Ang Ebanghelyo naghisgot sa tawo nga ginganlag Juan nga Tigbawtismo, nga nagsangyaw sa Judea bahin sa Gingharian sa Diyos. Sakto ba ang rekord sa Bibliya bahin kaniya? Konsideraha ni:

•   Ang Bibliya nag-ingon: “Niadtong mga adlawa si Juan nga Tigbawtismo miabot sa kamingawan sa Judea ug nagwali, nga nag-ingon: ‘Paghinulsol mo, kay ang Gingharian sa langit haduol na.’” (Mateo 3:1, 2) Mapamatud-an ba ni sa sekular nga mga reperensiya? Oo.

   Ang historyano sa unang siglo nga si Flavius Josephus naghisgot sa tawo nga ginganlag “Juan, nga ang apelyido maoy Tigbawtismo,” kinsa “nagpahimangno sa mga Hudiyo nga magkinabuhi sa matarong nga paagi,” “magpakitag debosyon sa Diyos,” ug “magpabawtismo.”—Jewish Antiquities, Book XVIII.

•   Ang Bibliya nag-ingon nga gibadlong ni Juan si Herodes Antipas, ang magmamando sa distrito sa Galilea ug Perea. Si Herodes nangangkon nga siya usa ka Hudiyo nga nagsunod sa Balaod. Gisaway ni Juan si Herodes kay iyang giminyoan si Herodias nga asawa sa iyang igsoon. (Marcos 6:18) Kini nga detalye gipamatud-an sa sekular nga reperensiya.

   Ang historyano nga si Josephus miingon nga si Antipas “nahigugma kang Herodias” ug “walay kokaulawng miprangka nga makigminyo siya kaniya.” Misugot si Herodias ug gibiyaan niya ang iyang bana aron makigminyo kang Antipas.

•   Ang Bibliya nag-ingon nga “ang mga tawo sa Jerusalem ug sa tibuok Judea ug sa tanang kayutaan libot sa Jordan nangadto [kang Juan], ug sila iyang gibawtismohan sa Suba sa Jordan.”—Mateo 3:5, 6.

   Kini nga detalye gipamatud-an sab ni Josephus kay misulat siya nga “panonpanon” sa mga tawo ang nangadto kang Juan ug nga sila “nadasig pag-ayo sa iyang mga gipanudlo.”

 Klaro nga ang unang siglong historyano nga si Josephus naghunahuna nga si Juan nga Tigbawtismo nabuhi kaniadto. Mao sab nay atong ikahinapos.