Kapas Eis Seni Chón Állea
Pwóróusen uruwoon aramas mi pwáraatá pwe Pontius Pilatus wesewesen emén aramas?
Pontius Pilatus a silleló me ren ekkewe chón álleani Paipel ren met a féri ngeni Jesus lón ewe fansoun a kúna kapwúng me ninniiló. (Mat. 27:1, 2, 24-26) Iwe nge, itan we a pwal pwá fán fite lón ekkóch rekotun uruwo mi mak lón pwal ena fansoun. Me ren The Anchor Bible Dictionary, án ekkewe rekotun uruwo féúni iten Pontius Pilatus a “chómmóng me tichik lap seni ekkewe ekkóch chón Rom iir kepinaan Jutea.”
Nge a pwá iten Pilatus na fán chómmóng me lón makkeien ewe sou uruwoon chón Jus itan Josephus, ewe a makkeei úlúngát mettóch mi tichik mi fis nge a weneiti ekkóch osukosuk Pilatus a kúna atun a nemeni Jutea. Pwal emén sou uruwoon chón Jus itan Philo, a apachaalong ewe arúáánún pwóróus usun Pilatus. Ewe soumak chón Rom itan Tacitus, ewe a makkeei uruwoon ekkewe emperor mi nemeni mwúún Rom, a pwal affata pwe Pontius Pilatus a apwúngaló pwe Jesus epwe ninniiló lemwúún Tiperius we.
Lón 1961, ekkewe sou káéén pisekin chón lóóm mi angang lón án chón Rom we leenien katol sipai, lón Seserea, Israel, ra kúna eféú faú mi piin áeá nge iten Pilatus we lón fósun Latin a wesewesen mak wóón. Minne a mak wóón ena faú (iei sasingin) ese kon lien ffat, nge me ren ekkena sou káé, iei met a wesewesen mak wóón me akkomwan: “Ngeni ekkewe kot mi assamol (ei imw) Tiberieum Pontius Pilatus, Meilapen Jutea, a efinúnú.” Ese mwáál ena imw a fós usun, a weneiti eú imwenfel mi asúfélú Tiperius, ewe sou nemenemen Rom.
Emén fefin Chón Kraist epwe itá pwélú mékúran atun a káé ngeni emén Paipel nge emén chón afalafal mwán mi nóm?
A mak lón Ewe Leenien Mas lón fósun Merika minen July 15, 2002 fán ewe itelap “Kapas Eis Seni Chón Állea” pwe emén Chón Kraist fefin epwe pwélú mékúran ika a káé ngeni emén ewe Paipel nge emén chón afalafal mwán mi nóm, ese lifilifil ika mi papatais are esaamwo. Nge mwirin ám káéfichi usun ei mettóch, a pwá pwe a fich an epwe wor ekis siwil lón.
Ika emén chón afalafal mwán mi papatais a fiti emén fefin Chón Kraist atun an káé ngeni néún chón káé, iwe neminna epwe pwélú mékúran. An féri ena a pwáraatá súfél ngeni án Jiowa kókkót ren ié epwe wisen emmweni mwékútúkútún ewe mwichefel, pún a féri eú wis itá úrúrún wisen emén Chón Kraist mwán. (1 Kor. 11:5, 6, 10) Are, a tongeni tingorei ewe mwán an epwe emmweni ewe káé ika a fich ngeni me a tongeni féri.
Iwe nge, ika emén mwán chón afalafal esaamwo papatais a fiti emén fefin Chón Kraist le káé ngeni néún chón káé nge átena esap pwúlúwan, iwe me ren ewe emmwen seni Paipel esap pwal pwélú mékúran. Nge mwelien letipen ekkóch fefin Chón Kraist neman epwe amwékútúúr ar repwe chúen pwélú mékúrer lón pwal mwo ena fansoun.
