Ang Gregong ngalan sa basahon sa Bibliya nga Pinadayag, A·po·kaʹly·psis (apokalipsis), nagkahulogang “Pagbutyag” o “Pagpadayag.” Haom kining ngalana kay ang basahon sa Pinadayag nagbutyag sa mga butang nga tinago ug nagpadayag sa mga hitabo nga ang katumanan dugay pa human kini nasulat. Daghang tagna niini ang matuman pa lang.

Sumaryo sa basahon sa Pinadayag

•   Introduksiyon.—Pinadayag 1:1-9.

•   Mga mensahe ni Jesus ngadto sa pito ka kongregasyon.—Pinadayag 1:10–3:22.

•   Panan-awon bahin sa Diyos diha sa iyang trono sa langit.—Pinadayag 4:1-11.

•   Serye sa mga panan-awon, nga sunodsunod nga mahitabo:

  •   Pito ka timbre.—Pinadayag 5:1–8:6.

  •   Pito ka trompeta, ang kataposang tulo nagpaila sa tulo ka kaalaotan.—Pinadayag 8:7–14:20.

  •   Pito ka panaksan, ang matag usa naundan ug hampak nga nagsimbolo sa paghukom sa Diyos nga ipahamtang sa yuta.—Pinadayag 15:1–16:21.

  •   Mga panan-awon bahin sa kalaglagan sa mga kaaway sa Diyos.—Pinadayag 17:1–20:10.

  •   Mga panan-awon bahin sa mga panalangin sa Diyos alang sa langit ug yuta.—Pinadayag 20:11–22:5.

•   Konklusyon.—Pinadayag 22:6-21.

Mga yawi aron masabtan ang basahon sa Pinadayag

1.   Positibo ang kahulogan niini, dili makahahadlok o makalilisang para sa mga alagad sa Diyos. Para sa daghan, ang pulong “apokalipsis” nagpasabot ug dakong katalagman. Pero ang basahon sa Pinadayag nagsugod ug natapos pinaagi sa pag-ingon nga magmalipayon kadtong nagbasa, nakasabot, ug nagpadapat sa mensahe niini.—Pinadayag 1:3; 22:7.

2.   Ang Pinadayag naggamit ug daghang “ilhanan” o simbolo, nga dili angayng sabton nga literal.—Pinadayag 1:1.

3.   Daghang pangunang karakter ug simbolo sa basahon sa Pinadayag ang gihisgotan na sa nag-unang mga basahon sa Bibliya:

   •   Jehova—“ang matuod nga Diyos sa kalangitan” ug Maglalalang sa tanang butang.—Deuteronomio 4:39; Salmo 103:19; Pinadayag 4:11; 15:3.

   •   Jesu-Kristo—“ang Kordero sa Diyos.”—Juan 1:29; Pinadayag 5:6; 14:1.

   •   Satanas nga Yawa—kaaway sa Diyos.—Genesis 3:14, 15; Juan 8:44; Pinadayag 12:9.

   •   Dakong Babilonya—sama sa karaang Babilonya (Babel), kaaway ni Jehova nga Diyos ug sa iyang katawhan, ug ang tinubdan sa relihiyosong kabakakan.—Genesis 11:2-9; Isaias 13:1, 11; Pinadayag 17:4-6; 18:4, 20.

   •   “Ang dagat”—daotang katawhan nga misupak sa Diyos.—Isaias 57:20; Pinadayag 13:1; 21:1.

   •   Mga butang nga nalangkit sa karaang tabernakulo nga gigamit sa pagsimba sa Diyos—naglakip sa arka sa pakigsaad, dagat nga bildo (dakong planggana alang sa pagpanghugas), mga lampara, mga halad nga insenso, ug halaran.—Exodo 25:10, 17, 18; 40:24-32; Pinadayag 4:5, 6; 5:8; 8:3; 11:19.

   •   Mga mapintas nga mananap—nagsimbolo sa mga gobyerno sa tawo.—Daniel 7:1-8, 17-26; Pinadayag 13:2, 11; 17:3.

   •   Mga numero nga gigamit sa simbolikong paagi.—Pinadayag 1:20; 8:13; 13:18; 21:16.

4.   Ang mga panan-awon mahitabo sa “adlaw sa Ginoo,” nga nagsugod dihang natukod ang Gingharian sa Diyos niadtong 1914 ug dihang nagsugod si Jesus sa pagmando ingong Hari. (Pinadayag 1:10) Busa ang dakong katumanan sa Pinadayag mahitabo sa atong panahon.

5.   Aron masabtan ang basahon sa Pinadayag, kinahanglan usab nato ang mga butang nga nakatabang nato nga masabtan ang ubang bahin sa Bibliya, apil ang kaalam nga gikan sa Diyos ug ang tabang niadtong mga nakasabot na niini.—Buhat 8:26-39; Santiago 1:5.