Abime Bengaa be Yéhôva avé wo yem? Ye be ne vôm ô too, nda bisaé jôé, nge sikôlô wôé? Éyoñ éziñe na, mia wua y’été mi yé’éya Kalate Zambe. Ve nsili ô ne na, bi ne ne avale bôt avé? A amu jé bia ke bia kañete bôte Mejô me Zambe vôm ase?

Bi ne ane bôte bevo’o bese. Bia so meyoñe mese. Môt ase ya be bia a bili nté nkôñ éyiñe wé. Abui ya be bia é mbe miñyebe mife, bevo’o ke be mbe te buni Zambe. Ve bia bese bi nga nyoñ éyoñe ya tu’a yé’é Kalate Zambe. (Mam minlôman 17:11) Môt ase ya be bia a nga tobe na a kañe Yéhôva Zambe, amu a nga buni mam a nga yé’é.

Ayé’é Kalate Zambe é ne bia mfi. Bia kop a bia tôbane minjuk ane bôte bevo’o bese. Ve mbôle bia ve ngule ya wulu avale Kalate Zambe a jô, éyiñe jangane ja tyendé. (Besam 128:1, 2) Ajô te nde bia ke bia kañete bôte bevok abeñe mame bia yé’é.

Miñye’elane miangane mi aso Kalate Zambe. Mi avolô bia ényiñe jangan a bo na bi semé bôte bevok, bi bo zôsô, évôvoé nlem, ngômôtô; bi yeme fe ba’ale menda me bôte mangan. Bi kusa so meyoñe mevale meva, bia bese bi ne jôme jia, amu ‘Zambe a nji bo ôbangam.’ Ôwé, bi ne fo’o ane bôte bevo’o bese, ve jame da ékôane jangan é ne ngumba aval!​—Mam minlôman 4:13; 10:34, 35.

• Amu jé bi ne jô na Bengaa be Yéhôva be ne ane bôte bevo’o bese?

• Mefulu mevé Bengaa be Yéhôva be nga yé’é Kalate Zambe?