KON namatyan na kag minahal, tingali lainlain sab ang imong gibati: kaguol, kamingaw, ug kawalay-mahimo. Basin nasuko sab ka, nakonsensiya, ug nahadlok. Seguro nakahunahuna pa gani ka kon naa pa bay pulos ang imong kinabuhi.

Ayawg kabalaka. Normal ra nga maguol, ug wala kana magpasabot nga huyang ka. Nagpakita lang na nga palangga kaayo nimo ang imong minahal. Pero posible ba nga mamenosan ang kasakit ug kaguol nga imong gibati?

Kon morag dili mawala ang kasakit nga imong gibati, basin mahupayan ka sa mosunod nga mga sugyot:

AYAWG PUGNGI ANG IMONG KAGUOL

Dili tanan parehas ug paagi o gidugayon sa pagbangotan. Pero ang paghilak makapagaan sa imong gibati. Si Vanessa, nga gihisgotan ganina, miingon: “Mohilak ra ko; kinahanglan nakong ipahungaw ang sakit nga akong gibati.” Si Sofía, nga kalit nga namatyag manghod nga babaye, miingon: “Sakit kaayong maghunahuna sa nahitabo. Mora nig samad nga giablihan ug gilimpiyohan. Halos dili maagwanta ang kasakit, pero makaayo ni sa samad.”

ISULTI ANG IMONG HUNAHUNA UG GIBATI

Normal ra nga usahay gusto kang mag-inusara. Pero kon iluom nimo ang imong kaguol, mabug-atan ka. Si Jared, nga 17 anyos ug namatyag amahan, nahinumdom:  “Akong gisulti sa uban ang akong gibati. Ambot kon nakasabot ba sila nako, pero nalipay ko nga nasulti nako ang akong gibati.” Si Janice, nga gihisgotan sa unang artikulo, naghisgot sab ug laing kaayohan: “Makahupay gyod ang pagpakig-estorya sa uban. Gibati nako nga nasabtan ko sa uban, ug wala ko mag-inusara.”

DAWATA ANG TABANG SA UBAN

Miingon ang usa ka doktor: “Kon dawaton dayon sa namatyan ang tabang sa mga higala ug paryente, mas sayon nilang masagubang ang kaguol.” Sultihi ang imong mga higala kon unsay ilang ikatabang; lagmit gusto nilang motabang pero wala lang sila mahibalo kon unsaon.​—Proverbio 17:17.

PANINGKAMOT NGA MAS MASUOD SA DIYOS

Si Tina miingon: “Dihang kalit nga namatay ang akong bana tungod sa cancer, dili na nako masulti kaniya ang akong gibati, maong sa Diyos nako isulti ang tanan! Akong sugdan ang matag adlaw sa paghangyo niya nga tabangan kong makalahutay sa tibuok adlaw. Gitabangan ko sa Diyos sa daghan kaayong paagi.” Si Tarsha, nga 22 anyos dihang namatay ang iyang inahan, miingon: “Ang pagbasag Bibliya kada adlaw nakahupay nako. Nakatabang ni nako sa paghunahunag makapadasig nga mga butang.”

HUNAHUNAA ANG PAGKABANHAW

Si Tina nagpadayon: “Sa primero, wala ko mahupayi sa paglaom sa pagkabanhaw kay niadtong tungora gikinahanglan nako ang akong bana ug gikinahanglan sa akong mga anak ang ilang amahan. Pero karon nga upat ka tuig na ang milabay, kini nga paglaom ang akong gisaligan. Kini ang nakatabang nako sa paglahutay. Mag-imagine ko nga nakita na nako siya pag-usab, ug bation nako ang kalinaw ug kalipay!”

Lagmit dili dayon mawala ang imong kaguol. Pero makadasig ang eksperyensiya ni Vanessa. Siya miingon, “Abi nimog dili na mawala ang imong kaguol, pero anam-anam ra ning mawala.”

Hinumdomi nga bisag mingawon ka pirme sa imong minahal, may pulos gihapon ang imong kinabuhi. Pinaagi sa mahigugmaong tabang sa Diyos, posible gihapon ang kinabuhi nga may katuyoan ug malipay gihapon ka uban sa maayong mga higala. Ug hapit na gyong banhawon sa Diyos ang mga patay. Gusto niya nga magakos nimo pag-usab ang imong minahal. Ug ang kasakit nga naa sa imong kasingkasing mawala na hangtod sa hangtod!