ANG GIINGON SA PIPILA: “Ang Diyos maoy nagmando sa kalibotan, busa siya ang nagpahinabo sa mga kalamidad; busa mapintas gyod siya.”

ANG GIINGON SA BIBLIYA: “Ang tibuok kalibotan nailalom sa gahom sa usa nga daotan.” (1 Juan 5:19) Kinsa ang “usa nga daotan”? Ang Bibliya nagpaila kaniya ingong si Satanas. (Mateo 13:19; Marcos 4:15) Lisod ba kanang tuohan? Hunahunaa kini: Kon si Satanas ang nagmando sa kalibotan, nan iyang impluwensiyahan ang mga tawo nga mahimong hakog, dalo, ug mubog-panglantaw sama niya. Dili ba makatabang kana sa pagpatin-aw kon nganong ang mga tawo nag-abuso sa yuta? Daghang eksperto ang nagpasidaan nga ang maong pag-abuso makaamot sa pagtungha sa mga kalamidad—mahimong kini ang hinungdan niini, magpasamot niini, o ang magpameligro sa mga tawo.

Nan, nganong gitugotan man sa Diyos si Satanas nga makaimpluwensiya pag-ayo sa mga tawo? Atong mahibaloan ang tubag kon atong balikan ang sinugdanan sa kasaysayan sa tawo, dihang ang atong unang ginikanan mirebelde sa pagmando sa Diyos. Sukad niadto ang kadaghanan sa katawhan mirebelde sa Diyos. Tungod niana, ang mga tawo sa kalibotan nailalom sa pagmando sa kaaway sa Diyos, si Satanas. Busa si Jesus nagtawag kang Satanas ingong “magmamando niining kalibotana.” (Juan 14:30) Si Satanas ba magmando hangtod sa hangtod? Dili!

Si Jehova * dili kay wala magpakabana sa pag-antos nga gipahinabo ni Satanas. Gani, ang Diyos nasakitan pag-ayo sa pag-antos sa tawo. Pananglitan, bahin sa malisod nga panahon nga naagoman sa nasod sa Israel, ang Bibliya nag-ingon bahin sa Diyos: “Sa panahon sa tanan nilang kasakit kadto nakapasakit kaniya.” (Isaias 63:9) Tungod sa iyang kaluoy, gihikay sa Diyos nga taposon ang mapintas nga pagmando ni Satanas—sa dili madugay! Iyang gitudlo ang iyang Anak, si Jesu-Kristo, ingong makiangayon ug matarong nga Hari sa walay kataposan.

KON SA UNSANG PAAGI KA NALANGKIT: Ang pagmando ni Satanas wala makapanalipod sa katawhan batok sa mga kalamidad, apan ang pagmando ni Jesus makahimo niana. Kas-a gipanalipdan ni Jesus ang iyang mga tinun-an panahon sa makusog nga unos. Ang Bibliya nag-ingon: “[Iyang] gibadlong ang hangin ug miingon sa dagat: ‘Hilom! Magmalinawon!’ Ug ang hangin milurang, ug miabot ang dakong kalinaw.” Ang mga tinun-an miingon: “Kinsa ba gayod kini siya, kay bisan ang hangin ug ang dagat mopatuo man kaniya?” (Marcos 4:37-41) Ang maong hitabo nagpasalig kanato nga panalipdan ni Jesus ang tanang masinugtanong katawhan panahon sa iyang paghari.—Daniel 7:13, 14.