Ang tinahod nga organisasyon sa konstruksiyon sa Britain mihatag ug komendasyon sa mga Saksi ni Jehova tungod sa ilang pagbansay sa mga babaye ingong mga operitor sa mga heavy equipment diha sa bag-ong site sa ilang sangang buhatan duol sa Chelmsford, Essex. Ang Considerate Constructors Scheme * (CCS) mihatag ug kinatas-ang rating nga 10 sa mga Saksi tungod sa ilang pagbansay sa mga babaye sa konstruksiyon ug miingon nga kini maoy “bag-ong paagi.” Nganong taas kaayo ang rating?

Sa Britain, wala ray 13 porsiyento ang mga babaye nga nagtrabaho sa konstruksiyon. Sumala sa surbi nga gihimo sa usa ka kompaniya sa Britain, wala kaayoy babaye nga ganahang motrabaho sa konstruksiyon. Pero sa construction team sa Chelmsford, mga 40 porsiyento ang babaye. Ug gani, sa team sa mga operitor ug heavy equipment kapig 60 porsiyento ang babaye.

Nganong milampos ang Saksing mga babaye? Dakog tabang ang pagbansay ug ang suporta. Ang pagbansay ug suporta apil sab sa standard requirements sa CCS. Ang maong standard requirement nagdasig sa mga constructor nga pabilhan ang ilang mga trabahante pinaagi sa “pagseguro nga ang tanan respetohon, trataron nga patas, dasigon ug suportahan diha sa trabahoan,” ug pinaagi sab sa “pagbansay.”

Si Jade, usa sa mga gibansay sa pag-operit ug excavator ug dump truck, miingon: “Grabe! Dili ko makatuo nga nahimo to nako. Lisod usahay ang trabaho, pero padayon ko nilang gibansay ug daghan kog nakat-onan.” Sama kang Jade, si Lucy operitor pod ug heavy equipment. Siya miingon: “Sa una nakong pag-adto sa site, wala gyod koy bisan unsang skill. Pero sukad sa pag-abot nako, ila kong gibansay. Gikan adto, nakatrabaho ko sa lima ka lainlaing team, maong nabansay ko pag-ayo!”

Ang mga babaye dili lang hawod sa pag-operit ug makina. Si Eric, nga lider sa usa ka team, miingon: “Ang mga babaye mas maayong moatiman sa mga equipment kay sa mga lalaki, ug maayo kaayo silang momatikod kon naay problema sa makina ug ireport kini.”

Si Carl, nga lider sa pipila ka team nga nag-operit ug heavy equipment, miingon: “Bilib kaayo ko sa pag-operit sa mga babaye ug makina. Usahay, mas ganahan ko nga silay mooperit kay sa mga eksperyensiyadong lalaki!”

Dihang ipakita sa mga lider sa team ang ilang suporta para sa ilang kaubang mga trabahante, ilang gitabangan sila nga makabatog kompiyansa. Mao nay kahimtang ni Therese. Ingong eksperyensiyadong operitor, nahibalo siya nga kon heavy equipment nay hisgotan, importante kaayo ang pag-abaga sa responsibilidad ug ang paghimog desisyon aron maseguro nga walay madisgrasya. Si Therese miingon: “Tungod sa suporta sa lider sa among team, mas daghan kog mahimo kay sa akong gidahom kay gibati nako nga naa siyay pagsalig nako. Mibati ko nga wala masayang ang akong paghago kay nahibalo ko nga gipabilhan ug gitahod sa uban ang akong mga nahimo!”

Si Abigail, nga operitor sab ug excavator ug dump truck, nakadayeg sa suporta ug kooperasyon nga gipakita kaniya: “Wala ko gipakamenos sa mga lalaki sa trabahoan. Andam silang motabang, pero dili sila mangilog ug trabaho. Ako gihapoy ilang patiwason.”

Gawas sa pag-operit ug lainlaing heavy equipment, ang mga babaye sa Chelmsford gibansay sab sa ubang trabaho sama sa pagsurbi, saktong paggamit sa yuta, pag-ayog makina, ug pagtaod ug scaffold. Si Robert, nga nagtrabaho uban sa mga babaye miingon nga sila “pokus, ganahang motrabaho, ug maayo sa detalye.” Si Tom, nga naasayn sa pagsurbi, midugang: “Ang mga babaye sa akong team maayo sa trabaho ug kugihan. Gusto nila nga sakto ang trabaho.”

Dili ikatingala nga ang lider sa team nga si Fergus malipayong miingon: “Naa gyoy lugar ang mga babaye sa konstruksiyon!”