ANCHANGEI pwe mi wor emén chienom ka fókkun ingeiti, nge a féri och mettóch kese weweiti popun a féri. Ekkóch ra esiita chienom na, me ra erá pwe a ekiekingaw me kirikiringaw. Kopwe mwittir tipeeú ngeniir, are kopwe witiwit le rongorong met chienom na epwe pwisin apasa? Ika ese nóm an epwe tongeni áweweei ngonuk, kopwe mosonottam, me kosap mwittir apwúngaló pwe i mi kirikiringaw?

Me mwen óm kopwe pélúweni, eli kopwe mochen akkomw etittinaéchú. Eli ka tongeni eis: ‘Ifa úkúkún ai silei chienei ei, me met popun ua kan ingeiti?’ Mi fen pwúng óm eáni ena kapas eis, nge ekieki: Itá kopwe pwal eáni ena esin ekiek ren Kot, ren án aramas tipi ngeni pwe i emén mi kirikiringaw?

Eli a weires ngonuk óm kopwe weweiti pwata Kot a féri are mutatá an epwe fis ekkóch mettóch. Chómmóng aramas repwe erenuk pwe Kot mi kirikiringaw me repwe peseok óm kopwe pwal eáni ar ekiek. Itá kopwe akkomw etittina ika mi fen pwúng met ra eáni ekiek usun Kot? Minne kopwe pélúweni epwe lóngólóng wóón úkúkún óm silei Kot. Pwisin eisinuk, ‘Kot a fen pwári pwe i met sókkun chiechi ngeniei?’

Ika a weires nónnómun manawom, eli kopwe meefi pwe Kot esap fen chiechiom. Nge ekieki mwo. Kot a aworato ekkewe weires mi fis lón manawom, are fen ekkewe feiéch? Usun met sia fen kúna, Satan, i “ewe samolun ei fanüfan,” nge esap Jiowa. (Johannes 12:31) Ina minne, chómmóng riáfféú me pwúngúngawen ei fénúfan ra fis pokiten Satan. Pwal och, ach apwangapwangen tipis me ekkewe mettóch mi fis lón manawach mi weiweitá ra efisi ekkewe chómmóng osukosuk mi torikich.

Iwe nge, met sókkun mettóch Kot a fen féri? Nengeni met ewe Paipel a apasa: Kot a “föri läng me fanüfan,” a pwal kapachelong lón án Jiowa kewe angang an féri inisich mi “amwarar,” me Jiowa i “ewe Kot mi amwöchü manauom.” (Kölfel 124:8; 139:14; Taniel 5:23) Met weween ekkena pwóróus?

Weween pwe sópwósópwólóón manawach a fis pokiten ewe Chón Férikich. (Föför 17:28) A wewe ngeni pwe ewe liffangen manaw, lingemwararen ach ei fénúfan, ach pwapwaiti tong me chiechi, pwapwaiti tufichin tini, neni, attapa, me rongorong, iir meinisin liffang seni Kot. (James 1:17) Kese pwal tipeeú ngeni pwe ekkena feiéch ra pwáraatá pwe Kot i Chiechiach me a fich ngeni ach sipwe súféliti me lúkúlúk wóón?

Pwúngún, eli a weires óm kopwe lúkúlúk wóón Kot. Eli ka meefi pwe kese kon lien silei Kot ren óm kopwe lúkúlúk wóón. Sia weweiti ena. Lón ekkeei fitu lesen sise tongeni pwóróus wóón meinisin ekkewe popun, pwata ekkóch aramas ra erá pwe Kot emén mi kirikiringaw. Nge met, esap fen múrinné óm kopwe achocho le silefichi Kot? * Ám aua lúkúlúk pwe ika ka féri ena, kopwe silei ewe enlet usun Kot. I emén mi kirikiringaw? Aapw, fen i emén “Kot mi tong.”​—1 Johannes 4:8, Testament Mi Fö.