PAIPEL A PÉLÚWENI: “Epwe war ewe fansoun lupwen ekewe sotup meinisin repwe rong mwelian [Jesus] o towu seni peiaser.”​—Johannes 5:28, 29.

Jesus a oesini usun mwachkkan atun ewe Leenien Sotup epwe péénnúló fán nemenien Mwúún we. Fernando ewe sia fen fós usun a erá: “Ua máirú atun ua kerán álleani Johannes 5:28, 29. A ngeniei ápilúkúlúk mi enlet me ua poputá le ekiekéch usun mwach.”

Lón fansoun lóóm, ewe mwán mi tuppwél Hiop a silei pwe mwirin an máló Kot epwe amanawatá. Hiop a eis: “Ika emon aramas a mano, met, a tongeni manau sefan?” Fán lúkúlúk a erá: “Nge ngang upwe witi ekkewe fansoun mi fich, upwe witi tori ei fansoun osukosuk [fansoun lón Leenien Sotup] epwe wesino. Kopwe ne kökkö o upwe ne ponuwenuk.”​—Hiop 14:14, 15, Kapasen God.

Marta, fefinen Lasarus we a fen silei usun ewe manawsefál. Mwirin án Lasarus máló, Jesus a ereni: “‘Mongeom we epwe manausefälitä.’ Marta a pölüeni, ‘Ngang üa silei pwe epwe manausefälitä lon ewe ränin manausefäl lesopolan fanüfan.’ Iwe, Jesus a üreni, ‘Ngang ewe manausefäl me ewe manau. Iö a lüküei epwe manau inamwo are epwe fen mäla.’” (Johannes 11:23-25) Mwirin Jesus a amanawatá Lasarus! Ena pwóróus mi amwarar a eppii ngenikich fen kon amwararen met epwe fis lón mwachkkan. Anchangei ekkewe manawsefál repwe fis wóón unusen fénúfan!

PAIPEL A PÉLÚWENI: Án Kot we Kapas a áiti ngenikich pwe án Jesus manawsefál a sókkóló seni ekkewe walu manawsefál a mak lón Paipel. Ekkena walimén ra manawetá wóón fénúfan. Nge iei met sia álleani usun án Jesus manawsefál: “Jesus Kraist . . . i ewe mi feitä läng, a nonom lepelifichin Kot.” (1 Petrus 3:21, 22) Nge itá Jesus chék epwe manawsefál lón láng? Jesus a fen ereni néún kewe aposel: “Üpwe feila o amolätä leniemi, üpwe pwal liwinsefälito o angeekemi, pwe oupwe nonom rei, pwe ia ngang üpwe nom ie, iei ämi oupwe pwal nom ie.”​—Johannes 14:3.

Kraist a feitá láng me ammólnatá fán iten warotoon ekkóch me lein néún kewe chón káé. Chókkewe  repwe manawetá lón láng iteiter 144,000. (Pwärätä 14:1, 3) Nge met repwe féri lón láng?

Epwe fókkun chómmóng ar angang! Paipel a erenikich: “A feiöch o pin iö a eti ewe aeuin manausefäl. Ewe aruen mäla esap wor an nemenem wor, nge repwe nöün Kot me nöün Kraist souasor, repwe pwal eti Jesus le nemenem lon ükükün engeröü ier.” (Pwärätä 20:6) Repwe eti Kraist le wisen king me souasor wóón fénúfan.

PAIPEL A PÉLÚWENI: Kapasen Kot a makkeei met aposel Paulus a apasa. Iei alon: “Mi wor ai apilukuluk allim lon Kot, ewe chok apilukuluk atekkeei ra pwal etiwa, pwe epwe fis ewe manausefal ren ekkewe mi pung pwal ekkewe rese pung.”​—Föför 24:15, TF.

Ié kewe ra chóni ena mwich Paulus a eita ngeni “mi pung”? Ekieki ei pwóróus. Lesópwólóón manawen Taniel ewe mi tuppwél, ewe chónláng a ereni: “Kopwe mäla o manausefälitä, pwe kopwe angei wisom lesopolan fansoun.” (Taniel 12:13) Ia Taniel epwe pwáátá ie seni an méúrúló lón máló? “Ekewe chon pwüng repwe fanüeni ewe fanü o nonom won tori feilfeilachök.” (Kölfel 37:29) Jesus a oesini: “Ra feiöch chon tipetekison, pun ir repwe fanüeni fanüfan.” (Mateus 5:5) Taniel me ekkewe mi tuppwél repwe manawetá pwe repwe nómsefál wóón fénúfan tori feilfeiló chék.

Nge ié kewe repwe chóni ena mwich Paulus a eita ngeni “rese pung”? Iir ekkewe billion aramas ra fen máló nge chómmóng me leir rese fókkun tufichin weweiti me apwénúetá met Paipel a apasa. Mwirin ar manawsefál, repwe tufich le silei me riri ngeni Jiowa * me Jesus. (Johannes 17:3) Chókkewe ra filatá le angang ngeni Kot epwe wor ar ápilúkúlúkún manaw úkúkún Jiowa a manaw, weween tori feilfeiló chék.

PAIPEL A PÉLÚWENI: Kot “epwe talüpwasei chönün mas seni won meser meinisin. Esap chüen wor mäla ika letipeta ika kechü ika cheuch, pun ekewe mettochun lom ra morola.” (Pwärätä 21:4) “Repwe aüetä imwer o nonom lon, repwe pwal fotuki irän wain o ochei uan.”​—Aisea 65:21.

Anchangei mwo atun ka manaw fitifengen me attongeom kewe mi manawsefál lón ena sókkun fénúfan! Nge a pwal wor ei kapas eis, Pwata sipwe lúkúlúk pwe ewe manawsefál epwe fis?