Kwestin Blong Olgeta We Oli Ridim Magasin Ya . . .

?Wanem Ya Wan Haos Kingdom?

▪ Haos Kingdom hem i wan ples blong wosip, we ol Witnes blong Jeova oli stap yusum blong mekem ol miting blong olgeta long hem. I gat moa long ten taosen Haos Kingdom we ol Witnes blong Jeova oli stap yusum long olgeta ples long wol. Evri wik, i gat bitim 105,000 kongregesen blong ol Witnes blong Jeova, we oli joen wanples long ol wanwan Haos Kingdom blong olgeta.

Olgeta Haos Kingdom oli gat wan bigfala rum, we ol man oli sidaon insaed long hem blong mekem Baebol stadi, mo blong lesin long ol pablik tok long saed blong Baebol. Long bighaf blong ol haos ya, i gat wan ples long fored, we man i stanap long hem blong tijim ol man no blong lidim ol miting. Klosap oltaem, i gat samwe long 100 kasem 300 jea insaed long wan Haos Kingdom. Maet i gat wan no tu smol rum bakegen, wetem wan ofis, mo wan smol laebri we i gat ol buk long hem we oli tokbaot Baebol, wetem sam narafala buk blong lukaot save, we olgeta long kongregesen oli save yusum.

Insaed long Haos Kingdom, yu no save faenem ol samting we yu save luk olbaot insaed long ol jos we oli stap talem se oli Kristin, olsem ol pija, aedol, olta, mo kros. ?From wanem i no gat ol samting ya long Haos Kingdom? Ol Witnes blong Jeova oli bilif se sipos oli yusum ol samting ya, bambae oli agensem ol tok blong Baebol we i talem se: “I nogud yufala i stap mekem wosip long ol narafala god.” (1 Korin 10:14; Jon 4:24) Tede, plante jos haos mo haos prea oli flas bitim mak, ol man oli putum plante samting insaed long olgeta blong flasem olgeta. Be ol Haos Kingdom ya, oli no putum plante samting long olgeta blong flasem olgeta. Oli wokem olgeta long fasin we oli save yusum evri haf blong olgeta blong mekem wosip nomo. I no haos ya we i impoten, be samting we i impoten moa, hemia tijing blong Baebol we man i kasem insaed long haos ya.

?From wanem oli yusum nem ya Haos Kingdom? Hemia from we ol miting long Haos Kingdom oli tokbaot ol tijing blong Baebol. Mo oli tokbaot stamba tingting blong Baebol, hemia “kingdom blong God,” we i olsem stamba tok blong Jisas, taem hem i stap prij long wol. (Luk 4:43, NW) Taswe, long yia 1930, oli putum nem blong haos ya se Haos Kingdom, from i soemaot stret samting we oli mekem insaed long haos ya, hemia blong leftemap trufala wosip. Mo tu, Haos Kingdom i olsem stamba ples we ol Witnes oli kam long hem blong joen long wok blong prij, blong talemaot ‘gud nius blong kingdom.’ (Matiu 24:14, NW) Yes, Haos Kingdom i no wan ples we ol man oli kam long hem jes blong joen tugeta mo storian, mo i no wan ples blong winim mane tu. Ol mane we oli yusum blong wokem ol Haos Kingdom, mo blong pem ol samting olsem laet mo wota, mo ol mane blong givhan long wok blong prij long fulwol, hemia ol presen mane nomo. Oli neva pasem plet i goraon blong sakem kleksin. Defren olgeta, i gat wan bokis i stap, nao olgeta we oli wantem givim presen mane long gladhat blong olgeta oli save putum insaed long bokis ya.

Long evri ples long wol, oli wokem ol Haos Kingdom long ol defren saes mo stael, be oli yusum olgeta long sem fasin nomo. Stael blong ol Haos Kingdom i defdefren, from we i mas stret long ol samting we ol man ples oli gat blong wokem ol haos, mo i mas stret tu wetem weta long ples blong olgeta. Mo tu, i mas stret long mane we ol kongregesen blong ol Witnes blong Jeova oli gat long ol wanwan eria. Sam long ol haos ya oli wokem long brikis, wud, no ston. Long sam narafala, oli no blokem tufala saed blong olgeta, oli wokem ruf long natanggura, mo oli mekem wol blong olgeta long bambu.

Ol man oli welkam blong kam long miting long eni Haos Kingdom. (Hibrus 10:25) Yes, evri wik i gat wan pablik tok, we i pulum intres blong olgeta man, ol Kristin long kongregesen mo ol narafala man tu. Ol tok ya oli stanap long Baebol nomo. ?Olsem wanem? ?Yu yu laekem blong visitim Haos Kingdom we i stap long ples blong yu?

[Tok blong pija long pej 17]

Malawi, Afrika

[Tok blong pija long pej 17]

Inglan, Briten