Nakalahutay Gihapon Bisan pa sa Kalisod

Ingon sa gitagna sa Bibliya, kita nagkinabuhi sa “makuyaw nga mga panahong lisod sagubangon.” (2 Timoteo 3:1) Ang kasamok sa pamilya, mga sakit, ug problema sa panalapi maoy pipila lamang sa mga kababagan nga naghasol tingali kanimo. Usahay, tingali mobati ka nga dili na makalahutay. Bisan pa niana, ikaw posible nga makalahutay gihapon bisan pa sa kalisod. Tagda ang mosunod nga ilustrasyon.

Ang Teide violet motubo sa gihabogong duolan sa 3,700 metros diha sa isla sa Tenerife duol sa baybayon sa Amihanang Aprika. Ang Pico de Teide, ang tuktok sa bolkan nga maoy gibasehan sa ngalan sa bulak, nagbuntaog niining islaha nga duol sa tropiko. Ang ibabawng mga bakilid niini morag walay tanom. Apan sa tingpamulak, ang tubig gikan sa matunaw nga niyebe makapabuhi niining lig-ong mga bulak nga nakahatag ug katahom sa mga bakilid sa bolkan tungod sa purpura nga mga bulak niini. Oo, kining bulaka morag huyang ug luming nga tan-awon, apan kini mabuhi ug makalahutay pa gani niining umaw ug dili-maayo nga palibot.

Sama sa Teide violet, ikaw usab makalahutay bisan pa sa malisod nga mga kahimtang. Ang Bibliya nakatabang sa daghang Saksi ni Jehova sa paglahutay bisan sa malisod kaayong mga panahon. Pananglitan, kadtong nabilanggo sa mga kampo konsentrasyon sa Nazi nga Alemanya nagmalahutayon. “Walay laing grupo ang gimaltrato pag-ayo kay kanila,” matod pa sa Swekong magsusulat nga si Björn Hallström, “apan tungod sa ilang pagtuo sa Diyos, mas nakalahutay sila kay sa uban.”

Bisag unsa pa ang imong kahimtang, ang Bibliya makatabang kanimo nga makalahutay bisan pa sa kalisod. Kontaka ang mga Saksi ni Jehova diha sa imong komunidad, o pagsulat sa adres nga makita sa panid 5 niining magasina alang sa libreng pagtuon sa Bibliya sa balay.