“Dugay na gyod kong nagpaabot niini—19 na ka tuig!” Unsay gipaabot sa atong igsoon? Ang Bag-ong Kalibotang Hubad sa Kristohanon Gregong Kasulatan sa iyang pinulongan nga Bengali. Ingon sab niana ang reaksiyon sa daghan dihang gi-release ang Bag-ong Kalibotang Hubad sa ilang pinulongan. Pero nahibalo ba ka kon unsay nalangkit sa paghubad ug paghimo niini nga mga Bibliya?

 Una, dunay team sa mga maghuhubad nga iasayn ubos sa direksiyon sa Komite sa Pagpanulat sa Nagamandong Lawas. Unsa ka dugay hubaron sa team ang Bibliya? Si Nicholas Ahladis, nga nagtrabaho sa Translation Services sa Warwick, New York, miingon: “Nagdepende kana sa kahimtang, apil niana kon pila ka maghuhubad ang gigamit sa maong proyekto, kon unsa ka komplikado ang pinulongan, ug kon masabtan ba sa mga magbabasa ang kultura panahon sa Bibliya, apil na pod kon ang pinulongan managlahi sa matag rehiyon. Sa aberids, moabot ug usa ngadto sa tulo ka tuig ang paghubad pa lang sa Kristohanon Gregong Kasulatan ug sagad upat ka tuig o kapin pa ang paghubad sa tibuok Bibliya. Ang proseso mas dugay diha sa mga sign language.”

 Gawas sa team nga maghubad sa Bibliya, duna pay laing gikinahanglan. Usa ka grupo sa mga outside reader nga lainlaig kagikan—ug usahay gikan sa lainlaing nasod—ang mobasa sa gihubad ug mo-review niini nga walay bayad. Ang ilang mga komento makatabang sa mga maghuhubad sa pagseguro nga ang hubad sa Bibliya tukma, tin-aw, ug sayong sabton. Sumala sa usa ka tigbansay sa paghubad ug Bibliya sa South Africa, “ang mga maghuhubad mibati nga dako kaayo silag responsibilidad ngadto kang Jehova ug sa mga magbabasa sa iyang Pulong.”

 Human sa paghubad, ang mga Bibliya kinahanglang iimprenta ug i-bookbind. Aron mahimo kana, ang mga imprentahan naggamit ug labing menos 10 ka materyales: papel, tinta, cover sa Bibliya, papilit, cover liner, silver leaf, ribbon, headband, spine stiffener, ug ang materyales nga gamiton sa pag-bind sa Bibliya. Niadtong 2019, halos 1 billion pesos (kapig 20 million U.S. dollars) ang nagasto para lang niini nga mga materyales. Ang mga nagtrabaho sa atong Printery migugol ug kapig 300,000 ka oras nianang tuiga sa paghimo ug pagpadala sa mga Bibliya.

 Nganong dako kaayong panahon ug kuwarta ang gigamit para niini? “Ang Bibliya mao ang pinakaimportanteng publikasyon nga atong ginahimo,” miingon si Joel Blue sa International Printing Department. “Busa gusto nato nga ang hitsura niini makapasidungog sa Diyos nga atong gisimba ug sa mensahe nga atong gisangyaw.”

 Gawas sa regular nga mga edisyon sa Bag-ong Kalibotang Hubad, nagahimo sab tag mga Bibliya para sa mga magbabasa nga may espesyal nga panginahanglan. Pananglitan, ang braille nga Bag-ong Kalibotang Hubad mabatonan sa 10 ka pinulongan. Maabtan ug mga walo ka oras ang paghimo sa kompletong braille nga Bibliya. Ug kon ilaray ang tanang volume niini, moabot kinig labing menos 2.3 metros (7.5 piye). Naghimo sab tag espesyal nga edisyon sa Bibliya para sa mga piniriso sa prisohan diin ang libro nga puwedeng ipasulod kadto lang papel ang cover.

 Ang Bag-ong Kalibotang Hubad dunay epekto sa kinabuhi sa mga magbabasa niini. Usa ka pananglitan niana ang kongregasyon nga Kiluba ug pinulongan sa lugar nga gitawag ug Tombe, nga naa sa Democratic Republic of the Congo. Kon biyaheon pinaagig sakyanan, kapig 1,700 kilometros (1,000 milya) ang gilay-on sa Tombe gikan sa kaulohan sa nasod. Usa ra ka Bibliya ang gigamit sa mga Saksi didto, ug kinaraan nga Kiluba ang hubad niini. Kana nga Bibliya gipasapasa sa mga igsoon aron makapangandam sila sa mga bahin sa tigom. Pero sukad niadtong Agosto 2018, ang kompleto nga Bag-ong Kalibotang Hubad diha sa modernong Kiluba nga pinulongan mabatonan na sa tibuok kongregasyon.

 Ang sister nga German ug sinultihan miingon bahin sa rebisadong Bag-ong Kalibotang Hubad nga German: “Sa una, moingon ko nga kinahanglan kong mobasag Bibliya. Pero karon moingon na ko, ‘Eksayted na kong mobasa sa sunod.’” Usa ka piniriso ang misulat: “Gitagaan kog kopya sa Bag-ong Kalibotang Hubad, ug nakapausab ni sa akong kinabuhi. Mas nasabtan nako ang Pulong sa Diyos sukad nga nagbasa ko niini nga hubad. Gusto kong mahibalog dugang bahin sa mga Saksi ni Jehova ug kon unsaon nga mahimong Saksi.”

 Ang tanang magbabasa sa Bag-ong Kalibotang Hubad mapasalamaton sa mga donasyon nga nakatabang sa paghimo niini. Kini nga mga donasyon para sa worldwide work gi-donate gamit ang mga paagi nga makita sa donate.dan124.com. Salamat sa inyong pagkamahinatagon.