“Me ler ou priye, pa repet menm zafer.”​—Matye 6:7.

Zeova pa anvi nou resit lapriyer ki nou’n aprann par ker oubyen lir dan en liv lapriyer. Me i anvi nou dir sa ki dan nou leker. Zis mazinen ki mannyer ou ti pou santi si en zanmi ti repet menm keksoz tou le zour. Bann bon zanmi i koz byen avek kanmarad e zot senser. Ler nou servi nou prop mo pour priy avek nou Papa ki dan lesyel, sa i montre ki nou vwar li konman en zanmi.

“Ler zot demande, zot pa gannyen akoz zot pe demann avek en move lentansyon.”​—Zak 4:3.

Nou pa ekspekte Bondye reponn nou lapriyer si nou pe demann li en keksoz ki I pa anvi nou annan oubyen fer. Par egzanp, vi ki Zeova in averti nou kont vorasite e pour pa met nou krwayans dan bann keksoz ki pa vre, parey lasans, eski I pou reponn lapriyer en dimoun ki zwe larzan? (Izai 65:11; Lik 12:15) Nou pa ekspekte Zeova pour reponn sa kalite lapriyer. Pour Bondye reponn nou lapriyer, nou devret fer sir ki sa ki nou pe demann li, i annakor avek sa ki I dir nou dan Labib.

 “Sa enn ki bous son zorey pour li pa antann sa ki lalwa i dir, menm son lapriyer i donn degou.”​—Proverb 28:9.

Dan letan Labib, Bondye pa ti reponn lapriyer bann ki ti dezobei son lalwa. (Izai 1:15, 16) Bondye pa’n sanze. (Malaki 3:6) Si nou anvi Bondye i reponn nou lapriyer, nou bezwen fer tou sa ki nou kapab pour viv an armoni avek son lalwa. Me ki i arive si nou’n fer keksoz mal dan lepase? Eski sa i vedir ki Zeova pa pou zanmen ekout nou? Non! Bondye pou pardonn nou si nou montre ki nou regret sa ki nou’n fer e fer nou mye pour fer li plezir.​—Akt 3:19.