Ngelañ Yésu kum Bétania mbañ Yérusalém nà, a lo yà ghù léʼ kuà mba nshun i Lazaro kwù là. Yésu nèn dùʼ fi bo Maria mba Marta, fèt mèn zʼa kwù là. Mbe ghupte, bwoñ benntùn kùmde. Mbʼo kwade tsiañde zʼa be ntù Maria bo Marta ngelañ Yésu bam Lazaro num vù ké?​—Siañ Yohané 11:21-24, 38-44.

Marta lo yà lèn nkùn mebwô mfà num ben tse bo kwù là. A naʼ lèn mbe Yaweh Nsi nsi bam fe ben num vù, bo bèn ngù yôg num nsitshaʼa.​—Siañ Yob 14:14, 15.

Bo loʼ à tshaʼ kà mbom benntùn nyiañtu yi. (Netoʼde 2:7; 3:19) Bag bin keʼ bʼa ywèle nke ntswe ntùm mbàb wut. Mba bag bin bʼa benntùn ntùm mbàb wut là, moʼ ju keʼ be yôg ngelañ be kwù là. Mèn num kwù, nzeʼtu i kwù; mba ba nkwade mi bèn mbi. Ndùlala, Lazaro naʼ lo num vù, ke soñ moʼ tshô mba moʼ mfà num vù, nummbe mèn a kwù là keʼ bèn ndèn moʼ ju.​—Siañ Yobkwi 146:4; Nzenu 9:5, 6, 10.

Nsi num nton ben tse bo kwù là ndà mbwôg ké? Mba Ñwaʼni Nsi tshob mbe ben bo kwù keʼ bèn ndèn moʼ ju là, tswide ndà mbwôg bʼa kuaʼ taʼ tswide kebwô zʼa num ntshabte Nsi là. Ndaʼ nekwade neton benntùn ntùm ndà mbwôg num ngù ntù i bènde.​—Siañ Yérémia 7:31.

Lôde la’de netshañ Ke zʼa num ntôg ngelañ mènntùn kwù à?

Mèn zʼa kwù là keʼ kuʼni netshob mba nejuʼu. (Yobkwi 115:17) Ndaʼndù tsemoʼ tshùagkèt angél num ntshobte bo benntùn, ngù bo kwade mbe a mèn zʼa kwù là bèn nke ntshobe. (2 Pétro 2:4) Yaweh Nsi tshùʼ mbe kà menntùn naʼ ndiag nebètte nu fe ben.​—Siañ Nebwôgde 18:10, 11.

Ntshuʼ ntshuʼ ben bo kwù là nsi lo num vù, ntswe num nsitshaʼa. Mba tsemoʼ ben bo naʼ mbe ke lèn Yaweh Nsi, mbèn nke ngù tshu kebwô là, nsi lo num vù.​—Siañ Lukas 23:43; Mfàʼ ghantum 24:15.

Ba lo num vù nsi kuʼni neziʼde nenùn mfà num Nsi, mbèn ndaʼde yub bamntù num Yésu ntshùade njam yub juʼ ntshu. (Apokalipse 20:11-13) Ben tse bo lo num vù bèn ngù tshu tsʼa bwô là, nsi tswe matmat num nsitshaʼa.​—Siañ Yohané 5:28, 29.

Nsi tshùadʼà njam vù mén i kà mfà nywinde num nelo num vù. Ndùlala nelo num vù nke ntswide ben à nkôni bo kondèn Yaweh Nsi. O kô neyen à kuaʼ we ngelañ fe ben lo num vù à?​—Siañ Yohané 3:16; Roma 6:23.