KI MANNYER Psonm 83:18 in ganny tradwir dan ou Labib? Les Saintes Ecritures—Traduction du monde nouveau i tradwir sa verse koumsa: “Ki dimoun i konnen ki ou, ki ou non i Zeova, ou tousel ki Tre O lo later antye.” I annan ankor lezot Labib ki tradwir li preski parey. Me bokou tradiksyon pa servi sa non Zeova. Zot ranplas li par bann tit parey “Senyer” oubyen “Eternel.” Kwa ki ti devret la dan sa verse? En tit oubyen sa non Zeova?

Sa verse i koz lo en non. Ler Labib ti ganny ekrir orizinalman, en gran porsyon ti an Ebre. En non spesyal ti aparet ladan. Sa non ti eple koumsa dan langaz Ebre: יהוה (YHWH). An Angle, sa non in ganny tradwir konman “Jehovah” e an Kreol “Zeova.” Eski sa non i aparet zis en fwa dan Labib? Non. Dan maniskri orizinal Lekritir Ebre, sa non i aparet 7,000 fwa!

Eski non Bondye i enportan? Mazin sa lapriyer ki Zezi Kri ti kite konman en model. I konmans koumsa: “Nou Papa ki dan lesyel ki ou non sen i ganny glorifye.” (Matye 6:9) Plitar, Zezi ti priye: “Papa glorifye ou non.” Bondye ti reponn dan lesyel e dir: “Mon’n deza glorifye li e mon pou glorifye li ankor.” (Zan 12:28) Alor i kler ki non Bondye i vreman enportan. Me akoz serten tradikter in tir sa non ler zot in tradwir Labib e ranplas li avek bann tit?

I kapab annan de rezon prensipal. Premyerman, bokou dimoun i dir sa non pa devret ganny servi akoz napa personn ozordi ki konnen ki mannyer zot ti pronons li okonmansman. Lontan langaz Ebre ti ganny ekrir san okenn vwayel. Alors napa personn ozordi ki asire ki mannyer bann dimoun dan letan Labib ti pronons sa YHWH. Me eski sa i devret anpes nou servi non Bondye? Dan letan Labib, non Zezi ti kapab pronons konman Yeswa oubyen petet Yeoswa.  Personn pa asire. Pourtan ozordi dimoun partou dan lemonn i servi non Zezi. Zot pronons li parey laplipar dimoun i prononse dan zot langaz. Zot pa ezite pour servi sa non zis akoz zot pa konnen ki mannyer i ti ganny prononse dan premye syek. Ou osi si ou al dan en lot pei, ou pou remarke ki dimoun laba pa pronons ou non menm parey dan ou pei. Alors menm si nou pa asire ki mannyer non Bondye ti prononse lontan, sa pa en rezon pour nou pa servi sa non.

En dezyenm rezon ki zot souvan donnen pour pa mansyonn non Bondye dan Labib i akoz en tradisyon Zwif byen lontan. Bokou Zwif ti krwar zot pa devret zanmen pronons non Bondye. Sa krwayans i baze lo en fo enterpretasyon en Lalwa dan Labib ki dir: “Zot pa devret pran non Zeova zot Bondye konman nanryen ditou, parski Zeova pou pini sa enn ki pran son non konman nanryen ditou.”—Egzod 20:7.

Sa lalwa ti defann mal servi non Bondye. Me eski i ti defann servi non Bondye avek respe? Ditou. Sa bann zonm ki ti ekrir sa porsyon Labib an Ebre (“Ansyen Testaman”) ti bann zonm fidel ki ti swiv Lalwa ki Bondye ti donn bann Izraelit lontan. Me zot ti servi non Bondye souvan. Par egzanp, dan bann kantik ki bann lafoul adorater ti sante byen for ti annan non Bondye. Zeova ti menm demann son bann adorater pour kriy son non, e bann fidel ti obeir. (Yoel 2:32; Akt 2:21) Alor, bann Kretyen denozour pa ezite pour servi non Bondye avek respe, zis parey Zezi ti fer.—Zan 17:26.

Bann tradikter Labib in fer en gro fot pour ranplas non Bondye par bann tit. Zot donn lenpresyon ki Bondye i tro lwen pour nou vin pros avek li, kan sa ler Labib i ankouraz nou pour apros pli pre avek Zeova. (Psonm 25:14) Mazin enn ou zanmi ki byen pros avek ou. Si ou pa ti konn son non ditou, eski ou ti pou vreman pros avek li? Be i parey avek Bondye. Si dimoun pa konn son non, ki mannyer zot kapab vreman vin pros avek li? Deplis, ler dimoun pa servi non Bondye, zot pa konnen ki sa non i vedir osi. Ki non Bondye i vedir?

 Bondye li menm ti eksplik son serviter fidel Moiz ki son non i vedir. Kan Moiz ti demann Bondye konsernan Son non, i ti reponn: “Mon pou vin sa ki mon oule vini.” (Egzod 3:14) Tradiksyon Rotherham i lir koumsa: “Mon pou vin nenport kwa ki mon oule vini.” Alors Zeova i kapab vin tou sa ki neseser pour akonpli son plan.

Konmela ou ti kapab vin tou sa ki ou oule vini. Ki ou ti pou fer pour ou bann zanmi? Si enn ant zot i gravman malad, ou ti pou kapab vin en dokter profesyonnel e sonny li. Si en lot i dan en gro problenm larzan, ou ti pou kapab vin ris e ed li rezourd son problenm. Me malerezman, ou pa kapab vin tou sa ki ou oule vini. Nou tou parey. Anmezir ou etidye Labib, ou pou sirprann pour vwar ki mannyer Zeova i vin nenport kwa ki neseser pour li akonpli son bann promes. Pour li, i en plezir pour servi son pouvwar an faver bann ki kontan li. (2 Kronik 16:9) Me bann ki pa konn non Zeova i perdi sa zoli laspe dan son personnalite.

I kler ki non Zeova ti merit dan Labib. Konnen ki sa non i vedir e servi li san ezite dan nou ladorasyon i vreman kapab ed nou apros pli pre avek nou Papa dan lesyel, Zeova. *