“Mora Lang Silag Usa ka Pamilya,” matod pa sa ulohan sa mantalaan sa Frankfurter Rundschau. Kadtong nanambong miuyon niini.

“Giabiabi ko nila pag-ayo!” matod ni Karla nga taga-Puerto Rico.

“Akong gibati nga morag mibisita lang ko sa akong pamilya didto sa laing nasod,” matod ni Sara nga taga-Australia.

Nganong mao kini ang ilang gibati? Tungod sa internasyonal nga kombensiyon sa mga Saksi ni Jehova nga gihimo didto sa Commerzbank-Arena sa Frankfurt am Main, Germany, niadtong Hulyo 18-20, 2014. Halos 37,000 ang nanambong sa kombensiyon.

Ang mga tumatambong nagtigom aron makakat-on sa Bibliya. Lakip sa programa mao ang pagbasa sa Bibliya, awit, pag-ampo, duha ka drama, ug makapadasig nga mga pakigpulong nga pinasukad sa Bibliya.

Lakip sa mga tumatambong ang mga Saksi sa Germany ug kapin sa 3,000 ka delegado gikan sa Australia, Britain, Greece, Lebanon, Serbia, South Africa, ug sa United States. Mga 234 ka Saksi gikan sa 70 ka nasod nga anaa sa espesyal nga bug-os panahong pag-alagad, sama sa misyonaryo, ang mitambong usab.

Ang ubang bahin sa programa gikonektar pinaagig live video streaming ngadto sa 19 ka lainlaing dapit sa Germany ug sa uban pang mga tigomanan sa Austria ug Switzerland. Ang katibuk-ang nanambong maoy 204,046.

Sa Frankfurt, ang gigamit nga pinulongan sa programa mao ang Iningles, German, ug Greek. Sa ubang mga dapit, kini dungang gihubad ngadto sa 17 ka pinulongan, lakip ang Arabic, Chinese, Tamil, Turkish, ug duha ka sign language.

Bisag ang mga Saksi lainlaig pinulongan ug gikan sa daghang kayutaan ug kultura, wala sila mabahinbahin. Sila nahiusa sa gugma. (Juan 13:34, 35) Ilang giisip ang matag usa ingong igsoon.

“Among nasaksihan mismo nga nabuntog sa internasyonal nga panag-igsoonay ang bisan unsang pagpihigpihig,” matod ni Tobias nga taga-Britain.

“Nahibalag ko ang akong mga igsoon sa pagtuo gikan sa 20 ka nasod. Kami nahiusa tungod sa among gugma sa Diyos ug sa matag usa,” matod ni Davianna, nga naggikan sa Puerto Rico.

“Usa ko ka Saksi ni Jehova nga nagpuyo sa baryo,” matod ni Malcom, nga usa ka delegado gikan sa Australia. “Nakabasa ko bahin sa atong talagsaong panag-igsoonay sa tibuok kalibotan ug nakatan-awg mga video bahin niini. Pero lahi ra gyod kaayo kon personal nimo kining nasinatian. Makapalig-on kaayo sa pagtuo nga mitambong ko dinhi.”

Ang mga Saksi gikan sa 58 ka kongregasyon sa lainlaing dapit sa Frankfurt nag-andam ug panggabii nga mga programa alang sa paglingaw sa mga delegado ug nanghatag usab ug mga gasa.

Si Cynthia nga taga-United States miingon: “Among nasinati ang talagsaon nga pagkamaabiabihon. Di nako makalimtan ang kalalom sa gugma sa mga igsoon, ang ilang kaayo, ug pagkamahinatagon.”

“Dihay kasadya, tiunay nga gugma, ug inigsoong pagmahal. Daghan kaayo mig nakat-onan sa usag usa,” matod ni Simon, nga nagpuyo sa Germany.

“Ang programa nga gihimo nianang gabhiona nagpamatuod nga ingong Saksi ni Jehova, dili ta killjoy. Makamao pod tang maglingawlingaw,” matod ni Amy, delegado nga taga-Australia.

Ang kombensiyon sa Frankfurt maoy usa lamang sa serye sa internasyonal nga mga kombensiyon nga gihimo sa siyam ka nasod sa tibuok yuta.

Sa dihang gipangutana ang usa ka delegado kon komosta ang iyang pagtambong sa kombensiyon sa Frankfurt, siya miingon: “Handurawa nga nagkita mo sa usa ka tawo, unya wa ka magdahom nga imo diay siyang igsoon sa unod. Pagkita ninyo, iya kang gipadayon sa iyang balay ug giabiabi pag-ayo. Dili matukib ang imong kalipay. Unya pilopiloa kana nga kalipay ngadto sa 37,000! Ingon ana ang akong gibati sa dihang mitambong ko sa maong kombensiyon.”