli yusum tok ya “yu,” blong singaot hem. Mo long taem blong kakae, oli givim beswan jea long ol olfala. Mo tu, oli mekem olsem taem oli ron long trak.

Wan famle i save gat bitim tri pikinini. Hemia we i lasbon, i mas stap wetem papa mo mama blong hem, nating sipos hem i mared. Hem nao i mas lukaot long papa mo mama blong hem, taem tufala i kam olfala.

 Ol papa mo mama oli trenemgud ol smol gel blong olgeta, blong oli naf blong mekem ol wok blong wan mama. Olsem nao, taem oli kam yangfala, oli rere finis blong lukaot long wan famle. Long taem blong mared, famle blong woman i mas givim ol defren kaen kaliko, klos, mo wan kapet, long man we i mared. Mo man i mas givim mane mo sam anamol long famle blong woman, olsem pei blong woman ya.

Taem i gat wan lafet no wan ded, oli mas kilim wan sipsip no wan hos. Oli serem ol mit blong anamol ya long ol man, folem posisen blong man mo yia blong hem. Evri man oli mas kasem wan pis mit. Kastom ya i blong soem respek long evriwan. Biaen, oli kakae wan spesel kakae we oli kolem se, beshbarmak. Oli yusum han blong olgeta nomo taem oli kakae.