Ang Bibliya naghisgot ug duha ka pangunang rason. Una, bisag daghan na ang nalampos sa mga tawo, wala sila lalanga nga may katakos sa pagtultol sa ilang mga lakang. Ikaduha, napakyas ang laraw sa mga tawo kay “ang tibuok kalibotan nailalom sa gahom sa usa nga daotan,” si Satanas nga Yawa. Busa ang paningkamot sa mga tawo wala gayod makapatunghag kalinaw sa kalibotan.—Basaha ang Jeremias 10:23; 1 Juan 5:19.

Ang kahakog ug ambisyon sa tawo maoy hinungdan usab kon nganong lisod makab-ot ang kalinaw sa kalibotan. Ang gobyerno nga makatudlo sa mga tawo sa paghigugma kon unsay matarong ug sa pagpakitag kahingawa sa usag usa mao lamang ang makapatunghag kalinaw.—Basaha ang Isaias 32:17; 48:18, 22.

Ang Labing Gamhanang Diyos nagsaad nga magpatungha siyag usa ka gobyerno nga magmando sa tanang katawhan. Kini mopuli sa tawhanong mga gobyerno. (Daniel 2:44) Ang Anak sa Diyos, si Jesus, magmando ingong Prinsipe sa Pakigdait. Wagtangon niya ang tanang pagkadaotan sa yuta ug tudloan ang mga tawo sa dalan sa kalinaw.—Basaha ang Isaias 9:6, 7; 11:4, 9.

Ubos sa pagtultol ni Jesus, minilyon na karon ang naggamit sa Pulong sa Diyos, ang Bibliya, aron tudloan ang mga tawo sa pagpakigdait sa uban. Sa dili madugay, magmalinawon na ang kalibotan.—Basaha ang Isaias 2:3, 4; 54:13.