“Jisas i talem long hem se: ‘Mi nao rod ya, mo mi nao trutok ya, mo mi nao laef ya. I no gat man i save kam long Papa blong mi, sipos hem i no pas long mi.’”—Jon 14:6, Baebol Long Niu Wol Translesen.

 “Jisas i ansa se, ‘Mi mi rod ya mo trutok ya mo laef ya. Man i no save kam long Papa blong mi sipos i no pas long mi.’”—Jon 14:6, New International Version.

 Wan man we i wantem wosipim Papa Jehova, a i mas luksave impoten wok we Jisas i mekem.

 “Mi nao rod ya.” Jisas i “rod” blong kam klosap long God. Olsem nao, olgeta we oli prea long God, oli mas prea long nem blong Jisas. (Jon 16:23, 24) Ded blong Jisas i mekem se man i save fren bakegen wetem God, o God i save glad bakegen long man. (Rom 5:8-11) Mo tu, olgeta we oli wantem mekem God i glad, oli mas folem ol gudfala fasin we Jisas i mekem.—Jon 13:15.

 “Mi nao trutok ya.” Oltaem Jisas i talemaot trutok we i kam long God, mo i folem long laef blong hem. (1 Pita 2:22) Sipos wan man i lesin long hem, hem i save lanem trutok long saed blong God. (Jon 8:31, 32) Mo tu, Jisas i “trutok ya” from we hem i mekem ol profet tok blong Baebol oli kamtru. Taswe hem i mekem we ol promes blong God oli save kamtru.—Jon 1:17; 2 Korin 1:19, 20; Kolosi 2:16, 17.

 “Mi nao laef ya.” Jisas i givim laef blong hem, blong olgeta we oli soemaot bilif long hem oli save kasem laef we i no save finis. (Jon 3:16, 36) Mo tu, hem i “laef ya” blong olgeta we oli ded, from we bambae hem i mekem olgeta oli laef bakegen.—Jon 5:28, 29; 11:25.

 “I no gat man i save kam long Papa blong mi, sipos hem i no pas long mi.” Olgeta we oli wantem se God i glad long olgeta, oli mas akseptem spesel wok we Jisas i mekem. Blong mekem olsem, oli prea long God long nem blong Jisas, mo hemia i soemaot se oli luksave haenem blong Jisas Kraes. (Jon 15:16) Mo tu, oli agri se yumi gat janis blong kasem laef nomo from samting we Jisas i mekem.—Ol Wok 4:12; Filipae 2:8-11.

 Long Jon japta 13 kasem 17, yumi ridim ol advaes we Jisas i givim long ol 11 gudfala aposol blong hem, long naet bifo we hem i ded. Long japta 14, Jisas i pulum ol disaepol blong oli soemaot bilif long hem mo Papa blong hem, mo blong oli lavem mo obei long tufala. (Jon 14:1, 12, 15-17, 21, 23, 24) Hem i soemaot gudfala fasin fren we hem i bin gat mo i gat yet wetem Papa blong hem. (Jon 14:10, 20, 28, 31) Smoltaem biaen, Jisas i gobak long heven, be hem i promes long ol disaepol blong hem se bambae hem i no lego olgeta. (Jon 14:18) Mo tu, hem i promes se bambae oli kasem wan helpa, hemia ‘tabu spirit we Papa i sanem long nem blong Jisas.’ (Jon 14:25-27) Ol tok ya mo plante narafala samting we Jisas i mekem, i rerem ol disaepol blong hem from ol hadtaem we bambae oli fesem.