?Devel Setan i Save Kontrolem Ol Man?
Ansa we Baebol i givim
Devel Setan mo ol rabis spirit oli gat bigfala paoa long ol man, taswe Baebol i talem se: “Fulwol i stap long paoa blong Man ya we i rabis.” (1 Jon 5:19) Mo Baebol i tokbaot ol rod we Setan i yusum blong pulum ol man.
Trikim man. Baebol i pulum ol Kristin blong oli “stanap strong agensem ol giaman trik blong Setan.”(Efesas 6:11) Wan long ol trik blong hem, hemia blong mekem ol man oli bilif se ol man blong hem oli ol man blong wok blong God.—2 Korin 11:13-15.
Wok blong ol kleva. Blong trikim ol man, Setan i yusum ol kleva, ol man blong talemaot fiuja, ol man blong mekem nakaemas, mo ol man blong lukluk ol sta blong talemaot fiuja. (Dutronome 18:10-12) Mo hem i yusum ol drag, fasin blong kontrolem tingting blong narafala blong mekem samting we wan narafala i wantem, mo sam fasin blong tingting dip we i mekem maen blong man i emti nao i openem rod blong ol rabis spirit i kontrolem hem.—Luk 11:24-26.
Ol giaman skul. Ol skul we oli tijim man long ol samting we oli no tru, oli lidim man i gorong nao i no moa obei long God. (1 Korin 10:20) Baebol i tokbaot ol giaman tijing ya se oli “ol tijing blong ol rabis spirit.” —1 Timoti 4:1.
Go insaed long bodi blong man. Baebol i tokbaot sam stori blong ol rabis spirit we oli kontrolem ol man. Samtaem ol man we rabis spirit i stap long olgeta, oli blaen, oli no save toktok, mo oli spolem bodi blong olgeta bakegen.—Matiu 12:22; Mak 5:2-5.
Rod blong blokem Paoa blong Devel Setan
Yu no nid blong wari mo fraet long Setan, from we Baebol i soemaot samting we yu save mekem blong blokem hem:
Yu lanem blong luksave ol trap blong Setan, olsem ya bambae yu “save ol plan blong hem.” —2 Korin 2:11.
Yu stadi long ol save blong Baebol, mo yu folem ol samting we yu lanem. Taem yu folem ol advaes blong Baebol, hemia bambae i protektem yu blong Setan i no kontrolem yu.—Efesas 6:11-18.
Yu sakemaot eni samting we i joen wetem wok blong rabis spirit. (Ol Wok 19:19) Hemia i minim tu ol miusik, ol buk, ol magasin, ol posta, mo ol video we oli tokbaot wok blong kleva.
Maet Yu Laekem Hemia Tu
WEKAP!
?Baebol i Tijim Wanem Long Wok Blong Ol Rabis Spirit?
Plante man oli ting se wok blong rabis spirit mo majik i wan samting we i oraet nomo. Be Baebol i tijim samting we i defren. ?Baebol i tijim wanem long saed ya, mo from wanem?
OL YANGFALA OLI ASKEM
?Ol Pleplei We i Joen Wetem Rabis Spirit Oli Gud Nomo?
Plante man oli stat blong intres long ol samting olsem ol stadi blong sta we oli talemaot fiuja, wok blong kleva, vampaea, wij, mo sombi. ?I gat sam denja we yu mas lukaotgud long hem?
ANSA WE BAEBOL I GIVIM
?I tru se God i mekem Setan?
?Setan i kam wea? Luk from wanem Baebol i tokbaot Setan se: “Fasin blong yu i stret gud, be biaen, yu stat blong mekem ol rabis fasin.”
MIFALA
Askem Wan i Visitim Yu
Tokbaot wan kwestin long Baebol, o lanem moa long saed blong ol Witnes blong Jehova.