Kot a ereni Atam: “Lon ränin om kopwe mongö seni [ewe irá], kopwe fokun mäla.” (Keneses 2:17) Ika Kot a féri Atam an epwe chinnapeló me máló, iwe ese wor lamoten án Jiowa ngeni ena allúk. Atam a silei pwe ika ese ocheei uwaan ena irá, iwe esap máló.

A wor chómmóng irá mi uwaaéch lón ewe tánipiin Eten Atam me Efa ra tongeni mwéngé seni, ina popun ese pwal lamot ar repwe mwéngé seni ena irá ren ar repwe manaw. (Keneses 2:9) Ika ena áeúin pean pwúpwúlú rese mwéngé seni ena irá, repwe pwári pwe ra álleasochisi ewe mi fang ngeniir manaw. A pwal pwári pwe ra mirititi án Kot pwúúng le emmweniir.

Ren ach sipwe weweiti ewe popun Atam me Efa ra máló, sipwe akkomw etittina eú pwóróusfengen mi fis mi kkúúkich meinisin ikenái. Satan ewe Tefil a néúnéú emén serepenit le ereni Efa eú kapas chofona mi fiti kirikiringaw. Ewe Paipel a erá: “Ewe serepenit a tipachemsolä seni ekewe man meinisin Kot ewe Samol mi Lapalap a föriir. Iwe, a eisini ewe fefin, ‘Ifa usun, Kot a wesewesen apasa pwe ousap fokun mongö seni ekewe irän ei tanipi?’”​—Keneses 3:1.

Iwe, Efa a pélúweni: “Äm aia tongeni mongö seni ekewe uän irän ei tanipi. Nge Kot a apasa pwe aisap fokun mongö seni uän ewe irä a nonom lukalapen ei tanipi, aisap pwal atapa. Pun are aipwe mongö seni, aipwe mäla.” Mwirin ewe serepenit a ereni: “Apwi, ousap fokun mäla. Pun Kot a silei pwe lon ränin ämi oupwe mongö seni, mesemi epwe nela. Iwe, oupwe wewe ngeni Kot o silei mine a öch pwal mine a ngau.” Satan a erá pwe Jiowa a chofona me a amwéchú och mettóch mi múrinné seni popuch kewe.​—Keneses 3:2-5.

Efa a lúkú met a rong. A ngoneiti ewe irá me ekieki pwe a mmen múrinné le mwéngé o apwapwa! A angetá me fichi fiteféú féún kewe me a poputá le ochooch. Iwe, Paipel a erá: “Mürin a ngeni pwülüan we, iwe, a pwal mongö.”​—Keneses 3:6.

A ifa me letipechoun Kot atun a kúna án néún kana mi áchengicheng filatá le álleasolapa! Iwe, met a féri? Jiowa a ereni Atam: “Kopwe wiliti pwül ka för seni. Pun pwül en, iei popun om kopwe wiliti pwül.” (Keneses 3:17-19) Iwe pokiten ena, “ierin manauen Atam meinisin tiwepükü ilik. Mürin a mäla.” (Keneses 5:5) Mwirin án Atam máló ese ló láng are sópweló le manaw lón pwal eú leenien ngún. Ese wor Atam me mwen án Kot féri i seni pwúl. Iwe atun a máló, a péút seni manawan me  inisin a wilisefáliti pwúl. Ese chúen manaw. A ifa me eletipechoun ena!

Pokiten Atam me Efa ra filatá ar resap álleasochisi Kot, iwe a péút seniir manawer mi unuséch me ewe tufichin manaw tori feilfeiló. A siwil napanapen inisiir, rese chúen unuséch me ra wiliti chón tipis. Nge ar tipisin álleasolap ese chék kkúú pwisin iir. Mwirimwiriir kewe ra álemwiri tipis seniir. Rom 5:12 a erá: “Ren eman mwän [Atam] tipis a tolong lon fanüfan, nge an tipis a atoto mäla. Iei popun mäla a tori aramas meinisin, pun ir meinisin ra tipis.”

Ewe Paipel a áweweei pwe tipis me máló ra usun ‘pwölüpwölün won mesen aramas,’ me “ewe pwölüpwölün letipeta a nonom wor.” (Aisea 25:7) Ena pwélúpwél a féteki aramas meinisin me a usun och ásepwál mi poison ese wor emén a tongeni sú seni. Ren enletin, “aramas meinisin ra mäla lon Atam.” (1 Korint 15:22) Iwe iei ewe kapas eis ewe aposel Paulus a eppiietá: “Iö epwe angasaei seni ei inis inisin mäla?” Mei wor emén epwe tongeni angasakich?​—Rom 7:24.