ISHOMO RYA 19
Mbehi Abahamya ba Yehova ni Abakristo ab’amazima?
Itwe Abahamya ba Yehova nitumanya ku turi Abakristo ab’amazima. Ahabw’enki? Ni nkahe ahu enyikiriza zitu zegamire? Ahabw’enki nitwetwa Abahamya ba Yehova? Ni bata oku turi kwereka ku nitukundana?
1. Ni nkahe ahu enyikiriza z’Abahamya ba Yehova ziri kuba zegamire?
Yesu akagamba ati: ‘Ekigambo ca [Ruhanga] ni go mazima.’ (Yohaana 17:17) Enyikiriza z’Abahamya ba Yehova nizitura zegamire aha Kigambo ca Ruhanga nk’oku Yesu yakikozire. Reba enkuru z’omuri obu bwire. Omu mwaka gwa 1870, omutwe gw’abantu abine emitima mirungi bakatandika kushwijuma eki Bibuli eri kwegesa. Bakatandika kukora ebi Bibuli eri kugamba n’obu byabire biri kutana n’enyegesa z’agandi madini. Bwanyima bakatandika kugambira abandi ebi bayegire omuri Bibuli. *
2. Ahabw’enki nitwetwa Abahamya ba Yehova?
Abahereza ba Yehova nabeta Abahamya beye ahakuba nibagambira abandi ebiri kumukwataho. (Abaheburaayo 11:4–12:1) Ecokureberaho: Omu bwire bwa kare, Ruhanga akagambira abantu beye ati: ‘Muri bakarebi b’okuhamya ebyange.’ (Shoma omuri Isaaya 43:10.) Yesu nayetwa ‘[Omuhamya] w’omwesigwa.’ (Okushuuruurwa 1:5) Ni yo nshonga omu mwaka gwa 1931 twatandikire kwetwa Abahamya ba Yehova. Nitushemererwa kuba turi kwetwa eryo zina.
3. Ni bata oku Abahamya ba Yehova bari kutoreza Yesu bari kwereka rukundo?
Yesu akaba nakunda abegi beye munonga kandi bakaba bari nk’abanyabuzare beye. (Shoma omuri Mako 3:35.) Ni co kimwe, Abahamya ba Yehova ni eka emwe eyine obumwe. Ni yo nshonga turi kwetana benetata na banyanyazi. (Filemooni 1, 2) Nambwenu nitworobera ekiragiro ekiri kugira ngu: ‘Mukunde benetata.’ (1 Petero 2:17) Abahamya ba Yehova niberekana rukundo bari kuyamba Abakristo bagenzi babo omu bwire obu bari kwetenga obuyambi.
YEGA BYINGI
Yega byingi aha Bahamya ba Yehova kandi orebe ebindi bihamya ebiri kwereka ku bari Abakristo ab’amazima.
Enyikiriza z’Abakristo ab’amazima zegamire ahari Bibuli kandi nibazigambira abandi
4. Enyikiriza zitu zegamire ahari Bibuli
Yehova akagamba ku omu biro by’aha muheru okumanya kwabire kurije kweyongera. Shoma omuri Danieli 12:4, rero muganire ahari eki kibuzo:
-
Ni enki ecabire ‘kirayeyongere’ ku abahereza ba Ruhanga babire baragumizemu kushwijuma Bibuli?
Reba oku abegi ba Bibuli harimu na Charles Russell, bayegire Ekigambo ca Ruhanga. Zana VIDIYO, rero bwanyima muganire ahari eki kibuzo.
-
Nk’oku wakireba omuri vidiyo, ni bata oku Charles Russell n’abegi ba Bibuli bagenzi beye bayegire Bibuli?
Waba nokimanya?
Tukaguma turi kuhindura omu nyikiriza zitu. Ahabw’enki? Nk’oku omushana guri kuguma nigweyongera kikatuma hahwezeka, ni ko Ruhanga yagenzire natuma abantu bacenga Ekigambo ceye mporampora. (Shoma omu Nfumu 4:18.) Obwe rero n’obu Bibuli etari kuhinduka, ku turi kukizaho kushoborocerwa amazima agarimu nituhindura omu nyikiriza zitu.
5. Nitubaho turi kubuganisa n’izina ryitu
Ahabw’enki nitwetwa Abahamya ba Yehova? Zana VIDIYO, rero muganire ahari eki kibuzo.
-
Ahabw’enki tuhikire kwetwa Abahamya ba Yehova?
Ahabw’enki Yehova yatorine abantu ngu babe Abahamya beye? Ni ahabw’okuba babire barije kwereka ku ni Ruhanga ow’amazima ahakuba nagambwaho ebishuba byingi. Reba bibiri omuri byo.
Amadini gamwe nigegesa abakurasi bago ku Ruhanga ari kwenda ngu bakorese ebishushani omu kuramya kwabo. Konka, shoma omu Baleevi 26:1, rero muganire ahari ebi bibuzo:
-
Bibuli nekigambaho enki? Yehova nareba ata ebishushani?
Amadini gamwe nigegesa ku Yesu ari Ruhanga. Mbehi ago ni amazima? Shoma omuri Yohaana 20:17, rero muganire ahari ebi bibuzo:
-
Eki cahandikirwe nikibigambaho enki? Mbehi Yesu ni Ruhanga?
-
Mbehi noyehurira ota wamanya ku Yehova yatorine Abahamya beye ngu baburire ebiri kumukwataho n’Omwana weye?
6. Nitukundana
Bibuli negeranisa Abakristo n’ebicweka by’omubiri. Shoma omu 1 Bakorinso 12:25, 26, rero muganire ahari ebi bibuzo:
-
Ni bata oku Abakristo b’amazima bashemerire kwehurira Omukristo mugenzi wabo yaba ari kubonabona?
-
Ni biha bintu ebi wayerebire bikakwereka ku Abahamya ba Yehova bari kwerekana rukundo?
Abahamya ba Yehova b’omu ihanga rimwe ku bari kuhikwaho ebizibu, ab’omu gandi mahanga nibahika bari kugira eki bakora ngu babayambe. Kugira ngu orebe ecokureberaho, zana VIDIYO. Bwanyima muganire ahari eki kibuzo.
-
Ni bata oku oburyo obu Abahamya ba Yehova bari kuyambamu abahikirweho ebihikirizi biri kwereka rukundo?
Abakristo ab’amazima nibereka rukundo abari kwetenga obuyambi
ABANTU ABAMWE NIBAGAMBA NGU: “Abahamya ba Yehova ni akadini ka juba aha.”
-
Ni ryari obu Yehova yatandikire kweta abahereza beye Abahamya?
EMPINYE
Abahamya ba Yehova ni Abakristo b’amazima. Turi eka emwe y’abahereza ba Yehova y’omu nsi yona kandi enyikiriza zitu zegamire ahari Bibuli. Nambwenu nitugambira abandi ebiri kukwata ahari Yehova.
Wayega ki?
-
Ahabw’enki nitwetwa Abahamya ba Yehova?
-
Ni bata oku turi kutwarizana?
-
Mbehi notekateka ngu Abahamya ba Yehova ni Abakristo ab’amazima?
CONDOZA
Yega byingi ebiri kutukwaho.
Abahamya ba Yehova bakereka okwikiriza—Ekicweka ca 1: Bari kuruga omu mwirima (1:01:27)
Reba oku abahamya ba Yehova basherekwire enyegesa z’ekishuba.
Tunga ebyokugarukamu by’ebibuzo ebi ori kwebuza aha Bahamya ba Yehova.
“Ebibuzo ebi abantu bari kukunda kwebuza aha Bahamya ba Yehova” (Ahari jw.org)
Stephen akekwatanisa omu kurwanisa abantu b’obundi bwoko. Reba eki yarebire omu Bahamya ba Yehova kikatuma yahinduka.
“Nkaba ninkizaho kuba mubi” (Omunara g’Omurinzi, gw’aha kiro ca 1, Okwamushanju 2015)
^ Abahamya ba Yehova bakatandika kushohora Omunara g’Omurinzi oguri kushoborora amazima g’omuri Bibuli omu mwaka gwa 1879.
