Ang Diyos mamati sa mga tawo sa tanang kanasoran. (Salmo 145:18, 19) Ang iyang Pulong, ang Bibliya, nagdasig nato nga isulti kaniya ang bisan unsa nga atong gikabalak-an. (Filipos 4:6, 7) Apan, may mga pag-ampo nga dili makapahimuot sa Diyos, sama sa balikbalik ug sinag-ulong mga pag-ampo.—Basaha ang Mateo 6:7.

Dugang pa, dili dunggon ni Jehova ang pag-ampo sa mga tawo nga tinuyong nagsalikway sa iyang balaod. (Proverbio 28:9) Pananglitan, sa kapanahonan sa Bibliya, ang Diyos wala mamati sa mga Israelitas nga sad-an sa pagbuno. Tin-aw nga kinahanglan natong kab-oton ang pipila ka kinahanglanon aron kita pamation sa Diyos.—Basaha ang Isaias 1:15.

Dili kita makaampo sa Diyos kon wala kitay pagtuo. (Santiago 1:5, 6) Kinahanglang kombinsido kita nga siya naglungtad ug nahingawa kanato. Mapalig-on nato ang atong pagtuo pinaagi sa pagtuon sa Bibliya kay ang tinuod nga pagtuo gipasukad sa ebidensiya ug mga pasalig nga makaplagan sa Pulong sa Diyos.—Basaha ang Hebreohanon 11:1, 6.

Kinahanglang sinsero ug mapainubsanon kita dihang mag-ampo. Bisan ang Anak sa Diyos, si Jesus, mapainubsanon dihang nag-ampo. (Lucas 22:41, 42) Busa, imbes diktahan ang Diyos kon unsay buhaton, kinahanglang maningkamot kita nga masabtan ang iyang mga kinahanglanon pinaagi sa pagbasa sa Bibliya. Dayon makaampo kita uyon sa iyang kabubut-on.—Basaha ang 1 Juan 5:14.