Met a fis? Pwata Kot ese maun fán iten ekkewe chón Jus usun met a fen féri me lóóm? Are pwata ese allúk ngeniir ar repwe maun pwe repwe ngaseló seni ar riáfféú? Itá a siwil án Kot ekiek usun maun? Aapw. Nge a fis eú watteen siwil mi weneiti ekkewe chón Jus. Iir rese lúkú pwe Néún Kot we, Jesus, i ewe Messaia me ra oput i. (Föför 2:36) Ina minne, a péút seni ewe mwúún Israel ar we riri ngeni Kot mi kkóló aúchean.​—Mateus 23:37, 38.

Kot ese chúen túmúnú ewe mwúún Jus me ewe Fénúen Pwon. Iwe lupwen ekkewe chón Jus ra fiti eú maun, resap chúen tongeni apasa pwe Kot a nónnóm rer me a álisiir. Jesus a fen oesini pwe epwe péút seni mwúún Israel án Kot chen me an kewe feiéch me epwe nóm ren pwal eú mineféén mwú lón pekin lúkú, Paipel a eita ngeni “ewe Israelin Kot.” (Kalatia 6:16, Testament Mi Fö; Mateus 21:43) Ewe mwichefelin Chón Kraist mi kepit, ina ewe Israelin Kot lón pekin lúkú. A ffat, lón fansoun ekkewe aposel, Paipel a ereni ekkena Chón Kraist: “Ikenai oua nöün [Kot].”​—1 Petrus 2:9, 10.

Pokiten ekkewe Chón Kraist lón fansoun ekkewe aposel ra wiliti néún Kot aramas iei, itá i epwe maun fán ásengesiir pwe epwe angasereló seni nemenemengawen Rom? Are a allúk ngeniir ar repwe maun ngeni chón eriáfféwúr? Aapw, ese féri ena. Pwata? Ren ekkewe sókkun maun Kot a tipeeú ngeni, i chék a wisen apwúngaló ineet ena maun epwe fis, usun met ewe lesen mwen ei a áiti ngenikich. Kot ese maun fán ásengesin ekkena Chón Kraist lón fansoun ekkewe aposel are allúk ngeniir ar repwe maun. A ffat pwe esap ina ewe fansoun Kot epwe maun pwe epwe amóeló minne mi ngaw me féfférún eriáfféú.

Ina minne, ekkena Chón Kraist iir ra usun chék néún Kot kewe aramas lóóm, mi lamot repwe pwal witiwit tori ewe fansoun Kot epwe áwesaaló minne mi ngaw me féfférún eriáfféú. Atun ar witiwit, Kot ese allúk ngeniir ar repwe pwisin maunei ekkewe chón oputer. Jesus Kraist a affata ena lón an kewe afalafal. Áwewe chék, i ese ereni néún kewe chón káé ar repwe fiu lón maun, nge a fen ereniir: “Oupwe echeni chon oputakemi o iotek fän iten chokewe mi ariaföüükemi.” (Mateus 5:44) Lupwen Jesus a oesini pwe ekkewe soufiun Rom repwe maunei Jerusalem, i a éúréúra néún kewe chón káé ar repwe sú seni Jerusalem lón ena fansoun, resap nónnóm lón me fiu ngeniir, iwe ina met ra féri.​—Lukas 21:20, 21.

Pwal och, fán emmwenien Kot, aposel Paulus a makkeei: “Ousap liwini ngeni eman chappen an föför, . . . Pun a mak lon ewe Toropwe mi Pin, ‘Ngang üpwe ngeniir chappen ar föför, üpwe liwini ngeniir ükükün liwinin ar föför mi ngau, iei alon ewe Samol.’” (Rom 12:19) Paulus a aloni met Kot a apasa mi mak fitepúkú ier lóóm lón Lifitikos 19:18 me Tuteronomi 32:35. Usun met sia kúna lón ewe lesen mwen ei, eú alen án Kot túmúnú néún kewe aramas lón fansoun lóóm, ina an álisiir lón ar maun ngeni chón oputer kewe. Ina minne, alon Paulus kana ra pwáraatá  pwe ese siwil án Kot ekiek usun maun. Lón fansoun ekkewe aposel, Kot a chúen meefi pwe mi pwúng an epwe áeá maun pwe epwe túmúnú néún kewe chón angang me áwesaaló ekkewe sókkópaten féfférún eriáfféú me minne mi ngaw. Iwe nge, Kot chék epwe apwúngaló ineet ena sókkun maun epwe fis me ié epwe fiti, usun chék met a fen fis lón fansoun lóóm.

A ffat pwe Kot ese allúk ngeni ekkewe Chón Kraist lón fansoun ekkewe aposel ar repwe fiu lón ekkewe maun. Nge ifa usun lón ei fansoun? Itá Kot a fen allúkú ngeni eú mwichen aramas ikenái ar repwe fiu lón maun? Are, iei ewe fansoun Kot epwe angolong me maun fán ásengesin néún kewe chón angang? Ifa án Kot ekiek usun maun lón ei fansoun? Ewe lesen mwirin ei epwe pélúweni ekkena kapas eis.