IRUẸMWI 57
U Gha Ru Orukhọ Nọ Wegbe Ghi Vbo?
Agharhemiẹn wẹẹ u ya ekhọe hia hoẹmwẹ e Jehova kevbe wẹẹ, u hia ne u ghẹ ru emwi nọ gha sọnnọ ọnrẹn, u gha ye zẹdia ru abakuru. Vbọrhirhighayehẹ, orukhọ eso wegbe sẹ eso. (1 Kọrinti 6:9, 10) Deghẹ u na ru orukhọ nọ wegbe, ghẹ mianmian wẹẹ e Jehova ye hoẹmwẹ ruẹ; ọ mu egbe nọ ya yabọ ruẹ, ọ gha vbe ru iyobọ nuẹn.
1. Vbọ khẹke ne ima ru ne Jehova mieke na yabọ ima?
Emwa ni hoẹmwẹ e Jehova gha ru orukhọ nọ wegbe, ọ keghi da iran sẹ ugboloko, vbe aro gha gbannọ iran nẹ. Vbọrhirhighayehẹ, eyan ne Jehova yan rẹn keghi rhie ifuẹko ne iran. Ọ khare wẹẹ: “Orukhọ ruẹ gha ya [ruẹ] gbiruẹn sẹrriọ wẹẹ te u ghi baa, . . . I gha khuọ ruẹ ne u gha fua vbe isonorhọ.” (Aizaia 1:18) Deghẹ ima na ya ekhọe hia ro iro fi uyinmwẹ werriẹ, e Jehova gha ya ekhọe hia yabọ ima. Sokpan, de vbene a ya ro iro fi uyinmwẹ werriẹ hẹ? Ma ghi gbe I ma rẹn ye orukhọ ne ima ru sẹrriọ wẹẹ, ma ghi dobọ emwi dan na ru yi, ma ghi vbe rinmwian e Jehova nọ yabọ ima. Iyeke ọni, ma ghi hia ne ima gbe ukhu ẹre rua ighẹ iziro dan, ra uyinmwẹ nọ gua ima obọ ro, nọ ya ima ru orukhọ nii, ma ghi vbe hia ne ima gha ya ilele nọhuanrẹn ọghe Jehova ru emwi.—Tie Aizaia 55:6, 7.
2. De vbene Jehova ya loo ediọn ya ru iyobọ ne ima hẹ vbe ima gha ru orukhọ?
E Jehova wẹẹ ne ima “tie eniwanrẹn iko” vbe ima gha ru orukhọ nọ wegbe. (Tie Jems 5:14, 15.) Ikpia na zẹ ye ukpo na, keghi hoẹmwẹ e Jehova kevbe ohuan ọghẹe. Iran gbegba ni gha ru iyobọ ne ima ya werriegbe do gha re ọsie Jehova.—Galatia 6:1.
De vbene ediọn ya ru iyobọ ne ima hẹ vbe ima gha ru orukhọ nọ wegbe? Ediọn eva ra eha ghi ya e Baibol rhie adia nọ khẹke ne ima. Iran ghi vbe gi ima rẹn emwi eso ne ima gha ru, ne ima ghẹ mieke na werriegbe ru orukhọ nọ wegbe. Iran sẹtin wẹẹ ne ima ghẹ ghi ru emwi eso na ru vbe iko, a te miẹn wẹẹ egbe rran ima vbe odẹ ọghe orhiọn. Ọmwa gha ru orukhọ nọ wegbe, ọ ma na vbe ro iro fi uyinmwẹ werriẹ, ediọn ghi kaẹn fua vbe iko, nẹ ghẹ mieke na mu iko rhia.
GUALỌ OTỌ RE SAYỌ
Gia ziro yan rẹn sayọ, odẹ ne Jehova ya ru iyobọ ne ima vbe ima gha ru orukhọ nọ wegbe, kevbe vbene u gha ya sẹtin gbọyẹmwẹ yọ hẹ.
3. Ma gha miẹn orukhọ ọghe ima kue, ma gha sẹtin werriegbe do gha re ọsie Jehova
Ma gha ru orukhọ, ọ wa da e Jehova, ọni ẹre ọ si ẹre nọ na khẹke ne ima miẹn orukhọ ọghe ima kue ma rẹn. Tie Psalm 32:1-5, iyeke ọni, uwa ghi ziro yan inọta na:
-
Vbọzẹ nọ na khẹke ne ima miẹn orukhọ ọghe ima kue ma e Jehova, ne ima gha te ya gha gbe gue ẹre?
Ma gha miẹn orukhọ ọghe ima kue ma e Jehova nẹ, ma na vbe bu ediọn ne iran ru iyobọ ne ima, orhiọn ima ghi sotọ. Kpee VIDIO na, iyeke ọni, uwa ghi ziro yan inọta nọ lelẹe.
-
Vbe vidio na, de vbene ediọn ya ru iyobọ ne Canon hẹ, nọ mieke na werriegbe bu e Jehova gha dee?
Ọ khẹke ne ima gha ta ẹmwata ma ediọn rhunmwuda, iran mu egbe ne iran ya ru iyobọ ne ima. Tie Jems 5:16, iyeke ọni, uwa ghi ziro yan inọta na:
-
Vbọzẹ ne a na miẹn wẹẹ, ma gha ta ẹmwata ma ediọn, ẹre ọ na khuẹrhẹ ne iran sẹ, ya ru iyobọ ne ima?
Miẹn orukhọ ruẹ kue, ta ẹmwata ma ediọn, u ghi vbe miẹn iyobọ ọghe Jehova yi
4. Afiangbe na lae miẹn, vbe a gha kan ọmwa fua
Deghẹ ọmwa nọ ru orukhọ nọ wegbe ma mu egbe nọ ya fi werriẹ, nọ gha lele ilele ọghe Jehova, ọmwa vberriọ i sẹtin ye gha re ọkpa vbe Osẹe Jehova. A ghi kaẹn fua! Rhunmwuda ọni, ai ghi gu ẹre mu obọ, ai ghi kue vbe gu ẹre guan. Tie 1 Kọrinti 5:6, 11 kevbe 2 Jọn 9-11, iyeke ọni, uwa ghi ziro yan inọta na:
-
Zẹvbe ne eyist fi ebrẹd werriẹ, ọmwa orukhọ nọ ma fi werriẹ gha vbe sẹtin mu iko rhia vbe a ghaa gu ẹre mu obọ. Odẹ vbo?
Agharhemiẹn wẹẹ ọ da ọmwa vbe a gha kan ọmwa fua vbe iko, emwa nibun na kan fua, ye werriegbe bu e Jehova gha dee, rhunmwuda, ne a na kan iran fua ya iran do rẹn wẹẹ, emwi ne iran ru ma gba. (Psalm 141:5) Kpee VIDIO na, iyeke ọni, uwa ghi ziro yan inọta nọ lelẹe.
-
Zẹvbe nọ rre vidio na, de vbene ọ ya ru iyobọ ne Sonia hẹ, ne a na kaẹn fua vbe iko?
De vbene emwamwa na ya kan ọmwa fua . . .
-
ya rhie uyi gie Jehova hẹ?
-
ya rhie ẹre ma wẹẹ, Osa nọ bu ohiẹn ata kevbe nọ mwẹ ahoẹmwọmwa, ẹre Jehova khin?
5. E Jehova keghi yabọ ima vbe ima gha ro iro fi uyinmwẹ werriẹ
Jesu keghi zẹ erre ọkpa, nọ ya ru iyobọ ne ima ya rẹn vbene ọ ye hẹ vbe ekhọe Jehova, vbe ọmwa gha ro iro fi uyinmwẹ werriẹ. Tie Luk 15:1-7, iyeke ọni, uwa ghi ziro yan inọta na:
-
Vbe ọna maa ruẹ re vbekpa e Jehova?
Tie Ẹzikiẹl 33:11, iyeke ọni, uwa ghi ziro yan inọta na:
-
De emwi kpataki nọ khẹke ne ima ru, ne ima ya rhie ẹre ma wẹẹ ima gele gbe I ma rẹn ye emwi ne ima ru?
Vbene ọsuohuan gbaroghe ohuan ọghẹe, erriọ ẹre Jehova vbe ya ya obọ esi mu eguọmwadia re
EMWA ESO KEGHI KHA WẸẸ: “Ohan i gu mwẹ ya tama ediọn wẹẹ, I ru orukhọ rhunmwuda, iran gha kan mwẹ fua.”
-
Vbua khian tama ọmwa nọ mwẹ iziro vbenian?
OLIKA ẸMWẸ
Ma gha ru orukhọ nọ wegbe, ma na gele gbe I ma rẹn ye emwi ne ima ru nii, ma na vbe ta mu olọ yan rẹn wẹẹ, ima i khian werriegbe ru emwi dan, e Jehova gha yabọ ima.
Ogbewerriẹ
-
Vbọzẹ nọ na khẹke ne ima miẹn orukhọ ọghe ima kue ma e Jehova?
-
Vbọ khẹke ne ima ru ne Jehova mieke na yabọ ima?
-
Ma gha ru orukhọ nọ wegbe, vbọzẹ nọ na khẹke ne ima ya gualọ iyobọ vbe obọ ediọn?
RUẸ SAYỌ
Ghee vbene Jehova ya mwẹ itohan daa okpia ọkpa hẹ, zẹvbe na gie ẹre vbe ebe Aizaia 1:18.
De vbene emwa hia ya miẹn ere hẹ, vbe emwamwa na ya kan ọmwa fua vbe iko?
“Evbọzẹe Ne Emwamwa Na Ya Kan Ọmwa Fua Na Re Ọghe Ahoẹmwọmwa” (The Watchtower, April 15, 2015)
Ghee vbene u gha ya sẹtin rhan otọ re ma ọmwa nẹi re Osẹe Jehova hẹ, evbọzẹe ne a na kan ọmwa fua.
“Avbe Osẹe Jehova Gban Egbe Ne Emwa Nẹi Ghi Re Ọkpa Vbe Usun Iran Ra?” (Ọ rre intanẹt)
Vbe okha nọ mwẹ uhunmwuta na, “Te Ọ Khẹke Ne I Werriegbe Bu E Jehova Gha Dee,” u gha miẹn emwi nọ ya okpia ọkpa nọ te de fua vbe odẹ ọghe ẹmwata kha wẹẹ, e Jehova ẹre ọ werriegbe si irẹn kẹ egbe.
You May Also Like
AVBE INỌTA NE EMWA MỌBỌ NỌ
Vbọre Iruẹmwi Ọghe Baibol?
Gualọ otọre, nu miẹn ewanniẹ ọghe avbe inọta ni dekaan emwamwa iruẹmwi e Biabol ọghọhẹ ọghomwa.
