Rosie a erá: “Ua chék akkaúreki ekkóch mettóch, me a fen lapóló ren ai akkanchangei pwe epwe fis met mi fókkun efeiengaw.” Menni wokisin seni Paipel a álisi? Eú me leir, ina Mateus 6:34: “Ousap öürek usun ewe rän lesor, pun lesor epwe püsin anafa öürekin lon. Eu me eu rän epwe püsin wor osukosuken lon.” Iei Rosie a apasa pwe alon Jesus kana ra álisi an esap chúen akkaúreki met epwe tongeni fis lesor. A pwal apasa, “A fen naf ai osukosuk iei, iwe esap fen pwal kapachetá ren ai aúreki met esaamwo fis me neman esap fen wesewesen fis.”

Yasmine a pwal mirititi pwe aúrek a poputá le nemenaló. A erá: “Ua kan kechiw ren fitu rán lón eú wiik, me use tongeni méúr lón ekkóch pwiin. Ua meefi pwe ai kewe ekiek mi ngaw ra poputá le órómaeiló.” Menni wokisin a álisi? A féúni 1 Petrus 5:7: “Oupwe likiti ngeni Kot ämi öürek meinisin, pun i a ekieki met oupwe feiöch ren.” Yasmine a erá: “Ló, ló, ló, ua kan ikkiótek ngeni Jiowa me a pélúweni ai kewe iótek. Usun itá emén a angei seniei osei mi chou. Fán ekkóch, ekkewe ekiek mi ngaw ra kan liliwinitiei, nge iei ua silei katawer.”

Iei alon emén fépwúl itan Isabella: “Ai lúkú ua mwiri semei we lón an akkachopwa le féri mettóch. Ua kan mwo likitatiw met mi lamot ren ai upwe féri met ese  pwal wor lamotan, ren choweán asésé are katol TV. Akkachopwa a mmen efeiengaw pún a alapaaló aúrek me efisi án emén angangaw lón an angang. Ewe kapasen emmwen a álisi, ina ewe mi mak lón 2 Timoty 2:15: “Kopwe fokun achocho ngeni pwe Kot epwe tipeeu ngenuk, pwe kopwe eman chon angang esap säw ren an angang.” Isabella a erá: “Use mochen án Jiowa epwe sáwásini ai angang ren ai akkachopwa.” Iwe iei a feffeitá.

A pwal ina usun Kelsey, a erá: “A kan wor ai angang mi chék kaúk fansoun lón eú rán an epwe wes, nge ua chék akkachopwa le angang wóór nge epwele fen tori ewe fansoun mi kaúk. Iwe ua kan kechiw, use tongeni méúr, me ua lólilen. Ese éch ngeniei ena.” Kelsey a kúna álillis seni met a mak lón Än Salomon Fos 13:16: “Eman aramas mi mirit a föri an angang fän silelap, nge eman mi tiparoch a pwärifeili an umwes.” A apwóróusa ifa usun an ekilonei ena wokisin a álisi, a erá: “Alen tipachem án emén epwe ekiekéch me kkótéch me mwan lón met epwe féri. Iei ua kan onómu eú nei puk wóón ai we cheepel me makkeei lón ai kókkót fán iten met upwe féri. Ena mettóch a álisiei ai upwe kókkótéch me ai usap akkachopwa le féri ai kewe angang tori an a fen mmang.”

Iei met Kirsten a erá: “Pwúlúwei we a sú senikem me néúm kewe fémén semirit.” Menni kapasen emmwen lón Paipel a álisi? Än Salomon Fos 17:17 a erá: “Eman chiechiach a tongeekich fansoun meinisin, nge pwiich a nom rech pwe epwe alisikich lon fansoun riaföü.” Kirsten a kútta álillis seni chókkewe mi tongei Jiowa usun chék i. Met a kúna? Iei alon: “Chiechiei kewe ra álisiei lón chómmóng mettóch! Ekkóch ra etto me likitatiw mwéngé me péén irá ppen asamei we. Fán úlúngát ekkóch chiechiei kewe ra álisikem me nei kewe le mwékút ngeni pwal eú imw. Emén a álisiei le kút ai angangen moni. Chiechiei kewe ra chék mommolnetá le álisiei fansoun meinisin.”

Delphine, ewe sia fós usun me mwan, a pwal weires ren tipitipingaw. A chemeni ei mwirin an péút seni chómmóng mettóch, a erá pwe atun a kúna án aramas sópweló chék ar pwapwaiti manawer ren attongeer kewe, a meefi pwe a tipitipingaw. Eú wokisin a álisi, ina Kölfel 68:6, Kapasen God:  “A ngeni ekkewe aramas ese wor aramaser ew imwer pwe repwe nonnom non.” A erá: “Ua weweiti pwe ena wokisin ese chék fós usun wesewesen eú imw lón ei fansoun. Nge ua pwal weweiti pwe Kot a ngenikich eú imw lón pekin lúkú, ewe leeni mi wesewesen núkúnúkéch, ikewe sia kúna chiechi mi enlet me ririéch ngeni chókkewe mi pwal tongei Jiowa. Nge ua silei pwe use tongeni chiechi ngeni ekkewe ekkóch ika use lóóm chiechiéch ngeni Jiowa. Iwe, Kölfel 37:4 a álisiei ren ena, ewe mi erá: ‘Ewe Samol mi Lapalap i chök epwe om pwapwa, nge i epwe ngonuk mochenin lelukom.’”

A erá: “Ua mirititi pwe a lamot upwe fitipachei Jiowa. I chiechiei mi múrinné seni meinisin. Mwirin ua makketiw ekkewe mettóch ám me ekkewe ekkóch aua tongeni pwapwaiti le féri pwe ua tongeni ririéch ngeni chókkewe iir mi tongei Kot. Ua káé ai upwe chék afóta napanapéchún ekkewe ekkóch me usap pwal ekieki ar kewe apwangapwang.”

Pwúngún pwe chiechiach kewe mi angang ngeni Kot rese unuséch. Chón Pwáraatá Jiowa ra pwal angang weires le ataweei ar kewe osukosuk usun chék aramas meinisin. Nge pokiten ra káit seni Paipel, a amwékútúúr le álisi aramas iteitan mi suuk ngeniir. A eú alen tipachem ach sipwe chiechi ngeni ekkena sókkun aramas. Iwe nge, itá ekkewe kapasen emmwen lón Paipel ra pwal tongeni álisi aramas lón ar kewe osukosuk rese tongeni pwákini lón ei fansoun, áwewe chék ren watteen osukosuken péchékkúlen inisiir me letipeta?