An Jises Kewe Manaman Met Kopwe Kaeo Seniir?

NEMAN kopwe ekis mairu le silei pwe ekkewe aramas mi makkei porausen manauen Jises lon ewe Paipel rese nounou ewe kapas lon fosun Krik a kan chiyaku ngeni “miracle” lon fosun Merika. Ra fen nounou ewe kapas lon fosun Krik dyʹna·mis. Ei kapas a tongeni chiyaku ngeni “miracle” lon fosun Merika nge a wesewesen wewe ngeni “manaman.” (Luk 8:46) A pwal tongeni chiyaku ngeni “tufich” are “foffor mi manaman.”​—Mattu 11:20; 25:15.

Ewe Paipel ese awewei won an Jises kewe manaman ussun chok ir nikinikin rau are otupotup aramas repwe pwapwa le katol. Ekkewe manaman ra pwaralo “manamanen Kot” mi amwarar ussun chok lon ewe atun Jises a asuaalo ewe timon a fen tota won emon at. (Luk 9:37-43) Ewe Kot Mi Lapalap Seni Meinisin​—ewe Emon a efisata mettoch “ren pochokkulen an manaman,” esap tongeni  efisata ekkena sokkun foffor mi manaman? (Aisea 40:26) Aapwi!

Ekkewe puken Kapas Allim ra awewei won 35 som manamanen Jises. Nge ese pwalo choochoon an kewe manaman meinisin. Ren chok awewe, Mattu 14:14 a apasa: “[Jises] a kuna eu pwin aramas mi chommong, o a tongei ir, o a apochokkulata ekkewe mi samau me leir.” Sise silei fitemon Jises a alisi lon ena fansoun.

Ekkena sokkun foffor mi manaman mi lamot ngeni leteloon an Jises kapas pwe i Noun Kot, ewe Messaia mi pwonetiu. Ewe Paipel a affata ngenikich pwe ewe manaman seni Kot a fen atufichi Jises an epwe fori sokkopaten manaman. Ewe aposel Piter a apasa pwe “Kot a pwaralo ngenikemi emon mwan, Jises re Nasaret, ren manaman, o minen aweitifengen, o pwal esisin, ekkewe mettoch Kot a fori ren i leimi usun chok oua pwisin sinei.”​—Fofor 2:22.

An Jises kewe manaman ra ririfengen me an afalafal. Mark 1:21-27 a pwalo ekiekin ewe pwin aramas ussun an Jises afalafal me eu me lein an kewe manaman. Mark 1:22 a apasa pwe ra “weitifengen ren an afalafal,” me wokisin 27 a affata pwe aramas ra “weitifengen” lupwen a asuaalo emon timon. An Jises kewe fofor mi manaman fengen me an we afalafal a anneta pwe i ewe Messaia mi pwonetiu.

Pisekin Annet

Met popun sia tongeni luku pwe an Jises kewe manaman ra wesewesen fisita? Ekieki mwo ekkoch ekkewe pisekin annet.

Lupwen Jises a fori ekkewe manaman, esap fan eu a sotun le alingaalo pwisin i. A tumunuoch pwe Kot ewe emon epwe lingelo pokiten ekkewe manaman. Ren chok awewe, mwen Jises a alisi emon mwan mi chun, a menlapei pwe ewe chikar epwe fis “pwe angangen Kot epwe pwapwalo lon i.”​—Jon 9:1-3; 11:1-4.

An Jises kewe manaman rese kapachelong ekkan eoreni are foffor mi pin lon pekin lamalam aramas ra ingeiti. Jises a fori an kewe manaman mwen mesen aramas, fan chommong mwen chommong aramas. Esor tenki mi tinkul are pisek mi sokkolo lapalaper, me esap minen amwara ren ifa ussun a foriir.​—Mark 5:24-29; Luk 7:11-15.

Fan ekkoch Jises a apasa pwe ewe emon a alisi a fokkun luku. Nge pwal mwo nge lupwen esor an ewe emon luku, Jises a chuen tongeni fori ewe manaman. Lupwen a nonnom lon Kaperneom lon Kalili, “ra walo ren i chommong ekkewe mi waananu, o a asulo ekkewe anu ren eu chok kapas, o a pwal apochokkulata ekkewe mi samau meinisin.”​—Mattu 8:16.

Jises a fori manaman ren an epwe alisata an aramas kewe osupwang, nge sap fan iten an epwe ainga aramas. (Mark 10:46-52; Luk 23:8) Me Jises ese fori ekkewe manaman ren an epwe angei winnan.​—Mattu 4:2-4; 10:8.

Ewe Emon A Efisata Ekkewe Manaman

Atittinen an Jises kewe manaman esap unusen pwonuta ika epwe aukuk ngeni poraus ussun ekkewe popun ra tongeni fisita. Lupwen ekkewe Puken Kapas Allim ra awewei won an Jises kewe manaman, ra pwaralo pwe i emon mwan mi ur ren tong mi alollon lap seni meinisin me a pwalo pwe a ekkekieki an aramas kewe osupwang.

Ekieki mwo porausen emon mi uri rupun pwotur a feilo ren Jises ren an epwe tingor alillis. “‘Are ka mochen, ka tongeni alimochuei.’ Iwe, ren an umoumoch, Jises a eitielo poun, a attapa atewe, me a apasa, ‘Ua mochen, kopwe limoch.’” Ewe mwan a limelimochulo lon ena seken. (Mark 1:40-42) Jises a pwaralo pwe a meefi meefien aramas me ina met a amwokutu i le aea an manaman seni Kot ren an epwe fori ekkewe manaman.

Eu lesen fan itach seni an Jises kewe manaman, pwe a fori ekkewe manaman “ren umoumoch” me a foriir ren an epwe alisi aramas. Nge porausen ekkewe manaman esap uruwo chok. Alon Ipru 13:8: “Jises Kraist mi usun we chok, lom, o ikenai, o feifeilo chok.” Iei Jises emon King lon lang. A tufich me a mmonleta le aea an manaman seni Kot. An aea ena manaman iei epwe fokkun lapalap seni an aea lupwen i emon aramas won fonufan. Arapakan chok, Jises epwe fori ekkewe manaman fan iten an epwe apochokkula chon fonufan mi alleasochis. Ekkewe Chon Pwarata Jiowa repwe pwapwa le alisuk om kopwe kaeo ussun ei apilukuluk allim epwe pwonuta lon mwach kkan.