“Ang pailob sa bana ug asawa masulayan kada adlaw. Morag di ra kaayo importanteng hiyas ang pailob kon tagsaanon ka, pero kinahanglan kaayo ni aron magmalamposon ang kaminyoon.”—John.

•  Nganong kinahanglan nimo ang pailob?

•  Unsaon nimo pagpakitag pailob?

•  “Importante kaayo ang pailob”

•   Sa panagtiayon, mahibalo ka pag-ayo sa mga sayop sa imong kapikas.

   “Kon taudtaod na mong minyo, mas daling magpokus sa dili nindot nga mga hiyas sa imong kapikas. Kon magsugod kag hunahuna niana, mas daling mawala ang imong pailob.”—Jessena.

•   Kon dili ka mapailobon, basin moestorya na lang ka nga dili una maghunahuna.

   “Dali ra kaayo kong mosulti sa akong gibati mao nga usahay, makasulti kog mga butang nga dili unta angayng isulti. Kon mas magpailob ko, makahunahuna tingali ko kon kinahanglan ba gyod kong mosulti ug basin di na lang ko mosulti.”—Carmen.

   Ang Bibliya nag-ingon: “Ang gugma taas ug pailob ug maayo.” (1 Corinto 13:4) Makataronganon lang nga ang duha ka tawo nga nahigugma sa usag usa magpakitag pailob. Pero dili ingon ana ang kanunayng mahitabo. Si John, nga gihisgotan ganina, miingon: “Sama sa ubang maayo nga hiyas, ang pailob daling mawala ug lisod ipakita. Kinahanglan ang paningkamot aron padayon ning maugmad.”

•   Dihang masulayan ang imong pailob sa kalit nga hitabo.

   Pananglitan: Nakasultig sakit ang imong kapikas kanimo. Ang imong natural nga reaksiyon mao ang pagbalos ug sultig sakit kaniya.

   Prinsipyo sa Bibliya: “Ayawg kasuko dayon, kay ang pagkasuko ilhanan sa usa ka buangbuang.”—Ecclesiastes 7:9, footnote.

   Kon unsaon pagpakitag pailob: Hunong kadiyot. Sa di pa ka motubag, hunahunaa nga naay ubang rason kon nganong gisulti sa imong kapikas ang usa ka butang imbes maghunahuna nga gituyo niyang insultohon ka o sultihan kag sakit. Ang librong Fighting for Your Marriage nag-ingon: “Kon naay isulti ang atong kapikas, sagad ibase nato ang atong reaksiyon sa atong kaugalingong interpretasyon sa iyang giingon, imbes sa iyang buot ipasabot ug sa iya mismong gisulti.”

   Bisag gipasuko ka sa imong kapikas, ang pagpakita nimog pailob pinaagi sa pagpugong nga dili mobalos makatabang nga maibanan ang tensiyon imbes nga mosamot kini. Ang Bibliya nag-ingon: “Kon walay sugnod, ang kalayo mapalong.”—Proverbio 26:20.

   “Kon mobati ka nga kaaway nimo imong asawa, hunong ug hunahunaa kon nganong gimahal nimo siya ug paghimo dayog maayo ngadto kaniya.”—Ethan.

   Hunahunaa kini:

  •  Unsay imong reaksiyon kon ang imong kapikas nakasulti o nakahimo ug dili maayo kanimo?

  •  Unsaon nimo pagpakitag mas dakong pailob kon mahitabo nig usab?

•   Dihang masulayan ang imong pailob sa balikbalik nga nahimo sa imong kapikas.

   Pananglitan: Pirmeng late ang imong kapikas ug misurok na imong dugo ug hinulat niya.

   Prinsipyo sa Bibliya: “Padayon sa pagpailob sa usag usa ug kinasingkasing nga magpinasayloay.”—Colosas 3:13.

   Kon unsaon pagpakitag pailob: Paningkamoting mauna ang inyong relasyon imbes ang imong kaugalingon. Pangutan-a imong kaugalingon, ‘Kon padak-on ko ni nga isyu, makatabang ba ni sa among relasyon?’ Hinumdomi nga “kitang tanan mapandol sa makadaghan.” (Santiago 3:2) Nagpasabot ni nga naa pod kay kinahanglang pauswagon.

   “Usahay mas mapailobon ko sa akong amiga kay sa akong bana. Seguro kay kanunay nakong kauban akong bana ug mas makita nako iyang mga sayop. Pero ang pailob usa ka aspekto sa gugma—paagi sa pagpakitag pagtahod—mao nga importante ni sa among kaminyoon.”—Nia.

   Hunahunaa kini:

  •  Unsa ka kamapailobon sa mga sayop sa imong kapikas?

  •  Unsaon nimo pagpakitag mas dakong pailob sa umaabot?